Yasaqya 45:19 - NABUWWA KEE MALIKWA

¹⁹ Anu dibuk tan ikkel sin lih mayaabinniyo; abam faxam siinik maaqurinniyo. Yaqkuubuk rade marak, ‹Yoo akah gorrisa› excem foyya hinna. Anu YALLAAY; edde yaabam, numma le yaaba. Cakki baxxaqqa haa Dagelta kinniyo» 'yaanam iyyah yan.

Yasaqya 45:19 Referans Kwoze

Yasaqya 48:16

Tonna'mmay ta way kabba 'xicaay anu axcem oobbeya. Dumaak qellite sinni yaabah sin lih yaabak sugeeh; edde yabba axcem inkih nummak macsiisam yoo» iyye. A saaku YALLAY Mulki le isi Roocaaniyya yot heeh yoo ruube.

Qaamus 5:4

«YALLI Israayil ummatak iyyamaa, ‹Yol uduura. Yol tuduureenik, mano geetton.

Yasaqya 8:19

Takkay immay sahda, «Ramli qida mara kee kalluwalley tutuc intak xaagu aba» siinik intu wayta waqdi, isin, «Xaagu kalluwallek abtaanamak, Yallak macah abe waytan? Yan marih xaagu rabe marih roocik macah abtan?» 'yaanam keenik axcetton.

Yasaqya 1:15

Dooqah kulli way gaba fayya haytaanamah gaboobi siinik qabalat tutlukeh tani'kkal, siinik moggolaay racmatta le intih sin mabla.

1 Aydaad 28:8

«Hay taway, yi ummatey, ni Dagelti yoo elle yaabbeeh, siiniy YALLIH ummat kinnihiyya yoo elle tablen ikkel, yaabah aniih; YALLAY ni Dageltah yani nee amrissa heem cubbusak abtaanam siinil cabah an. Tah duudussa hayteenik, ta baaxoy usuk siinih yeceehiyya sin ikoyta akkeleeh; baxak baxal ikoytah siinik raaqele» 'yaanam iyye.

Yasaqya 63:1

Edom-rasuk Bosrâ-magaalak tamaatem iyyay? A qajaaqibih yan sartanay xarbat qassoowehiyyat gacteh, fooca fan annah nabna kee kaxxa qande luk tamaatem iyyaay? «Tah, yooy sahda waduh qande leeh, qadaalat luk yaabak yamaatehiyya kinni.»

Yasaqya 45:23

Anu abeyyo axcuk, culeemik kora Dagelta hinniyo. Akkele excem takkeeh, abeyyo excem abah: ‹Kulli num yi foocal gommoh yoh radeleeh, Kok sa tu manaqbuda 'yaanam axcuk qahdi culelon› inni migaaqal akah xiibitem, duuduse'kkal wadir maxca.

Qedra 8:22

Kaadu keenik exceemih, «Anu dumah yan saaku Malikik, ‹Ni Dagelti isil yaamine marat barkat haah, darre isit caba mara fan mawagitaay, ken digaalah› 'yaanam exceh sugeemih sabbatah, sarra qaskaray faaris amok qeebi abtahiyya gital umeynitik nee dacrissa'gidih ‹Neh ucuya› 'yaanam, malikik axcem wacarriy yol tekke» exce.

2 Aydaad 15:2

too num tohuk lakal malik Aasat matra'gidih gexe. Anay fayya heeh deero kaah abeeh, «Malik Aasaw, yoo ankacis. Yuuda kee Benyam maraw, kaadu yoo ankacisa. Isin YALLIH mara tekkeenik, YALLI kaadu sin lih anele. Niya kaa fanah hayteenik, kaa gee liton. Takkay immay darre kaat cabteenik, darre siinit cabele.

Yasaqya 43:12

Takku waytam naharal elle siinih warseeh; toh tekke saaku, wadootuh siinih temeeteeh sin waddem yooy; tohum inkih toysoobbem yoo ikkal, ama sinam taqbude duyyey gabak bicseenihiyya hinna. Tonnal, yok sa Yalli ane waamah sumaq yok siini» 'yaanam iyye.

Yasaqya 44:8

Takkay immay yi ummatey, isin mameysitinaay cunxo sin abbixe waytay. Dumaak siinih warseeh, sin oysoobbeemil yi sumaq siini. Yok sa Yalli maay yan? Mayan. Anu aabbe wee yallay reebu sinaamah yakkehiyya mayan» iyyah yan.

Yasaqya 45:25

Yoo YALLI, Israayil ummat wadu waa Dagelta kinniyo. Tohuk gexxaamah too mari yoo faylisele» 'yaanam iyye.

Yasaqya 65:9

Yaqkuubuk rade yi marat, Yuudâ-kedok rade marat niqmat heeyyo; xaylo aceeyyo. Qaleela mango yi rasu ikoytah keenih aceeyyo. Inni maray innih doore dabqih too rasul hee liyo. Yi naqoosa elle sugele.

Ermiyaas 2:31

«Siinik axcem yok toobbeenik sin esseru waak ankacisay! Anu bacarih tan baaxoy num bakaarak elle waddiime waa, siinil ekkem maa saakuu? Ditey baaxo akah able waytaanahiyya siinil ekkem maa saakuu? ‹Ahaysa currik yan mara kinninooh; ninnih fanxem abenno ikkal, ku fanah manamaata› 'yaanam akah intaanam macaay?

2 Aydaad 7:14

yi maray yi migaaqal yaaxigeenihiyya yoh rammitak yoo kallaceeniih, abak sugen umaane cabba heenih toobiten ken tekkek, tonnal aban dooqa, elle an qaraanak keenik aabbeyyooh, abeenimik qafu keenih abeyyo. Ken baaxol suggu 'ye niqmat wadir keenih gacseyyo.