Yacedkel 48:21 - NABUWWA KEE MALIKWA

^21-22 Yallih Qibaadah Qari kee seekah yontocowwe arac kee Leewih yooboke marah yeceen baaxo kee, tonnah kaadu, magaala elle tan aracak, ayrô-mawqa kee ayrô-culma le kabut raqta exxa baaxoh-abbah im akkele. Kay baaxo deesen aroocak ayrô-mawqat raqta baaxoh cuduud fan gufeleeh; ayrô-culma le kabuk kaadu Maditraaniyah badah amma 'yaanam akkele. Tonnah kaadu, kilbat le kabuk Yuuda deqsitta kedoh yeexegen baaxot cuduuduh raaqeleeh, gabbi-qaxak kaadu Benyam deqsitta kedoh yeexegen baaxot cuduuduh raaqele.

Yacedkel 48:21 Referans Kwoze

Hosiqa 1:11

Yuudâ mara kee Israayil-mari wadir kaadu angaleleeh inki mara akkelon. Inki amoyta haysitelon. Isinni baaxol gaddaleela akkelon. Yidraqel-ayro, kaxxa ayro akkele.

Yacedkel 48:10

Too taahirik yan aracay dessot gacu waahiyyak garab seekah antacawwele. Seekah yacoonu waanam, ayrô-mawqak xabba haanamaay ayrô-culmah amma 'yaanam takke baaxok taban kee namma kiilomitri kee garab takkeeh; kilbat le kabuk xabba haanamaay gabbi-qaxa le kabuk koona kiilomitri takke baaxo keenih aaxigelon. Ta aracak gudel Yallih Qibaadah-Qari xissiimele.

Yacedkel 48:8

Rikeek heen baaxo kaadu ayrô-mawqak xabba haanamaay ayrô-culmah amma 'yaanam takke baaxoy Yuudâ cuduuduh elle yangaleenihiyya haysitelon. Tonnal xexxaarah kedoodah yeceen baaxoh gide akkele. Too baaxo kilbat le kabuk xabba haanamaay gabbi-qaxah amma 'yaanam, taban kee namma kiilomitri kee garab baguh akkele. Yallih Qibaadah Qari too rikeek heen baaxok gudel anele.

Yacedkel 37:24

Yi naqasuh yan Dawud innah yan malik, malik keenik akkele. Inki loynaytih gubat xiineloonuuh, yi amri kee yi xinto intam digga luk duuduselon.

Yacedkel 48:20

Tonnal, a aroocay deeseenihiyyak affara gaco aalleleeh, kulli dariifa xexxaarah taban kee namma kiilomitri kee garab akkele. Tohim taahirik tan exxa kee too magaala elle xissinte araca.