31 Masri malik kee kay qaskar carbit rabele'mmay, usuk akeeral carbit rabe mara yabalu waa waqdi, a marat kaadu aham tekkem kaat amqele. Ahat yabtam yoo YALLAY Mulki lehiyya» iyye.
Too caxa dite le kabri oobe marat tengele saaku, is radde waqdi abteh ten xongoloh mango baaxoh mari gilite. Inkih tan Qadanal suge coox kee, leek meqe innah allaggoowak suge Lubnaan cooxuy woo boodo fanah oobehiyya, a caxah raddem yublen waqdi ruffu iyyen.
Too marak dago agabu kee labhay too digaalak raqqa 'tehiyya, sin fan amaateloonuh; nagay ken cubbussan waqdi, uma mara kinnoonum keenik abletton. Too waqdi Yarusalaam marat abe digaala celta digaala kinnim elle aaxigetton.
«Dumah yan saaku Masri malik a addunyal enna 'ya mari akak cunxita num abeh suge. Takkay immay kaa kee kay qaskar rabeleeh, tohuk wadir diini maleelay carbit rabtehiyya lih gacelon. Tahat yabtam YALLAY Mulki lehiyya» iyye.