Yacedkel 28:23 - NABUWWA KEE MALIKWA

²³ Dalka siinil ruubeyyo. Qabal gitittel darah innah siinik akah caxita'nnah abeyyo. Kulli kabuk qeebi siinit abeloonuuh, ummatta siinik ambaxele. YALLA kinniyom tonnal yok aaxigetton› keenik inxic» iyye.

Yacedkel 28:23 Referans Kwoze

Yacedkel 38:22

Toh lih kaadu dalka kee qabala tittak caxeloonuuh, tohul ken digaaleyyo. Kaa kee kay qaskar kee, wohuk kalah yan maray kay xaquk gacca 'yeh qeebih gulguluh yanihiyyal, kaxxa roobuy gira kee dani (xalol kibrik) agleh yanihiyya keenil ruubeyyo.

Yacedkel 26:6

Teetik baddi-afal raqtah tan mandarittel yan mara seefit selelon. Suur mari YALLA kinniyom too saaku yok aaxigelon» iyye.

Yacedkel 25:17

Yi naqbi le'nna ken ayballayuk, uma digaalah ken digaaleyyo. Agaagul sinni canê-gacsa keenit abeyyo. Too waqdi YALLA kinniyom yok aaxigelon» iyye.

Yacedkel 25:11

Tonnah kaadu Mooyab digaaleyyooh; too saaku YALLA kinniyom yok aaxigelon» iyye.

Yacedkel 25:7

Tohih sabbatah sin buubu waah sin radu waa marih gabal sin heeyyo. Sarrah doolat akah akke waytaanaah, baaxo akah alle waytan innah, inkitanuuk sin bayseyyo. Anu YALLA kinniyom too saaku yok aaxigetton» iyye.

Yacedkel 5:12

Ummatak sidochaytoh af siinik qulul kee dalkah magaalak addal ambaxele. Aki sidooca af kaadu magaalak afal seefit selelon. Raaqe sidooca af kaadu affara kaalibil caacayat ruubeyyo. Sarrak innih seef luk ken ayraddeyyo. Tahat yabtam yoo YALLAY Mulki lehiyya.

Ermiyaas 15:2

‹Anke genxoo?› kok iyyeenik, keenik intaamah, YALLI iyyem ah teeti: Sahdak garab dalkat siinik ambaxeloonuuh, tonna leemiik tokke gexelon. Sahdak garab carbit ambaxeleeh, tonna leemiik too mari tokke gexele. Sahdak garab qululuh ambaxeleeh, too mari kaadu tokke gexele. Garab kaadu marin baaxo seewah beelon.

Ermiyaas 51:52

Takkay immay too tiyak anu siinik axcemii, Baabelon mari yalla akak iyya duyyey yaqbudehiyyah digaaleyyo. Too wakti kaadu xayyooweh yan. Keenik biyak edde yekke mari aba araadaqisiyyi, inkih tan baaxo duudele.

Yacedkel 5:17

Xaylo siinik qidda'gidih, qulul kee alluwwa siinit ruubeyyo. Sin edde qiduh biyak siinit ruubeyyooh; sahda siinik titta qideleeh; carbi addal siinik akkele. Tahamat yabtam yoo YALLA» yok iyye.

Yacedkel 21:14

«Bani-adantow, gaba uguraay takku waytaamat yab. Seef sahdat fiiruk geerah radele. A seef, sahda qidu waa seefiy mango kabuk keenit amaatuk ken yarciidu waahiyya.

Yacedkel 21:16

Af le seefik anu axceemih, ‹Af le seefow, migdak gural ufkunay irgiggiq. Elle afkuninnaan kabul irgiq.›

Yacedkel 30:4

Masril qeebi radele. Mango mari edde rabeleeh, rado amaggeleeh, abuuruh cabba tet heelon. Too waqdi Kuusul sinam kaxxam ankikkiqele.

Yacedkel 32:30

«Saydâ mara kee kilbat le kabut raqta abbobti inkih kaadu wokkel tan. Duma sahdat cunxo qidak yenen. A saakuh tu gactek, diini-maleelah rabeenih; carbit rabe mara lih akeera isinni qaybi xagarat luk gexen. Akeeral yan marat tikka 'ye qaybi keenit yekke.