Yacedkel 11:12 - NABUWWA KEE MALIKWA

¹² Too waqdi anu YALLA kinniyooh; isin kaadu cuggaaneh siinik yan marih xinto kee abto katayak yi amri cinteenih, anu siinih hee xinto cabba hayteenim aaxigetton› keenik inxic» yok iyye.

Yacedkel 11:12 Referans Kwoze

Yacedkel 8:10

Adda culeh wagte waqdi, gidaarak bagul Israayil mari yaqbude duyyeh tasaawiriiy, caraamak tan alluwwa kee, kalah kaadu, garbah baaxok bagul gexxa alluwwah tasaawir uble.

Yacedkel 8:16

Sarrak Qibaadâ-Qarik adda le kabut raaqa daarat fanah yoo bee. Tokkel, YALLIH Qibaadah-Qarih adda akak culan culma kee sadgat elle aban aracak fanal, labaatanna kee koona num yen. Too labaatanna kee koona numuu, qibaada qarit darre cabak, ayrô-mawqa fan qununnu 'yeh, tawqeh tan ayro aqbuduk yenen.

Yacedkel 8:14

Toh inxicca 'yeh, YALLIH Qibaadah Qarik kilbat le kabut raqta culma fanah yoo bee. Tokkel Tammud akak iyyaanamay yallah loonuhiyyah weeqa agabu uble.

Yacedkel 20:24

Toh akah abem, yi madqa cinak sugeeniih, yi amri maaqilak sugen. Sabti ayroy mataamitina keenik exce, taamitak sugen. Ken abbobti aqbuduk sugte xeet kee cooxuk bicsen duyyeh qibaadat gacen.

Yacedkel 20:21

«Takkay immay ken xaylo kaadu yi yab cinaanam bahte. Yi amri kee yi xintoy duuduse numuh waar teceehiyya cineenih. Sabti ayro nadaasa aben. Too saaku kaadu woo bacarih tan baaxol inni naqabu keenil oobiseh ken baysam faxe.

Yacedkel 20:16

Toh akah abem, xeet kee cooxuk bicsen duyye aqbuduk, anu keenil oobise amri cineeniih, keenih oobise xinto kataatoonu cineeniih, sabti ayroh massakaxxa cineenimih keenik abe.

Yacedkel 18:9

Yi amri duudusaah, yi xintol tanim aba. Cakki bagul tanim tannah yan numuuy; waarele. Tahat yabtam yoo YALLAY Mulki lehiyya» iyye.

Yacedkel 11:21

Takkay immay anu niqibyo duyyeh-qibaadah amok kate waa mara siinik digaaleyyo. Oson abba haan uma taamah ken digaaleyyo. Ahat yabtam yoo Mulki le YALLA› keenik inxic» yok iyye.

Ermiyaas 10:2

YALLI siinik iyyamaa: «Sinam abtam maabina. Qaraanal duma able waak sugten asta tableenimih macunxitina. Sinam annah tan asta table waqdi cunxitaanam tableenimih, isin macunxitina.

Ermiyaas 6:16

YALLI isi marak iyyeemih, «Giti elle yangale maglallal solla inxicay baaxo wagitay! Dumî dabaanal sugte gititte cubbusa. Yayse gitay siinih yascassoonu waanahiyyat gexa. Too gitat gexxeenik, amaan geetton» iyye. Takkay immay toh keenih warse waqdi kaal gacseenimih, «Aleeyyah yayse gitat magenna» iyyen.

Nacmiya 9:34

Ni kaxxa abbobtiiy, ni malikwaay ni saqolti kee seeka ku xinto intam abak masuginna. Atu ken elle amrissam kee atu keenih abta garci-kalootut baaqid luk manannon.

Qedra 9:7

Ni kaxxa abbobtih dabaanaay, akke, neey ku mara kinnihiyya dambi abittok way maadayinnino. Nanu abne dambik gexxaamah, neey ni malikwa kee seekak nakkeemiik, marin malikwah milkih gacneeh; nee buubeeniih, nee qideeniih, seewah casbit yabbixen marih gurral nee been. Caddi akah abe waan maray qaybit radehiyya nekkeh sugneeh, uxih too marah akah nan.

2 Aydaad 36:14

Tohuk kalah kaadu, Yuudah abbobti kee seekah abbobti Yalla cinna hayteh, cuggaaneh keenik yan mari edde ase umâ-yabulih-tan-taama inkih kataateeniih, xeet kee cooxuk bicsen duyyeeyah qibaadat gacen. YALLI isih taahir abe Qibaadah-Qari nadaasa aben.

2 Aydaad 28:3

Hinnom deqsitta golol gabat bicsen duyyeh qaydarus qeerisak suge. Kaadu girat isi xaylo sadgatah qide. Woh akah abem, Israayil-mari yamaateemik naharal woo baaxol suge maray YALLI yeyyeeqehiyyak raaqisen umâ-yabulih tan qaadah gabbaaqiyyak ten.

2 Aydaad 13:9

YALLIH seekay Haaruunuk raddehiyya baaxok xiiriyteenih Leewih yooboke mara kaadu baaxok teyyeeqeenih, ken aftok Yalla maleela akah abta innah, isinnih dooritten maray seekâ-samad alle waahiyya yallah liton duyyeeya elle taqbuden aracal seekah haysitten. Dahaltu kee malcina maruw baahinnaan numuk, ‹Isin seeka tekkeenih› intan.

2 Malikwa 21:22

YALLAY usuk akak rade kay kaxxa abbobti doorehiyya cinna heeh usuk aba iyyam abam cineh.

2 Malikwa 21:2

Manasse, Israayil-mari yamaateenik naharal woo baaxol suge maray YALLI yeyyeeqehiyya edde asak sugen umâ-yabulih-tan-taama kataateeh, YALLAL dambi lem baahe.

2 Malikwa 18:12

Israayil-marat tonnah tanim tekkeeh; toh keenit akah tekkem, YALLAY ken Dageltah yanihiyyah amri cineenimih sabbata. Oson YALLI, Muusay kay naqasu kinnil ruube amri cineeniih, YALLI ken lih abe bica xaguraanam maabinnon.

2 Malikwa 16:3

Duma sugte Israayil amoytiitik kaxxih, Yalli niqbam abak suge. Ayrok teena Acad girat isi baxa sadgatah qide. Usuk woh akah abem, Israayil-mari yamaateemik naharal woo baaxol suge maray YALLI yeyyeeqehiyyak raaqisen umâ-yabulih-tan qaadah gabbaaqiyyak ten.

1 Malikwa 11:33

Toh kaal akah baahu waam, Suleeman yoo cinna heeh gersi baaxoh mari yaqbude duyye yaqbudem baaheeh; yoo yaqbudem cabba hee. Qastarot deqsittaamay Saydâ marih say yalla axcuk too mari yi aftok yaqbudehiyya kee, Mooyab mari yaqbude Kamos deqsittaamay Mooyab mari kaadu yallah lehiyya kee, Milkom akak iyyaanamay Qammon mari yallah lehiyya yaqbudeemit gace. Kay abba Dawud yi gita katayak yeneeh, anu oobise xinto kee amri oggolak sugeh immay, usuk oggolaanam cineh. Suleeman yi gita cabba heeh ceele waytut ase.

Yacedkel 18:8

Abuuduh kaak been lakqo kaah gacsan waqdi ossotina edde mafaxa. Baatilit maasa. Yoome mara qadaalatal mekla.

2 Malikwa 21:9

Takkay immay Manasse, Yuudâ-mara, duma woo baaxol suge maray YALLI ken taagah woo baaxok yeyyeeqehiyya abak suge dambik lafita dambit ken asise.

Nacmiya 9:33

Nee digaalte waqdi, cakkih tan digaala net abte. Atu kulliimil digga lito'mmay, nanu umam abne.

Yacedkel 5:6

Takkay immay Yarusalaam mari yi amri cineh, raqqa 'te baaxooxah marak umaaneh lafitaanam isinnik yuybulleenih. Yarusalaam yi amri cinteeh anu aba axcem abe cinteh. Tet dariifal enna 'ta baaxooxah marak yabti cinah lafittam tet kinnim isik tuybulleeh.