Qedra 6:14 - NABUWWA KEE MALIKWA

¹⁴ Nabi Caggay kee Qiddó-Zakariyya ken aydikumusak, Yahuud marih idoola kaadu is le kabuk, Yallih Qibaadah-Qarih xisnet tisissikeeh, meqe'nnal taamitak xisen. Israayil doore Dagelti elle amrissa hee innal, tonnah kaadu, Fursi deqsita rasuk malikwah ten Kooris kee Daryawes kee Artacsasta deqsitta malikwa keenik elle inxicca 'yen innal, Israayil doore Dageltah-qari xiseenih, gaba kalen.

Qedra 6:14 Referans Kwoze

Qedra 7:1

Aham tekkeemih mango sanat suggu 'yeenik lakal, Artacsasta Fursi-malik edde yekke dabaanal, Qedra deqsita num yen. Too num akak radem, kaxxa seekih yen Haaruunu. Qedrah abba Seraaya deqsitak yen. Seraayah abba Qadarya deqsita numuk ten. Qadaryah abba Cilkiyya deqsita numuk ten.

Qedra 5:13

Sarra Malik Kooris inkih yan Baabelon rasuk malik edde yekke sanatal, Yallih Qibaadah-Qariy yiddigilleh sugehiyya nammeyhaak xisa 'yaanamih amri yecee.

Qedra 4:24

Yallih-Qarih-xisne kaadu fanal teedeeh, Fursi-malikiy migaaqah Daryawes deqsitahiyya edde dardaare nammayhaytô sanat fan, xisne akak elle yeyseeden aracal elle teedeeh sugte.

Zakariyya 4:9

YALLI yok iyyeemih, «Darabbabel yi qarih xisneh rakiibo bicseeh; ahaysa gaba akak kalele. YALLAY Nabaamak Nabahiyya sin fanah yoo ruubem too saaku aaxigetton.

Caggay 1:8

Away uguta. Woo saagan elle yan qaleela fan gexay saagan baahaay, yi qari edde xisa. Tah abteenik, anu ruffu axceyyooh; tokkel yoh taguude qibaada yoh abetton. Tah intam yoo YALLA› keenik inxic» 'yaanam kaak iyye.

Yasaqya 44:28

Kooris deqsita numih giddinaamak, ‹Usuk yi aftok baaxo xiinisele› 'yaanam axce. ‹Anu aba kaak axcem abele. Yarusalaam magaala nammayhaak akah xissinta innah amri aceele. Yallih Qibaadah-Qarih-rakiibo xisele› 'yaanam axce» iyye.

Qedra 4:3

Darabbabel kee Yaasuwa kee raqqa inte Israayil-abbobti keenil gacisseemih, «Sin kee nee titta lih qari xisnam neh midnisinta. Fursi-malikih yan Kooris nee elle amrise innal, numtin cato faxe'kal, YALLAY Israayil doore Dagelta kinnihiyyah qari ninnih xisenno» keenik iyyen.

Qedra 3:8

Yuduure mari Yarusalaamay Yallih Qibaadah-Qari elle suge arac kinnihiyya gufeenimih nammayhaytô-sanatak nammeyhaytoh alsat, Yarusalaamal gaabooweenih, Qibaadâ-Qarih-xisne duma elle suge'kkel nammeyhaak xisaanam qimbisen. Saltiyál-Darabbabel kee Yahuuxadák-Yaasuwa kee, wohuk kalah yan ken marak seekaay, Leewih yooboke mara kee, elle sugen marin baaxok yuduure marak num raaqe'kal, yakkeenimik inkih, too taamat gaba yessegellen. Leewih yooboke marak labaatanni karma akke kee wohuk fula aalle yakke mari inkih, woo qarih xisoh taama elle takke'nna amo wagitak yenen.

Qedra 5:1

Too dabaanal Caggay kee Qiddó-Zakariyya deqsita namma nabi suge. Too nabuwwa, Israayil doore Dageltay ken amol yenehiyyah migaaqal, Yuudâ-rasu kee Yarusalaam magaalal suggu 'ye Yahuud mara lih yaaben.

Qedra 5:2

Saltiyál-Darabbabel kee Yahuuxadák-Yaasuwa too namma nabi yab yoobben waqdi, Yallih Qibaadah-Qarih xisne wadir qimbisen. Too namma nabi xisol kaadu ken catteh.

Caggay 1:1

Daryawes deqsita Malik Fursi-rasul tu edde taade malikih yen dabaanal, malik edde yekke nammayhaytô sanatak leceyhaytoh alsak inikhaytoh ayro, YALLIH farmo nabi Caggayal obte. Woo farmo YALLI akah ruubem, Darabbabel deqsita numuy Yuudâ rasul abbah sugehiyya kee Yoosuwa deqsita numuy woo rasul kaxxa seekih yenehiyyak ten. Darabbabel Saltiyal deqsita numih baxak ten. Yoosuwa kaadu Yahuuxadak deqsita numih baxak ten.

Zakariyya 1:1

Daryawes Fursi-rasul tu edde taade malik yakkeemih nammeyhaytô-sanatak bacarhaytoh alsat, YALLI Zakariyyal farmo oobise. Zakariyya Barkiyya deqsita numih baxak ten. Barkiyyah abba Qiddo deqsita numuk ten.

Zakariyya 1:16

Ahaysa Yarusalaam emeeteh aniih, teetih racmateyyo. Yi Qibaadah Qari nammeyhaak xiseloonuuh, Yarusalaam kaadu nammeyhaak xissiimele. Tah intam yooy YALLAY Nabaamak Nabahiyya› 'yaanam siinik iyya, keenik inxic» yok iyye.

Zakariyya 8:9

«Yi Qibaadah Qari nammeyhaak xisoonuh rakiibô-xaa heen saaku, nabuwwa sin lih edde yabteh sugte yab a saaku nammey haak yaabbe maraw, agiira takkeenim siinil taniih, niya siinik fayya 'tay. Tah intam yoo YALLAY Nabaamak Nabahiyya.

Qedra 6:3

«Malik Kooris malik edde yekke sanatat amri yeceeh iyyeemih: Yarusalaamal yan Yallih Qibaadah-Qariy yiddigillehiyya sadgatah saq elle qidaana'gidih, nammeyhaak xisaanama. Too qarih rakiibo haanama. Yallih Qibaadah-Qari xisan waqdi fayyah lactam cusul kaa abaanama. Baguh kaadu lactam cusulih gide kaa abaanama.

Qedra 6:8

Oson too qari xisan waqdi, ken elle cattaanam siinil tan. Taama keenik gaba kalla haytam fanah, fanat akah aade wayta innah, taamita marah Furaat Weeqaytuk Ayrô-culma le kabut Raaqa Rakaakayak doolat gabbarah beyta lakqo dudda luk, waqlal elle ucuya.

Qedra 9:9

Naqoosah sugne'mmay, kooy ni Dagelta kinnihiyya nee mamaaqilinnaay, ku kacanuy aggiriqe sinnihiyya nee dacrisak, Fursi-malik ni yab oggola num abte. Ku qariy yiddigilleh sugehiyya xisnuuy, akkel Yarusalaam kee Yuudâ-rasul amaanah xinna'gidih, akke nee ruubaamih taama too malikih gabat absisse.

Nacmiya 6:15

Kontom kee namma ayro taama abak sugnek lakal, Alul deqsita alsak labaatanna kee konoyhaytoh ayro, inkih tan gasoh xisnek gaba kalleh.