Ermiyaas 52:4 - NABUWWA KEE MALIKWA

⁴ Xidkiya edde dardaare sagalhaytô-sanatat Nabkadnessar deqsita malikiy Baabelon amoytah yenehiyya qaskarak tu cabe'kal, Yarusalaam gaaduh gexe. Too sanatak tabanhaytoh alsak tabanhaytoh ayro, Yarusalaam magaalah afa gufeeniih; magaalak irol megdebih edde gacan arac haysitta heeniih, sarrak, magaalal yan mari akah awqe waa innah, dariifat maro teetik xisen.

Ermiyaas 52:4 Referans Kwoze

Ermiyaas 39:1

Xidkiya Yuudak malik edde yekke sagalhaytô sanatak tabanhaytoh alsat, Baabelon-malik qaskarak elli haam luk Yarusalaam-magaalat qeebi aba'gidih maro teetit hee.

Zakariyya 8:19

«Sanatak fereyhaytooy, konoyhaytooy, malcinhayto kee tabanhaytoh alsat abtan soom, Yuudâ marah farcat kee rufto le ayroora akkeleeh; tassa axcuk qiid abetton. Tonna'mmay isin numma kee wagari kicna mara takkeenimi» iyye.

Ermiyaas 52:7

Too waqdi Baabelon-qaskar magaalat maroh yan gidaar boohayseenih. Sarra inkih tan qaskar magaalak afah kudde. Baabelon mari magaala marot abbaxuk suge'mmay, tohuh, magaalah addal sugte qaskar magaala barat cabeeniih, malik bustaanih gariik namma gasok fan-fan gacca 'yeenih gexen. Tokkeek Ordon weeqaytu fan beya gita gacen.

Ermiyaas 32:24

« ‹Baabelon-mari Yarusalaam-magaala yabbixe'gidih, tet gasoosat xakabuh coox kee xeet tittin bagul heen. Addal teetik yan mari carbi kee qulul kee dalkâ-gadda yekkeeniih, tohuk gexxaamah ellecabol Baabelon malikil gaba ecee'kal maraaqan. Tah atu inteemiiy; away akah table'nnah, atu inxicca elle inte'nnal tekkeh.

Yacedkel 21:22

Migdi gabat Yarusalaam 'yaanamih asta elle tan gaysê-baxa heele. Too waqdi, ‹Tet gidaarwa edde taggalu wayta gutqeyna bicisaay, qeebil tirtirisu waa mara bical hayisa. Culmeyna edde taggalu wayta gutqeyna xayyoosa. Ballaaqe tittak bagul hayisak eded bicisa. Megdebih edde gacan boodo bicisa› 'yaanam axcele.

Yasaqya 29:3

Yarusalaamat qeebi abeyyo. Maro teetit haysiiseyyooh, tokkeek qeebi teetit absiiseyyo.

Ermiyaas 34:1

Baabelon malikiy migaaqah Nabkadnessar deqsitak yenehiyya, isi qaskar kee usuk amol akak raqqa 'ya doolatwah qaskar haysitta heeh, Yarusalaam magaala kee tet dariifal tan magaaloolit qeebi abak yen saaku, YALLI Ermiyaasal qangara oobise. Kaak iyyeemih,

Yacedkel 26:8

Suur magaalak baddi afal raqtah tan mandarittel yan mari qeebit ambaxele. Nabkadnessar mari boodod dageleeh, bullaaqek megdebitte xiseloonuuh, eded bicselon. Gooba mangak gexxaamah siinik isinni dacrisak wadir sin biyaakelon.

Yacedkel 33:21

Seewah nee edde been taban kee nammahaytô sanatak tabanhaytoh alsak konoyhaytoh ayro, Yarusalaamak yoowweh yemeete num yol yemeeteeh, «Yarusalaam makko tekkeh» 'yaanam iyye.

Yacedkel 40:1

Seewah nee edde been labaatanna kee konoyhaytô sanat tikkaay, allî baaxoh mari Yarusalaam yibbixeemih taban kee fereyhaytô sanat tikka 'yeh, qusba sanat culeemih tabanhaytoh ayro tikka 'te saaku, YALLIH qande maqar luk yol gacteeh, too qande fayya yoo hayteeh yoo beyteh.

Ermiyaas 4:17

Cal uma awur yasguudeenim faxan waqdi, yabbixoonuh elle maraasiyan innal, Yarusalaam marot heelon. Yuudâ-marat toh akah takku waytam, yoo cineeniih yi amri cineenimih sabbata. Tah intam yoo YALLA.

Yacedkel 21:27

Baati temeeteh! Finqi yemeeteh! Ahaysa akah tani'nna bayseyyo. Takkay immay too baati, dardaarinnah doore num yamaatem fanah sugele. Usuk yamaatu waa saaku, too dardaarinna kay gabal heeyyo› 'yaanam iyya.