Ermiyaas 33:13 - NABUWWA KEE MALIKWA

¹³ Qaleela le rasul tan magaalooli kee, mango koomaami le baaxol tan magaalooli kee, Yuudâ-rasuk gabbi-qaxat raqta baaxol tan magaalooli kee, Benyam rasu kee Yarusalaam xaqul tan gaandoodi kee Yuudâ-magaaloolil, illit duwah yan mari edde yan illik yakkeh gide edde loowan wakti amaatele. Tahat yabtam yoo YALLA» 'yaanam iyye.

Ermiyaas 33:13 Referans Kwoze

Ermiyaas 17:26

Yuudâ-magaalooli kee Yarusalaam xaqul tan gaandoodi kee, Benyam rasu kee ayrô-culmat raqta mango koomaami le baaxo kee, qaleelâ xaqu kee gabbi-qaxat raqta Yuudah baaxok, ummat Yarusalaam fanah amaatelon. Cado akak carrisan lac kee akak carrise waan lac, sadgatah yi Qibaadah-Qarih baahelon. Tonnah kaadu, daro kee qaydarus sadgatah baahelon. Fayla yoh elle gacsan sadgat kaadu baahelon.

Ermiyaas 31:12

Siyon qaleh amol farcatah qililisak saare abelon. YALLI keenih yacayu waa niqmat assakootelon. Baaxo keenik darooy, qinabak bicsen kamriiy, *daytuun zeytiiy (saliidiiy), illi kee laak amaggele. Too barkat keenit heeleeh; tohum assakootelon. Leek nagay yefqen bustaanih ceelot gacelon. Tahak wadir cisabbootiyyi keenik gaba kalele.

Ermiyaas 32:15

YALLAY Nabaamak Nabah, Israayil doore Dagelta kinnihiyyaa, ‹Buxaaxi kee buqre-baaxo kee qinab xala coox elle yaabuke baaxo, wadir edde limmoysoonu waan wakti amaatele› 'yaanam iyyeh yan, kaak exce.

Ermiyaas 32:44

Ahak sarra tama baaxol sinam baqurê-baaxo limmoyseleeh; limo elle abbaasiten inni, sarra sumaq keenih yakke'gidih, waraakitil aktubelon. Too limo elle tekke inna kaadu sinam foocal abbaasitelon. Taham elle takku waytam, Benyam rasu kee Yarusalaam dariifal tan gaandoodi kee Yuudâ-rasul tan magaalooli kee, kaxxa qaleela kee mango koomaami le baaxol geytinta magaaloolih addal akkele. Yuudâ-rasuk gabbi-qaxat raqta magaaloolil kaadu toh akkele. Ahak sarra ken baaxoh ken gacseyyo. Tahat yabtam yoo YALLA» 'yaanam iyye.

Yacedkel 20:37

‹Gaba nagay digga siinil heeyyooh; yo'lih hayten bica akah duudussan innah siinik abeyyo.

Qobadya 1:20

Israayilik kilbat le kabul suge maray a saaku marin baaxol yanihiyya aduureleeh, Finiikiya deqsita rasuk Xarafat deqsita aracah amma 'yaanam fan tan baaxo, qeebit raaqiselon. Yarusalaamak been maray Sardis deqsitta magaalal yanihiyya, Yuudâ-baaxok gabbi-qaxat raqta magaalooli abbixelon.