Ermiyaas 29:18 - NABUWWA KEE MALIKWA

¹⁸ Carbi kee qulul kee dalkat qayyaawissa ken heeyyo. Kulli doolatay keenit tekkem tabalu waytahiyya inkih, taham waagissa heele. Fixixih ken elle abbixe baaxoy innih ken ruubehiyyal, taham akkih yable mari kaxxa wariggah wariggitele. Bursutan maray ilaq le ken abeyyo. Woo-marat tekkem siinit takkay axcuk, sinam abaaroh haysitan mara ken abeyyo.

Ermiyaas 29:18 Referans Kwoze

Ermiyaas 42:18

«YALLAY Nabaamak Nabah, Israayil doore Dagelta kinnihiyya iyyaamah: ‹Yi naqbi Yarusalaam maral akah oobe'nnah, uxih kaadu yi yab cinna heeh Masri gexu waa maral oobele. Woo marat tekkem net akke waytay akak iyyan mara akketton. Sinam titta abaarta waqdi, Woo marat tekkem siinit takkay akak iyyan mara akketton. Sahda bursutta mara akketton. A rasu ahak wadir matablan› siinik iyyeeh, YALLI tamah siinil gacseemi» keenik iyye.

Ermiyaas 15:4

Ciskiyyaahû-baxi Manasse, Yuudal malikih yen saaku abe umaanek gexxaamah, baadal enna 'ya mari anu siinil baahem yaabbu waa waqdi, kaxxa wariggah wariggitelon» 'yaanam yok iyye.

2 Aydaad 29:8

Tonna-leemiik YALLI, Yuuda kee Yarusalaam magaalah marat bagcarriteeh; usuk keenil baahem kulli numut axaxo kee cunxo qidde. Isin ahim digga haytan.

Ermiyaas 34:17

« ‹Tonna'mmay isin toh abteenik, hay, ta saaku, yooy YALLAH yani siinik axcemii: «Isinni mara ruubaay curri ken aba» siinik exce'mmay, yi yab cinteenih. Tahaysa isinnih dooritten curriyyat siinil ruubeyyo. Toh ma curriyyata inteenik, carbi kee dalka kee qulul rabtaana'gidih, siinil ruubu waa curriyyata. Baadal enna 'ya mari anu siinil baahem yaabbu waa waqdi, kaxxam wariggitele.

Ermiyaas 24:9

Baadal enna 'ya mari keenit tekkem yaabbu waa waqdi, kaxxa wariggah wariggitelon. Sinam elle tasuule mara ken abeyyo. Anu ken baadisu waa baaxol, sinam ken migaq xagak gersi mara bursutele. Titta abaara mari, «Woo marat tekkem siinit takkay» axcuk abaaroh ken haysiteloonuh, keenit tekkem missila akkele.

Yacedkel 12:15

«Ummat addat ken ruubu waah, aaxige waan marih fanat ken fixixisu waa saaku, YALLA kinniyom yok aaxigelon.

Ermiyaas 25:9

kilbatak sinam baaheyyooh, Baabelon malikiy migaaqah Nabkadnessar deqsitaah yi naqasuh yanihiyya siinit ruubeyyo. Ta mara bahha heeh, a baaxo kee a baaxol yan mara kee dariifal yan marat inkih ruubeyyo. Keenit tekkem yabalu waa mari hagga axcele. Buruten maray baaxot qideenihiyya ken abeyyo. Sarrah akak ugute waan baatih ken bayseyyo. Tahat yabtam yoo YALLA› iyye.

Yasaqya 65:15

Anu dooreeh meexe mari, ‹Umaaney woo marat tekke siinit takkay› 'yaanam axcuk ceelalloh sin haysitelon. Yoo YALLAY Mulki lehiyya sin qideyyooh, sin seleyyo. Yi naqoosay yoo takdumek migaq keenik korse liyo.

Zakariyya 7:14

Kaxxa caacay guddaafa duufut elle beya'nnal, ken baaxok eyyeqqa ken heeh, marin baaxo fan ken iskiliqe. Tonnal a xaqan le baaxo dibuk raqteeh, dibu tekkeeh; a saaku num teetil mayan» kaak iyye.

Qaamus 9:9

Israayil mara yanfiyen daroh innah ken anfiyeyyo. Marin marih addat ken fixixise waqdi, ken addak uma mara ayyaaqeyyo.

Yacedkel 36:19

Oson abak sugen umaane kee ken qamalal keenil mekle. Ummat addat baxacah ken ruubeeh, aaxige waan marih fanat ken fixixise.

Yacedkel 22:15

Ku mara fixixih marin baaxo kee aaxige waan marih addat baxciseyyo. Uma-taama koo cabsiiseyyo.

Yacedkel 6:8

«Seefik dago mari cattiimeleeh; too mari ummat kee mango baaxooxa fanat fixixele.

Ermiyaas 29:22

Sarra yan saaku Baabelon rasul yan maray seewah beenihiyya titta abaara waqdi, Acab kee Xidkiyay Baabelon-malik nuwwih girat qidsiisehiyyat tekkem kot takkay, 'yaanam abaaroh tittak axcelon.

Ermiyaas 26:6

ama qariy yi qibaadah xiseenihiyya Siiloh innah hayya heeyyo. A magaala foyya abba heeh; sarra teetit tekkem yubleeh yoobbe mari itta abaara waqdi, «Woo magaalat tekkem siinit takkay» axcuk, abaaroh tet haysitelon› 'yaanam keenik inxic» yok iyye.

Ermiyaas 19:8

Yarusalaam magaala kaxxa baatih bayseyyo. Tet yabalu waa mari teetik akah sakkitta 'ya biyaakah tet biyaakeyyo. Gari akak gaceh gexa mari, «A magaalat tekkem gibdiimih taniimi» akak inxicca 'yan baati teetit abeyyo.

Ermiyaas 27:8

Takkay immay usuk ta abbootan gabat lem fanah, doolat takkuu, faxe mara takku, usuk fillal siinik haa *madmad (kambar) oggole waah kay amri cinu waa mari yenek, too mara usuk seefit ken selam fan carbi kee qulul kee dalkat ken digaaleyyo.

Ermiyaas 29:17

Too marih tiyak yoo YALLAY Nabaamak Nabahiyya axcemii, Anu qeebi kee qulul kee dalka keenit ruubeyyo. Toome *sublâ-xayloy ankamme wayta ken abeyyo.

Ermiyaas 32:24

« ‹Baabelon-mari Yarusalaam-magaala yabbixe'gidih, tet gasoosat xakabuh coox kee xeet tittin bagul heen. Addal teetik yan mari carbi kee qulul kee dalkâ-gadda yekkeeniih, tohuk gexxaamah ellecabol Baabelon malikil gaba ecee'kal maraaqan. Tah atu inteemiiy; away akah table'nnah, atu inxicca elle inte'nnal tekkeh.

Ermiyaas 44:12

Yuudâ-marak isi rasul raaqeeh, sarrak Masri fan gexe maraw, too gexo baatih siinik orbelem ixiga. Nabam kee qunxam siinik Masril rabele. Qulul kee carbit ambaxetton. Yuble mari akak wariggitu waa embexih ambaxetton. Ummat ilaqtaah ces akak inta mara akketton.

Ermiyaas 44:22

A saaku sin baaxo abuuruh raqteeh num teetil mayanam matablaanaa? A saaku tet yable mari akak nadaamitah inna le. Titta abaara mari, ‹Woo magaaloolit tekkem siinit takkay› iyyaanaah, abaaroh tet haysiten. Toh akah tekkem maca siinit celtaah? Isin abak sugten makri kee uma-taamay YALLI xiqe waahiyya, tohuh, siinit tekkem ixiga.

Yacedkel 23:46

YALLAY Mulki lehiyya iyyeemih, «Cunxo keenit qiddu waytaah, ken buubtu wayta butta uguugusay keenit ruuba.

Miika 6:16

Tah akah takku waytam, Malik Qomri kee kay baxa Malik Acab abak sugte uma-taamah amo tibbixeenimih sabbata. Tohuk gexxaamah sin bayseyyo. Sahda inkih sin ilaaqele. Kulli baaxoh mari qunxa intit sin ablele» iyye.

Ermiyaas 18:16

A baaxo akak meysitan baaxo akkele. Teetit tekkem yabalu waa mari ken sabbatah tet burtele. Gitah teetik xaqu gaceh gexu waa mari ah yable waqdi wariggitele. Ahamal qagabsiteloonuuh, namma xabanal gaba hayya heenih ‹A baaxot tekkem, gibdiimik tanih tan!› axcelon.

Ermiyaas 24:10

Duma ken kaxxa abbobtih ecee baaxoy away oson elle yaniinihiyyal saabo cabba haanam fanah, way carbiiy, way qululuuy, way kaadu dalka keenit ruubak, sella ken heeyyo› 'yaanam yok iyye» iyye.

Yacedkel 5:15

«Yi naqabu kee bala siinil obtam yableeh anu sin digaalam yable mari, siinik sakkiteleeh; sahda bursuttaah anqaasah elle rabta mara akketton. Siinit tekkem gersi marah sarrah kas akkele.

Zakariyya 8:13

Yuuda kee Israayil maraw, duma yan saaku allî-baaxoh mari titta abaara waqdi, ‹Yuuda kee Israayil tibbixe bala sin tabbaxay› 'yaanam tittak axcuk sugen. Takkay immay a saaku tohuk sin cateyyo. Toh axcuk suge mari, ‹Yalli Yuuda kee Israayilit hee barkat siinit haay› akak inxicca iyyan barkat siinit heeyyo. Tonna kinnuk agiira takkeeniih meysi cabtaanam siinil tan» iyye.