Ermiyaas 27:9 - NABUWWA KEE MALIKWA

⁹ Tonna leemiik, ama nabuwwa kinnino iyya maray isin nabuwwah litoonuhiyya kee, sarra takku waytam soonoh nuble iyya mara kee, ginnili kee kalluwalle kee ramli-qida siinik intam maabbina. Baabelon malikih gubat magacina siinik iyyaana'mmay, toh moggolina.

Ermiyaas 27:9 Referans Kwoze

Ermiyaas 14:14

Too waqdi YALLI yok iyyemii, «Ama nabuwwa kinnino iyya mari sin lih edde yaabam diraaba. ‹Yalli nee ruube› 'yaanam siinik iyyaanaah, ‹Yalli wacyih woh nek iyye; ah nek iyye› iyyaana'mmay, toh diraaba. Anu ken maruubinniyo. ‹Wonnah yan saaku woh akkeleeh, ah akkele› axcuk keenih warsaanam tanim hinna. Isinni amok yeyyeeqeenih baahan yaaba.

Malaaki 3:5

YALLAY Nabaamak Nabahiyya iyyeemih, «Anu sin mekla'gidih sin adda amaateyyo. Amaate saaku baab abaah, dalwa abaah, diraabah sumaaqitaah, taamâ-marah cawal kalitaah, gubun kee qayxiixaa kee allî-baaxoh maray ken addal yanit xukkuta maral inkih ackumeyyo. Too mari inkih, yok meysite waa mara.

Ermiyaas 29:8

Toh lih kaadu siinik iyyaamah, ‹Yoo YALLAY Nabaamak Nabah, Israayil doore Dagelta kinnihiyya aylahu siinih akak kalam liyo. Toh macaay inteenik, ama nabuwwa-kinnino-iyya-mara kee, sarra takku waytam nanu naaxige iyya maray sin addal yanih yab maabbina. Ken yaabal maylahitina. Ama isin ken essertan soonoy oson nubleh iyyaanah hangi maacina.

Yasaqya 8:19

Takkay immay sahda, «Ramli qida mara kee kalluwalley tutuc intak xaagu aba» siinik intu wayta waqdi, isin, «Xaagu kalluwallek abtaanamak, Yallak macah abe waytan? Yan marih xaagu rabe marih roocik macah abtan?» 'yaanam keenik axcetton.

Miika 3:7

‹Sarra woh akkeleeh, ah akkele› iyya mari iyyeemit wacarriyele. Anu ken yab moggolaay, tohuk gexxaamah qawratak radelon» iyye.

Ermiyaas 23:32

Ummatey, anu siinik axcem ankacisa. Yok amaate wayte soono ‹Yallak nel temeete› iyyaah; anu keenik axce weem ‹Yalli nek iyye› iyya maray nabuwwa kinnino iyyak naqboytah yan Dagelta kinniyom yok ixiga. Ta mari isih edde yan mako hinna'mmay, ummat yok makot beyan. Akke waanaah gideh isinni haan. Ken rubtem yoo hinna. Farmoy keenil ruube mayyu. Ken kee oson bahneh iyyan farmo, ummatah xiqtam le farmo hinna. Tahat yabtam yoo YALLA kinni» 'yaanam iyye.

Ermiyaas 23:25

Qagseh, «Ama nabuwwa kinnino iyya mari edde yaaba yab aabbeeh, garci akak mayyu. ‹Aham Yalli soonol nee yuybullee› iyyan.

Ermiyaas 23:16

«Toh too tiya'mmay, Yarusalaam maraw, yoo YALLAY Nabaamak Nabahiyya siinik axcem liyo. Toh macaay inteenik, ama mari siinil yaceem numma makkalina. Deedaltam siinil yaceenim, gee waytaanam geettoonu siinik iyyan. Siinil yaceenim, isinni amok yeyyeeqen yaaba ikkal, anu keenik excem hinna.

Yoosuwa 13:22

Israayil mari qide marih addat ramli qidak suge Balqam deqsita num edde yen. Balqam abba Baqor deqsita numuk ten.

Zakariyya 10:2

Duyye kallactaanam tu matanfiqa. Faal qida mara tu esserten waqdi, too mari siinil yaceem diraaba. «Nuble soonoh maqna siinih warsennok aytikuma» siinik iyya mari kaadu yeceem deedalaay, sahda gitak makot beyan. Tohuk gexxaamah ummat, baye illih innah, finqat tan. Abbay ken miraacisa maloonuuy, edde yaniinim gadaamah adda.

Yacedkel 21:29

Tableenim deedala wacyi. Akkele intaanam diraaba ikkal takkem hinna. Umeynit kinniton; uma taama sinimi. Ellecabo digaala siinit takkuh, kabba 'teh tan. Filla siinik edde yargiqoonu waan seef yan.

Daaniyel 4:7

Too seecol faal-qidaay baab-abeenitiiy cutuk-beya kee ramli-qidak num raaqe'kal inkih temeete. Too waqdi anu uble soono keenih warseh immay, too soonoh maqna keenik num yoh warisu yeffereh.