Ermiyaas 20:4 - NABUWWA KEE MALIKWA

⁴ «YALLI, ‹Isi nabsi kee isi kataysisih nabsit cunxo qida num koo abeyyo› 'yaanam ku giddinaamak kok iyyeh yan. ‹Kaadu ku kataysis keenik naqboytiitih yan marih gabat rabeloonuuh; toh isi intih abletto. Yuudâ-mari inkih Baabelon-malikih gabat radele. Too malik carbit yibbixe marak garab seewah isi baaxo beele. Wohuk raqtem seefit selele.

Ermiyaas 20:4 Referans Kwoze

Ermiyaas 29:21

«Tonna'mmay YALLAY Nabaamak Nabah, Israayil doore Dagelta kinnihiyya, Kolaayah-Acab kee Maqseyaahû-Xidkiya deqsitta namma numih tiyak iyyaamah, ‹Oson siinil yaceenim diraabaay; YALLI nek iyye axcuk diraabat sin lih yaaban. A namma num, Malik-Nabkadnessar gabal ken heeyyo. Too malik siinik foocal xabba ken heeh ken qidele.

Ermiyaas 25:9

kilbatak sinam baaheyyooh, Baabelon malikiy migaaqah Nabkadnessar deqsitaah yi naqasuh yanihiyya siinit ruubeyyo. Ta mara bahha heeh, a baaxo kee a baaxol yan mara kee dariifal yan marat inkih ruubeyyo. Keenit tekkem yabalu waa mari hagga axcele. Buruten maray baaxot qideenihiyya ken abeyyo. Sarrah akak ugute waan baatih ken bayseyyo. Tahat yabtam yoo YALLA› iyye.

Ermiyaas 52:27

Ribla deqsita arac elle geytimam, Camat rasu. Tokke ken baahen saaku, malik ken qidsiiseh. Yuudâ mara seewah elle beenim tonnak ten.

Ermiyaas 19:15

Keenik excemii, «YALLAY Nabaamak Nabah, Israayil doore Dagelta kinnihiyya siinik iyyam ankacisa. ‹A magaala kee teetil yan maraay tet dariifal tan magaaloolil yan maral, duma siinil oobiseyyo exce balak tu macabay siinil oobiseyyo. Keenil akah oobisu waam, yi yab aabbe waah aba keenik excem abe waa mara yekkeeniih; tohuk gexxaamah, bala siinil ruubeyyo› siinik iyyah yan» keenik exce.

Ermiyaas 6:25

Barri genxu manalliila; gitittel ibah genxam kaadu manalliila. Macaay inteenik, ni naqboytit silac leeh, kulli ikkel nee meysiisaanaah marot nee yabbixen» iyyen.

2 Malikwa 25:7

Xaylo kaak foocal elle yusguudek lakal, «Kaak namma inti eyyeeqa» iyyeh; yeyyeeqeenih. Sarrak nacaasak bicsen silsilat kaal hayya heeh, Baabelon fan seewah kaa bee.

1 Samuwel 2:33

Kok rade marak inki baxay yoo yakdumu waahiyya sugeleeh; takkay immay inti weeleeh, niya kaak addigillele. Kok rade mari inkih uma rabah rabele.

Ermiyaas 13:10

Oson umeynitiiy, amri yok cineenih. Yi yab aabbe waa maray isinnih faxam aba yekken. Sinam Yallih aftok taqbude tumamme, too marak kaxxih, yaqbude mara yekkeeni'mmay, tahak wadir tama saroh innah, hebeltô-tu'xiq-sinni-maray baaxot radehiyya ken abeyyo.

Ermiyaas 13:19

Yuudâ-magaalooliy gabbi-qaxat raqtahiyya marot heen. Tokke fanah edde yamaaten gita mageyan. Yuudâ-mara yakkeenimiik seewah beenih› yok iyye» iyye.

Ermiyaas 20:6

Too saaku koo kee ku kataysiisiy, atu sirrih woh ubleeh ah akkele akak axcuk sugtehiyya, Baabelon baaxo fan beeloonuuh; sarra tokkel rabetton. Magaq tokkel siinik akkele. Kok buxah marih agantah tonnal akkele› kok iyye» kaak exce.

Ermiyaas 46:5

Takkay immay afak toh iyyaanamah, cunxoh wadir-wadir aduurih ken able. Qeebil gacah ken able; cunxoh kaxxam aawwih ken able. Quuruuk foocah yardeenimik sah, wadirih mawagtan.

Ermiyaas 52:24

Qaskar abbah yen Nabudardan, wohuk kalah, Seraaya deqsita kaxxa sek kee, Seraayal kataata nammeyhaytô-seekiy migaaqah Xafanya deqsitahiyya kee, Yallih Qibaadah-Qarih afal dacayrih tan qaskarih sidoc kee,