Ermiyaas 2:7 - NABUWWA KEE MALIKWA

⁷ Tokkeek niqmatah tan baaxoy kudaar kee buqre elle aboonu waanahiyya fan ken baahe. Takkay immay yi baaxoy siinih eceehiyya caraamu yok abten. Baaxo yok wasak abten.

Ermiyaas 2:7 Referans Kwoze

Ermiyaas 16:18

Oson aban uma-taama kee dambil namma addah taduure digaalah ken digaaleyyo. Macaay inteenik, baaxol yok umâ-yabulih-tan-duyyey rooci sinnihiyyat wasak aben. Woo duyye yalla axcuk yaqbuden» iyye.

Yacedkel 36:17

«Bani-adantow, Israayil mari isi baaxol suge saaku, ken qamal kee ken uma-taama a baaxo nadaasa abte. Ken qamal yi garil wasaktuk taahirroowe wayte barrah gide yol luk suge.

Ermiyaas 3:9

Too uma-taamay abaanahiyyat mawacarriyinnon. Xeet kee coox qibaadat gaceeniih baaxo caraamu aben.

Ermiyaas 3:1

YALLI siinik iyyamaa, «Num gennaaqoytay cabehiyyay marin mari elle digibehiyyal wadir elle digbam maay duuda? Toh bictam hinnaay, elle tekke baaxo kinni way nadaasa takke. Isin tonnah kaadu mango kacnoytit haysitteenik sarra, away yol taduureenim faxxan!

Miika 2:10

«Tonna'mmay ahaysa a baaxol amaan mageytaanak, ugutay gexa. Isin abtan dambi a baaxo bayseh.

Yacedkel 20:6

Tohuk lakal, ‹Masrik eyyeqqa sin heeh, woo elle sugten baaxok tayse baaxoy niqmatak tanihiyyay ikoytah siinih acayu waahiyya fan sin beeyyo'mmay,

Nacmiya 9:25

Maroh gaso edde tan magaalooli yibbixen. Rob elle radaah kullim elle taabuke baaxo kee kullim addal akak tan qarwa keenik raaqisen. Lee edde raaqisan boodooda kee, *daytuun xala coox kee, qinab xala coox kee, kalah yan caxâ-miru xala coox keenik raaqisen. Isinnih faxxa haanam yokmeenih, ariiqo baahen. Atu keenih ucuyya hayte maqaanek inkih cayyen.

Ermiyaas 3:2

Qaleelah amo wagga haytan waqdi ta qaleelah amok isin xiiqareh-xiinah innah uma-taama elle abe waytan arac maay yan? Mayan. Qarabtoyti bacarih tan baaxol duyye bukkusa'gidih, safarat yan marih mamaata elle assexeeruk suga innal, isin kaadu dalwah abittoh assexeeruk sugtan. Uma-taamat baaxo nadaasa abten.

Ermiyaas 32:23

Takkay immay a baaxo guffu heenih teetil dabaaqah gaceenik wadir, ku yab kassitak maraaqinnon. Atu keenik aba intem kee keenik akah xiina inte xinto cineenih. Aba inteh ken akah amrisseemik tu aboonu cineenih. Tonna leemiik a bala keenil oobisse.

Ermiyaas 32:30

Israayil kee Yuudâ-marih abto, yoo ruffu hayte saaku mali. Ken taama fiiruk geerah bagi-cararow yol tekkeh tan. Tahat yabtam yoo YALLA.

Yacedkel 20:28

Duma ken abbobtih cule xagana duudusa'gidih, woo ikoytah keenih aceeyyo exce baaxo fan ken bee. Takkay immay too baaxol qale able kee ayyuufa le caxa yablen waqdi, tokkel sadgat abaanam baahen. Qaydarus qeeriseeniih, qinabak bicsen kamri kaadu woo aroocal sadgatah baahen. Tonnah abak bagcarra yot culsen.

Hosiqa 9:3

Israayil mari a YALLIH rasul maraaqay, ahak sarra Masri fanah aduurelon. Assuuriyal caraamak tan maaqoh gacelon.

Nacmiya 9:26

«Tohuh, ku mari ku yab cineeh, koo cineh. Atu aba keenik inteemit darre caben. ‹Aham maabina, meqem hinnak› keenik inte nabuwwa qideenih. Too nabuwwa toh keenik akah intem, oson kol yaduureeni'gidi. Koo ceele sinni migaq koh aben.

Yasaqya 19:25

YALLAY Nabaamak Nabahiyya barkat keenit heeleeh, keenik iyyu waamah, «Masri maraw, yi mara kinnitoonuuh; Assuuriyah maraw, yi gabah taama kinniton. Israayil maraw, isin kaadu yi ikoyta kinniton» keenik axceleeh, barkat keenit heele.

Yacedkel 20:24

Toh akah abem, yi madqa cinak sugeeniih, yi amri maaqilak sugen. Sabti ayroy mataamitina keenik exce, taamitak sugen. Ken abbobti aqbuduk sugte xeet kee cooxuk bicsen duyyeh qibaadat gacen.

Yacedkel 23:35

Yoo YALLAY Mulki lehiyya kaadu axceemih, «Yoo hawwenteeh darre yot cabteemih sabbatah, ama litoh tan sammô-xagit kee abtah tan dalwak gexxaamah, biyak kol oobele» iyye.