Titus 2:3 - Nouveau Testament en Ngienboum

³ Á gíŋ ńgwɔ́ pɔ́ ndʉŋ ndʉŋ pá’ ɔ̀ ge gɔɔn lé pànzwě pie é zẅǐŋ ngie pɔ́ gẅiin mà gẅie à poŋ Ssé, ngie tà pɔ́ shwóŋte nà mezíŋ pʉ̀a, ńgie tà pɔ́ ma’ mbùm yɔb nà melù’. Á zɛ́te ngie pɔ́ nyɛɛ mà mbòŋo,

Titus 2:3 Referans Kwoze

Titus 2:4

ńzsé ngie pɔ́ ge nyɛ pànzwě pie é nyé ńzɔ́’ɔ pá’ wɛ̌wɛ̌ wɔ́ à ge kwoŋo ndǔm we mbɔɔ penkʉ́ pé,

1 Timote 3:11

Á gíŋe ńzɛ́te ngie pànzwě pɔ́b gíŋe ńgẅiin mekù’, pɔ́ le gwɔ́ ngàŋ melɔ̀ɔn wɔ́, pɔ́ légÿo tsɔ́ mmó tà á cʉa wɔ́, ńgwɔ́ pʉ̀a pie à lɔɔn ńgwɔ́ pɔ́ gÿo kɔ̀ɔkɔ́ɔ gie mé cʉmé mbwo pɔ́b tà mé le lɔ̌’ mǒ gyá.

Titus 1:7

Pá’ nyìŋ gẅie à líe cú’tè pʉ̀a Kristo, à fa’a pɔ́ mefà’ Ssé la, á té zɛ́te ngie à gwɔ́ nyìŋ gẅie mé kíme yé té poŋ wɔ́. Tà á ńnéŋe ńgwag pʉ̀a, tà á ńnéŋe ńgyáŋa lóŋ, tà á ma’ mbùm yé nà melù’, tà á ńnéŋe sá’ pɔ́ mbʉ̀’, tà á lɔgɔ gate fa’ nkáb.

1 Timote 3:8

Á gíŋe ńzɛ́te ngie pàfa’ mefà’ tsɛ̀ɛ cú’tè pʉ̀a Kristo gwɔ́ yɔ́b pʉ̀a pie é gẅiin mekù’, ńgwɔ́ pàshwóŋó nò nénʉ́, ńgwɔ́ pʉ̀a pie é té ma’ mbùm yɔb ná melù’ wɔ́, ńké le gwɔ́ pʉ̀a pie é kwoŋ nkáb ńgáte gaté wɔ́.

Roma 16:2

Pi lɔg lezíŋ Cʉ̀apʉ̀a ńkúe yé nà ntí gie pʉ̀a Kristo gẅiin lékúe nyìŋ pú’u. Pi tyé pá’ yɛ̌ nò wɔ́ lɔɔn ńcʉa yé, tà á ga’te mbwo pi, pi kẅéte yé mǒ. Kwà’ yé léen ńkẅéte pʉ̀a tɛ’, ńgíŋ ńkẅéte wɔ̀ɔn yɔ́ɔn.

Efeso 5:3

Pá’ pi ee fʉ̀’ɔɔn ńgwɔ́ pʉ̀a Ssé la, tsɔ́ shúm ée sie á té zɛ́te ngie nyìŋ gẅi gÿo wɔ́, ńgíŋ tè zɛ́te ngie me zɔɔn ńkím mbàa kǐm tsetsɛ̀ɛ pi wɔ́, mé gɔɔn nò pá’ mbàŋa létóŋ pànzwě, épànzwě léfa’ mbàŋa, á mmó pá’ menò ncÿǒ mbɔɔ nò kègɔ́’.

Ŋwà’ne Ngyà jʉ’ 2:20

Tá’, mèŋ n ké ńne ńda’a gẅí, á nue Jizabel aa lejʉ́ŋ pi, pi zẅíŋe zẅǐŋ. Mánzwě áwɛ̌ ne shwóŋó pʉ̀a ngie à tsẅii nkʉ̀ gẅie éfóo mbwo Ssé, ńdɔgɔ pú’u, éfʉte ngàŋa fà’ yɔ́ɔn, ńne ńzí’i wɔ́b pá’ mbàŋa lâ pànzwě tsetsɛ̀ɛ pɔ́b lɔɔn ńkẅɛ́te wɔ̌wɔ́ɔ pâ pɔ̌ nuŋe nuŋe, mbɔɔ lépfɛ́ɛ pfwɔ́’ɔ mbab gie mé lɔ̌g ńgwá’ messé.

Heber 5:12

Pi kɔ’ɔ́ gwɔ́ nà fʉ̀’ɔɔn é cʉ́’ gwɔ́ pɔ́ pàzí’i pʉ̀a nò Ssé tá’, pi giŋé ńne ńtsɔ́ɔn ngie mé gíŋe ńzí’i gẅi menò mie mé zyé mǒ lézí’i nyìŋ nò Ssé. Á gwɔ́ wɔ̌ tà pi nyé ńtsɔ́ɔn pɔ́ lepʉ́, tá mbà pi kɔ’ɔ́ cʉ́’ tsɔ́ɔn pɔ́ mmó léjÿó gie á ne ńtʉte.

1 Timote 5:23

Tè gíŋe ńnú pɔ́ ndà’ ntse. Núu méjʉ’ʉ melù’, ńtí lepfòm shú sie ée ńgwá ńgege gú lɛ.

Roma 1:29

Menò mie Ssé tè ne ńkwoŋo wɔ́ pú ńjÿó wɔ́b, pɔ́ gÿo menò tepòŋ, ńgẅiin kègɔ́’, ńgwɔ́ pʉ̀a ńcÿɔ́g cÿɔ́g, légyá mmó nyìŋ ńkwɔ́’ɔ lóŋ mǒ pú ńjÿó wɔ́b, pɔ́ zẅéte pʉ̀a, ńnéŋe ńtág pɔ́ melà’, ńgẅiin fʉte, akɔ́ sá’a twó pɔ́b gwɔ́ pɔ́ gÿo gÿo, ńzáb menò twó pʉ̀a,