Ŋwà’ne Jâŋ 17:12 - Nouveau Testament en Ngienboum

¹² Á kaa fʉ̀’ gie peg lâ pɔ́ ka gwɔ̌, mèŋ n ne ńdɔgɔ metʉ̀ mú, é metʉ̀ mie ɔ̀ la náa mbwo mèŋ la, ḿbyɛ́bɛ wɔ́b. N ka tÿɔ́’te wɔ́b tà tsɔ̌ tà’ nyìŋ ná pɔ́b tè pyé. Nyìŋ gẅie á la ne ńzɛ́te ngie à pyé zɔ ká pyě. Á lɔgɔ ḿbumte nà nò gie mé la ŋwe’e tsɛ̀ɛ ŋwà’ne Ssé.

Ŋwà’ne Jâŋ 17:12 Referans Kwoze

Ŋwà’ne Jâŋ 18:9

Á laa pú’u, ashwóŋè gie Yěsô ně ńgɔɔn mbwo Ssé lɔgɔ ḿbumte. À ně ńgɔɔn ngie: Atsɔ̌ tà’ ná pʉ̀a pie ɔ̀ la náa mbwo mèŋ la, kaa pyé.

Ŋwà’ne Jâŋ 13:18

Mèŋ n kě tě ńgɔɔn yɔɔn nò mbwo pi metsèm wɔ́, mèŋ n ne ńzsé pʉ̀a pie mèŋ n da tsɔ́’ɔ wɔ́b. Tá á poŋ ngie ammó gie mé la ŋwe’e tsɛ̀ɛ ŋwà’ne Ssé à pumte. Mé la ŋwe’e ngie nyìŋ gẅie peg yé né ńteme shúm léjÿó ńjÿó kéen ńcʉ́’ʉ ngàŋ mbù wɔ̀ɔn.

Ŋwà’ne Jâŋ 6:37

Awɔ̌wɔ́ɔ gẅie Tá wɔ̀ɔn nǎ mbwo mèŋ wɔ́, à ge tó tsɛ́ɛ wɔ̀ɔn. M biŋ ńké le lá’a tsɔ́ lyɛ̌’ ńkẅile nyìŋ gẅie à tǒ ńtsɛ́ɛ wɔ̀ɔn, ńnáa pǐ wɔ́.

1 Jâŋ 2:19

Megàŋ mbù fǒ pɔ́ tsɛ̀ɛ cú’tè yégè ńkẅɛ ńgʉa. Pɔ́ ka zɔ̌ɔn tè pʉ̀a pégè wɔ́. Pɔ́ kaa pé’è ńgwɔ́ pʉ̀a pege, mbà pɔ́ ka zso tsetsɛ̀ɛ pege. Tá’, á ka kě ḿboŋ ngie à kẅɛ pɔ́ pú’u, ná pɔ́b, áwɔ̌wɔ́ɔ gyá ngie pɔ́ ka tè pʉ̀a pege wɔ́,

Megàŋ ntúm 1:25

Wɛ̌ nyìŋ cʉ́’ʉ ngàŋ ntúm Yěsô, ńtyé nà jʉ’ gie Jẅidas kaa wó tá ńgwá’ ńgʉa né yé jʉ’ la.

2 Tesalonika 2:3

Tà pi zẅíŋ nyìŋ fʉte gẅí, kà pɔ́ nê yɛ̌ ntí wɔ́. Yɛ̌ lyɛ’ɛ́ lá’ té lá’ tó té gwɔ́ gie etsɔ̌ ntí menò vɔ̌g ńcʉate wɔ́. Á lɔgɔ ńgwɔ́ pá’ pʉ̀a tá ńgyɔɔn ge lá’ lʉ’ʉ lé jú’ ncwò Ssé. Fùɔ menò tepòŋ kẅɛ ńtyé tá yɛ̌ lyɛ’ɛ́ lá’ lêen ńké ńtó. Á yé wá gẅie mé ge lá’ ma’a yé tsɛ̀ɛ mmɔ̌g la.

Heber 2:13

Ńgíŋe ńgɔɔn ngie: Mèŋ n ge záb ntʉ́m wɔ̀ɔn nà Ssé. ńgíŋe ńgɔɔn ngie: Wɔ́ɔn wɔɔn, mbà pega gubé gie e Ssé la náa wɔ́b né mèŋ tǒ.

Ŋwà’ne Jâŋ 17:6

Ɔ̀ la fóo tsɛ̀ɛ njÿó, éfag pʉ̀a mesoŋ, ńnáa mbwo mèŋ, mèŋ n ka zí’i wɔ́b lézsé nyìŋ gẅie ɔ́ɔ wɛ̌. Pɔ́ laa pʉ̀a pú, ɔ̀ piŋ náa wɔ́b mbwo mèŋ. Pɔ́ kéen ńké ńjú’u shwóŋó jú, ńkú’te.

Filipo 2:9

Áa mmó gie á la gÿo tá e Ssé ńnéŋe yé jʉ’e lÿò, ńná lezíŋ sie é cʉa mezíŋ ntsèm né yé,

Ŋwà’ne Ngyà jʉ’ 19:12

Enÿɔ́g mé kyɛ’ jʉ’ pá’ lʉ́me mmɔ̌g la, á tɔ́’ mecÿɔ́’ɔ lefùɔ tà é gyɔ́ɔn gyɔ̌ɔn, mbà mé ŋwe’é tsɔ́ lezíŋ ná yé, ésie tsɔ̌ nyìŋ tè zsé mmó gie é lɔgɔ ńgɔɔn wɔ́ tà ndí ndà’ yé.