Heber 2:8 - Nouveau Testament en Ngienboum

⁸ Ɔ̀ la lɔgɔ yé ńgÿo nyìŋ gẅie à sá’a shúm ntsèm sie ɔ̀ la nyɛte, ńgÿo ngie kɔ̀ɔkɔ́ɔ à jú’ ncwò wé. E Ssé la gwaa ye à kɔ̀ɔkɔ́ɔ jú’ ncwò nyìŋ mesoŋ pá’ɔɔn à těen ńgɔɔn ńtsẅe tsɔ́ gie á ge nyé té jú’ ncwò wé wɔ́. Á ké ńgwɔ́ fʉ̀’ɔɔn pá’ɔɔn, pege tè ne ńgyá ngie shúm ntsèm ne ńjú’u ncwò nyìŋ mesoŋ ŋwɛ́ wɔ́.

Heber 2:8 Referans Kwoze

Ŋwà’ne Jâŋ 13:3

Yěsô ne ńzsé ngie Tá we la pú ńnéŋ shúm ntsèm mbwo yé, ńgíŋe ne ńzsé ngie à la fó mbwo Ssé, à piŋ ne ńgee né lejʉ́ŋ Ssé.

1 Korento 15:27

Á zɔ́ɔn ńgwɔ́ tsɛ̀ɛ ŋwà’ne Ssé, e Ssé gɔɔn ngie: «Yé Léen ḿbú ńdɔgɔ kɔ̀ɔkɔ́ɔ wɔ́ ńgÿo ntÿɔgɔ́ mekwò Kristo». E Ssé gɔɔn pú’u, pá’ɔɔn, á té ńdɔgɔ ńgwɔ́ ngie yé Ssé ge lá’ gwɔ́ nà mbwo Kristo wɔ́, á nue e Ssé zɔ zɔɔn ńnáa metʉ̀ né Kristo tá á lɔgɔ sá’a kɔ̀ɔkɔ́ɔ.

1 Piɛ 3:22

À la kwɔ́’ né tÿǒ lepwó, ńnéŋe nà gwǒŋo pwó Ssé ye tʉ̀. Àa fʉ̀’ɔɔn ńne sá’a *mecÿɔ́’ Ssé ntsèm, ńne sá’a kɔ̀ɔkɔ́ɔ gie á sá’a njÿó, ésá’a metʉ̀ ntsèm mie ée tÿǒ.

Ŋwà’ne Ngyà jʉ’ 1:18

Mèŋ n gee nyìŋ gẅie à gÿo mé gwɔ́ wó. N da kwé, tá mèŋ n gee fʉ̀’ɔɔn ńgwɔ́ wó, é ké lá’a gwɔ́ pɔ́ wó. Mèŋ n gẅiin metsɔ́’ɔ kí, mie é náa wɔ̀ɔn metʉ̀ lélɔg ńjÿɔ́’ɔ jʉ’ gie mepfó ée wó, kà pɔ́ lélɔg ńtsɔ́’ éfó wó ńkẅile pʉ̀a wɔ́.

Heber 1:13

E Ssé laa zɔɔn ńgɔɔn nê tsɔ̌ cÿɔ́’ we ngie: Tóo ńnéŋe nà gwoŋó pwó yɔ́ɔn ye tʉ̀ ńzẅí’te mèŋ n dɔg megàŋ mbù pú, ńgÿo ntÿɔgɔ́ mekwò mú wɔ́?

Ŋwà’ne Ngyà jʉ’ 1:5

Yěsô Kristo gẅie aa njÿò ńgyá we nénʉ́, ńgwɔ́ ndùŋ mvfò múɔ, ńgwɔ́ ndùŋ mvfò nyìŋ gẅie à la kwé ḿbiŋ ńzím, ńgwɔ́ Fùɔ cʉa mefùɔ pie ée ndùmo ssé tsetsá’, á gíŋe ńne ńgwɔ́ né pi, ńgíŋe ńne ńnéŋe sẅétè ntʉ́m pi. Yé Kristo kwoŋo wégè tɛ’, à la lɔg metse mé ńkyɛ́’ nkÿo menò tepòŋ ná pege.

Heber 2:5

E Ssé la zɔɔn tè gÿo ngie mecÿɔ́’ pé gẅiin nò ná lesǎ’ ngwòŋ gẅie é ne ńtóo wɔ́, é ngwòŋ gẅie pege ne ńgɔɔn nò mǒ.

Ŋwà’ne Jâŋ 3:35

E Ssé Tá kwoŋo Míŋ we, mbà à léen ńnéŋ shúm ntsèm á nà lɔ̌ɔn pwó Míŋ we.

Matio 28:18

Yěsô tóo lejʉ́ŋ pɔ́b, ńgɔɔn né pɔ́b ngie: E Ssé leen ńná tʉ̀ ntsèm né mèŋ lélɔg sá’ shúm sie ée tÿǒ lepwó mbɔɔ sie ée ndùmo ssé tsetsá’.

Heber 1:2

Á kéen ńgwɔ́ nà yégè kème njÿó yɔɔn gie á cʉ́’ ńgwɔ́ pɔ́ ye lɔg ńzsote, á gɔɔn nò né pege, ńgwɔ gɔɔn, ńcʉa pɔ́ ná Míŋ we. Á gwɔ́ yé gẅie à la cʉa ná yé, ńnyɛte njÿó ntsèm, ḿbiŋ ńgíŋ ńzába yé pá’ kɔ̀ɔkɔ́ɔ ge lá’ gwɔ́ pɔ́ yé.