Efeso 2:18 - Nouveau Testament en Ngienboum

¹⁸ Pú’u, pi tà mbɔɔ peg pà Yuda cʉa pɔ́ ná yé Kristo, ńgee lejʉ́ŋ Ssé Tá, tà’ Zẅìge Ndʉalʉ̌a wémɔ’ɔ́ zɔ ké ńkẅéte wégè.

Efeso 2:18 Referans Kwoze

Efeso 3:12

Pá’ pege la nnɛ́, ḿbiŋ ńzáb ntʉ́m ná yé Kristo la, pege gẅiin pá’ ńgwɔ́ pege gʉa lejʉ́ŋ Ssé tà tsɔ́ mmó le wégè táte, pege ké le pɔ́g.

1 Korento 12:13

Á nue e Ssé la lɔgɔ tà’ Zẅìge wémɔ’ɔ́ ḿbú ńtemte wégè metsèm légwɔ́ gie pege ge lɔg pú’u, é gwɔ́ tà’ mbùm nnɛ́, epʉ̀a lɔɔn ńgwɔ́ pɔ́ pà Yuda, kà pɔ́ pʉ̀a pie é té pà Yuda wɔ́ wɔ́, ńgwɔ́ pɔ́ menkwɔɔn kà púɔ lá’ gwɔ́, mbà Ssé la pú ńnéŋe tà’ Zẅìge wémɔ’ɔ́ á ntʉ́m pege pɔ́ metsèm.

Roma 5:2

Yé Yěsô zɔ la tsɔ́’ɔ mánzsè tá Ssé cÿó gem yégè pá’ɔɔn, ta à cʉ̌’ ńgwaa ńgwɔ́ pɔ́ né pégè pú’u éfó nà pá’ pege zǎb ntʉ́m ná yé Yěsô. Pege ee pá’ɔɔn lékag gwɔ́ ntʉ́m pege tɛ’, á nue pege neŋé ne ńzẅí’te pá’ Ssé ge gÿo gab shúm sie ée nà legú’ we, é ná ségè.

Efeso 4:4

Mbùm nnɛ́ Kristo ee yémɔ’ɔ́, a Zẅìge ndʉalʉ̌a gwɔ́ yémɔ’ɔ́ ndʉŋ ndʉŋ pá’ mmó gie e Ssé la tóŋo gẅí, pi ne ńzẅí’te á gwɔ́ pɔ́ yémɔ’ɔ́.

Ŋwà’ne Jâŋ 14:6

Yěsô tsɔ́’ɔ mbwo yé ngie: Mèŋ n ge mánzsè, mèŋ n ge nò nénʉ́, mèŋ n ge legwɔ̌ wó. À lɔɔn ńgwɔ́ nyìŋ á le gʉa mvfò Tá wɔ̀ɔn té cʉa pɔ́ ná mèŋ wɔ́.

Ŋwà’ne Jâŋ 10:9

Ncwò nká’ à gwɔ́ pɔ́ mèŋ, nyìŋ lɔɔn ḿpfó ná mèŋ ńkúu nká’, mbà ngàŋ ge gÿo tsẅɛ́. À ge ne kúu nká’, é kẅɛɛ pá’ à kwǒŋ, éfa’a mmó mpfɛ̌.

Ŋwà’ne Jâŋ 10:7

Yěsô gíŋe ńgɔɔn mbwo pɔ́b ngie: Tà mèŋ shwóŋó gẅí, kwà’ nénʉ́, ncwò nká’ menjʉ̀njyò à gwɔ́ pɔ́ mèŋ.

Kolosia 1:12

Pi lɔgɔ lekág ésíe Ssé gẅie aa Tá wege, yé gẅie à la gÿo pi ku’u légẅiin gí mmó nà tÿɔgɔ́ gẅie à la ka’a mbwo pʉ̀a pé. Wɛ̌ tÿɔgɔ́ ée nà jʉ’e kyɛ̀’.

Galatia 4:6

Áa nénʉ́ pi ee kwa’ púɔ Ssé. Aliŋé áa pá’ Ssé la ńnéŋe Zẅìge Míŋ we tsɛ̀ɛ mentʉ́m mégè, á Zẅìge gie á gÿo pege tóŋo Ssé le Abba. Á lɔgɔ ńgɔɔn ngie Tá wɔɔn.

Roma 8:15

A Zẅìge gie mé la ńnéŋe ná pi, zɔɔn tè Zẅìge gie á ge gÿo pi gíŋe ńgwɔ́ pɔ́ menkwɔɔn pie pɔ́ ge ne cÿɔ’ɔ cÿɔ’ wɔ́. Á gwɔ́ pɔ́ Zẅìge gie á ge gÿo pi cʉ́’ púɔ Ssé. Pege piŋ ńzẅɛ́’ɛ yɛ̌ Zẅìge, ńtóŋo yé lê Abba; á gwɔ́ ngie Tɔ̌ɔnmé.

1 Piɛ 3:18

Kristo la zɔɔn ńgyá yé ngɔ́’ tà ńkwé lélɔg ńzyɛ́b menò tepòŋ pʉ̀a mesoŋ, ńké ńkwé ndà’ tà’ legʉ̀a, á ku’. Yé tè fʉa kwé ńtí ngàŋ mefʉa, pú’u, lélɔgɔ gẅi ńtóo mvfò Ssé. Mé la zẅé mbab nnɛ́ ye, tá Zẅìge Ndʉalʉ̌a gÿo á gíŋe ńgwɔ́ wó.

Efeso 6:18

Pi gwɔ́ fʉ̀’ ntsèm ńne ńtsyɛ’te Ssé, ńgíŋe ne sẅíŋte yé nà mentí ntsèm, pá’ Zẅìge ge ne nyɛɛ gẅi ngie pi gÿo pú’u. Tà pi gwá’a lÿɔ̀g, pi sẅíŋte Ssé nà twó pʉ̀a Ssé métsèm.

1 Korento 8:6

tá á ké ńgwɔ́ mbwo pege, tà’ Ssé wémɔ’ɔ́ nzɔ̌ wɔ́ wó, ńgwɔ́ Tá gẅie kɔ̀ɔkɔ́ɔ fóo pɔ́ mbwo yé. Pege piŋ ńgwɔ́ wó ńtí pɔ́ ye. Tà’ Cʉ̀apʉ̀a gwɔ́ wó ńgwɔ́ Yěsô Kristo gẅie à kɔ̀ɔkɔ́ɔ gwaa gwɔ́ wó wɔ́ɔ yé zɔ̌ gÿo. Pege piŋ ńgwaa gwɔ́ wó ńzẅɛ́’ɛ pɔ́ ye.

Heber 7:19

Pú’u á nue *lepʉ̌ Mǒsê la tè gÿo tà tsɔ́ mmó ku’ ná ntí gie e Ssé ne ńkwoŋo wɔ́. Áa fʉ̀’ɔɔn, mbà Ssé la tsɔ́’ nzsè sẅé, nkwaŋá wégè ńnéŋe fʉ̀’ɔɔn ńcʉ́’ ńtyé pɔ́ mǒ. Ee mbòŋ ńcʉa yetsɔ́, á nue pege pfó mǒ ńgʉa tà ńkúu lejʉ́ŋ Ssé.

Efeso 3:14

Áa mmó gie á gÿo mèŋ n kẅí’te mvfò Ssé Tá

Jẅide 1:20

Tá ńgʉa ná pi, mbà meshǔ pɔ́ɔn pe tʉ̀ nzẅìŋ, pi kẅi’i ńtʉte tʉte, ńne ńkú’te mmó gie pi la záb ntʉ́m gẅi mǒ. Yɛ̌ zɔ̌ cÿó gie gẅi leńnéŋe tyé mǒ. Pi tóŋo Zẅìge Ndʉalʉ̌a, à lɔg metʉ̀ mé ńkẅéte gẅí lésẅíŋte Ssé.

1 Piɛ 1:21

Pi zẅɛ́’ɛ pɔ́ yé tá ńzába ntʉ́m nà Ssé gẅie à la zíme yé nà legwé, mbɔɔ pá’ à la náa yé legú’, tà pi gwaa záb ntʉ́m nà Ssé, é piŋ ne pyɛ́bɛ mmó gie Ssé ka’a, yé zɔ̌ gÿo.

1 Piɛ 1:17

Pi gʉa fʉ̀’ ntsèm gie pi ne sẅíŋte Ssé, pi tóŋ Ssé lê Tá gẅi, pú’u la, pi lɔg melyɛ’ɛ́ lá’ mie pi nyě ńgẅiin tsɛ̀ɛ yɔɔn njÿó, ńnyɛɛ tsɛ̀ɛ gẅi leńnéŋe ngie pi ne ńnáa mekù’ mé. Aa nyìŋ gẅie à zá’ ntsaŋ pʉ̀a mesoŋ té gẅiin tyɛ̀’te, éfó pɔ́ nà mmó gie nyìŋ gÿǒ tá ńzá’ ntsaŋ ngàŋ.

Matio 28:19

Pú’u la, pi gʉa ngwòŋo ngwòŋ, ńdɔg pʉ̀a mesoŋ ńgÿo *ngàŋa kwò yɔ́ɔn, ńnu’u wɔ́b ntse ná lezíŋ Tá, mbɔɔ Múɔ, mbɔɔ Zẅìge Ndʉalʉ̌a,

Ŋwà’ne Jâg 3:9

Pege lɔg pɔ́ lʉ́m ńdɔg ńgu’te Cʉ̀apʉ̀a Tá wege, ńgíŋe ńdɔg pɔ́ yɛ̌ ńnéŋ ndòon twó pʉ̀a mesoŋ pie Ssé la pwóon ńgÿo pɔ́ sẅé yé.