Efeso 1:6 - Nouveau Testament en Ngienboum

⁶ À la lɔgɔ wégè ńgÿo púɔ pé le gwɔ́ gie pege ge gu’te yé ná máa nò té fʉ̀’ gẅie à la gÿo. Á la cʉa ná pá’ à la temte wégà Míŋ we gẅie à kwoŋe yé tɛ’, ńcÿó gʉm yégè, pú’u á gwɔ́ kwà’ máamaa nò tɛ’.

Efeso 1:6 Referans Kwoze

Kolosia 1:13

À la sa’a wégè mbwo metʉ̀ nzěm, ńtsege wégè ńnéŋe tsɛ̀ɛ nò lefùɔ Míŋ we, à kwoŋo míŋ we ŋwɛ́ tɛ’.

Efeso 1:12

À lɔ̌ɔn ńtsɔ́’ɔ wégè pú’u, le gwɔ́ gie peg pie peg ka vɔgɔ lézáb ntʉ́m nà Kristo, peg ge gu’te yé Ssé á nue à gú’ tɛ’.

Filipo 4:19

E Ssé yɔ̀ɔn ge lɔg ntí gie aa gẅiin shúm pú’u, é cʉa ná Yěsô Kristo, é náa kɔ̀ɔkɔ́ɔ gie á ne ńzága mbwo pi té sáŋ.

Matio 3:17

Ngyè fó tÿǒ lepwó ngie: Wɔɔn aa Míŋ wɔ̀ɔn, mèŋ n kwoŋo yé tɛ’, aa wɔ̀ɔn lekág

1 Piɛ 2:9

Tá ńgʉa ná pi, mbà pi ee ngẅɛ̀ pʉ̀a pie Ssé la kaŋ, ńgwɔ́ pànuŋe pwɔ́’ fùɔ ndÿò, ńgwɔ́ lá’ gie áa yé, ńgwɔ́ pʉ̀a pie à la cwoŋo wɔ́b é gwɔ́ pé, pá’ pɔ́ ge gʉa shwóŋ memáa menò mie à la gÿo, yé gẅie à la fó tsɛ̀ɛ nzěm ńkẅile gẅí, ńnéŋe gẅi nà jʉ’ʉ fɔ̌g gie kyɛ̀’ɛ mbòŋo yé áa wó.

Filipo 1:11

Yěsô ge gÿo pi ké ne fa’a pɔ́ mefà’ mbòŋo, ńzsé ngie pʉ̀a ge ne gyá, é gu’te Ssé, é gé’e lezíŋ sé.

Efeso 1:14

A Zẅìge Ndʉalʉ̌a lɔgɔ ńgwɔ́ zyè ssé nà fù’ gie e Ssé la cwoŋte ńzáb lénáa mbwo pʉ̀a pé. E Ssé lɔgɔ ńnyɛte shwóŋó wégè ngie pege ge lá’ gẅiin setsɔ́ á fʉ̀’ gie à ge lá’ pú kẅile wégè nà nò tepòŋ. Pá’ áa pú’u la, pege ne ńgu’te Ssé á nue à gú’ tɛ’.

1 Piɛ 4:11

Afù’ ye nyìŋ lɔɔn ńgwɔ́ légɔɔn nò Ssé, á gɔɔn pɔ́ gie á fóo mbwo Ssé. Aye nyìŋ gwɔ́ léfa’ mefà’ tsɛ̀ɛ cú’tè, á lɔg pɔ́ metʉ̀ mie Ssé náa mbwo yé ńdɔg fa’. Pi gÿo pá’ɔɔn ńzsé ngie mé ge cʉa ná Yěso Kristo, égu’te Ssé nà kɔ̀ɔkɔ́ɔ, yé gẅie metʉ̀ ntsèm, mbɔɔ lésá’ njÿó ée mbwo yé nà mengù’ nkɔ́ɔn nê nkɔ́ɔn. Amɛn

2 Korento 5:21

Pá’ ndòon laa twó pege la, e Ssé la kaa menò tepòŋ mégè, ńzába twó Kristo, mbà à la tè tsɔ́ nò tepòŋ gẅiin. À la gÿo pú’u, pá’ pege ge lɔgɔ léla nnɛ́ ná Kristo, é gwɔ́ pʉ̀a pie ée mbwo Ssé ńgwɔ́ ndʉŋ ndʉŋ.

2 Korento 4:15

Peg zẅíŋe mɔɔn menò ntsèm mie e Ssé ne ńgyá ngie é ku’ még, ńdɔgɔ ńtsɔ́ɔn pɔ́ ngie pi zẅɛ́’. Pú’u, ńzsé ngie nzẅìŋ pàzsé ngie e Ssé kwoŋo wɔ́b ge kẅi’i gyɔ́ɔn, nzẅìŋ pàná ndǎg mbwo yé, mbɔɔ pàgù’te yé, é kẅi’i ńgyɔ́ɔn.

1 Piɛ 2:5

Á poŋ ngie pi gí pie pi gẅiin kwà’ le gwɔ́, pi zẅíŋ, e Ssé lɔgɔ gẅi ńgÿo metóon, ńdɔg ńkwɛ́ ndá Zẅìge Ndʉalʉ̌a. Pi gwɔ́ tsɛ̀ɛ wó ńgwɔ́ pànuŋe pwɔ́’ pie Ssé la tsɔ́’, pie é ge cʉa nzèm Yěsô Kristo, é nuŋe pwɔ́’ gẅie é poŋ Ssé.

Efeso 1:18

Mèŋ n giŋé ne sẅíŋte yé, ngie à gÿo ntʉ́m gẅi zsé kyɛ̀’ yé légwɔ́ gie pi ge cwoŋo zsé mmó gie à lɔ̌ɔn ńtóŋo gẅi ńtí yɛ̌. Mbɔɔ pá’ pi ge zsé máamaa fù’u mbòŋo gie pia petsɔ́ pʉ̀a pie à la tsɔ́’ɔ wɔ́b ge gÿo kẅé, á gwɔ́ mmó gie à la cwoŋte ńzáb né pi.

Roma 8:1

Á lɔgɔ ńgwɔ́ ngie pʉ̀a pie é la nnɛ́ ná Yěsô kristo, é té ge lá’ gíŋe gwe ntsaŋ wɔ́,

Ŋwà’ne Jâŋ 10:17

Tá wɔ̀ɔn kwoŋo wɔ̀ɔn, mélà’mie mèŋ n náa twó yɔ́ɔn tá gÿo gíŋe kẅé.

Ŋwà’ne Jâŋ 3:35

E Ssé Tá kwoŋo Míŋ we, mbà à léen ńnéŋ shúm ntsèm á nà lɔ̌ɔn pwó Míŋ we.

Lukase 2:14

Legu’ gwɔ́ mbwo Ssé á tàa tÿǒ lepwó, asẅétè gwɔ́ mbwo pʉ̀a mesoŋ ndùmo Ssé tsetsá’. E Ssé kwoŋo wɔ́b.

Matio 17:5

Á nyé ńgɔɔn gɔɔn, etsɔ́ melɔ́ɔn, mie é ŋwʉŋe ŋwʉŋe sẅɛ́’ ńkábte wɔ́b, ngyè nyìŋ fó tsɛ̀ɛ wó ńgɔɔn ngie: Wɔɔn aa Míŋ wɔ̀ɔn, mèŋ n kwoŋo yé tɛ’, aa wɔ̀ɔn lekág, pi jú’ ncwò wé.

Filipo 3:9

légwɔ́ gie mèŋ n ge cʉ́’ gwɔ́ pɔ́ nà mbwo mé, ńgwɔ́ n de gíŋ ngie n gee tè fʉa mvfò Ssé, mélà’mie mèŋ n zsé *lepʉ̌ pà Yuda wɔ́. Mèŋ n gee mvfò yé ńgwɔ́ tè fʉa ńtí pɔ́ nò gie mèŋ n záb ntʉ́m wɔ̀ɔn ná Kristo, e Ssé zɔ gÿo ngie mèŋ n gwɔ́ nyìŋ nénʉ́ pá’ wɛ̌ nyìŋ wɔ́ gẅie à zǎb ntʉ́m wé ná Kristo.

Efeso 2:7

À la gÿo mɔɔn menò pá’ à ge lá’ lɔg la’te ná yɛ̌ kème njÿó wɔ́ gie á ne ńtóo ngie à la cÿó gʉm yégè tà ńcʉa ntí, á fóo ná pá’, à cʉa nà Yěsô Kristo ńgẅiin pòŋo ntʉ́m ná pege pú’u.

Matio 20:9

Pʉ̀a pie pɔ́ zyě yɔ́b fà’ ná nèm tʉ̀a ncwò nzém tó, mé náa tà’a pàga nkáb mbwó wɔ̌wɔɔ ná pɔ́b.