Efeso 1:19 - Nouveau Testament en Ngienboum

¹⁹ Mèŋ n giŋé ne sẅíŋte yé ngie à gÿo pi zsé ngie metʉ̀ mé pú fáŋ ńcʉa metʉ̀ ntsèm, mbɔɔ ngie à gÿo pi zsé pá’ mɛ̌ metʉ̀ tóonte wégè pàzáb ntʉ́m ná ye pú’u.

Efeso 1:19 Referans Kwoze

Filipo 2:13

E Ssé zɔɔn ne fa’a tsɛ̀ɛ ntʉ́m pi légwɔ́ gie pi ge kwoŋ shúm sie é poŋo yé, mbɔɔ légwɔ́ gie pi ge gíŋ gÿo sɛ̌ shúm.

Efeso 3:20

Yé Ssé, à ku’u légÿo kɔ̀ɔkɔ́ɔ ná pege, ńgÿo tà ńkwa’ ḿbú ńtɔ́g pá’ pege ne ńdúɔ, mbɔɔ pá’ pege ne ńkwaŋa. À gwɔ́ gÿo ńdɔg pɔ́ metʉ̀ mé mie é fa’a tsɛ̀ɛ mentʉ́m mégè.

Kolosia 2:12

Á laa fʉ̀’ gie mé la nu’u gẅi tsɛ̀ɛ ntse, mé laa pú’u, ńdɔgɔ ḿbúte gẅia Kristo ńnéŋe tsɛ̀ɛ lesyè, pia pɔ́ gíŋe ḿbúte ńzíme nà legwé, á nue pi zẅǐŋ ngie e Ssé gẅie à la zíme Yěsô ná legwé, à gẅiin tʉ̀ lélɔg ńgÿo pi zím gí nà legwé.

2 Korento 4:7

Tá peg pie yɔɔn fù’ áa ná peg, peg gwɔ̌ pɔ́ pá’ megwʉ̌ŋ tsa’á la. Á fó mǒ mé gyá mboŋó ngie mɛ̌ metʉ̀ mie efʉ̀’ yé tè wó wɔ́, éfóo pɔ́ mbwo Ssé, é té fóo mbwo peg wɔ́.

Kolosia 1:29

Pi jú’u mmó gie mèŋ n kwé mǒ. Mèŋ n kě ńdɔgɔ pɔ́ metʉ̀ mie é fóo mbwo Kristo tá fa’a yɔɔn fà’. Mɛ̌ metʉ̀ kwa’ ńgwɔ́ soŋ nnɛ́ mèŋ ńne fa’a.

Efeso 6:10

Nzsò nzèm nò gie mèŋ n ge shwóŋó gẅí, á gwɔ́ pɔ́ ngie: Pá’ pi la nnɛ́ ná Cʉ̀apʉ̀a la, pi kẅé metʉ̀ mbwo ye. Àa ngàŋ metʉ̀ ntsèm. Pi kẅé metʉ̀ mbwo ye.

Efeso 3:7

E Ssé la cÿó pɔ́ gʉm yɔ́ɔn tá ńgÿo n gwɔ́ ngàŋa fà’ létsẅi nkʉ̀ mbòŋo. À la lɔg pɔ́ metʉ̀ mé tá ńgÿo pú’u.

Efeso 2:10

Pege lɔɔn ńgwɔ́ kɔ́ wɔ́, mbà pege zẅɛ́’ɛ pɔ́ Ssé. E Ssé la cʉa ná Yěsô Kristo ḿbwóon wégè, légwɔ́ gie pege ge fa’ mefà’ mbòŋo mie yé Ssé la lá’ ńcwoŋte ńzáb pá’ pege ge fa’.

Roma 1:16

Ńgwɔ́ eshʉ́ lékúu wɔ̀ɔn á létsẅi nkʉ̀ mbòŋo wɔ́, ée metʉ̀ mie e Ssé lɔgɔ ńgÿo pʉ̀a pie é záb ntʉ́m nà yé tsẅɛ́ɛ. À zye nà pà Yuda ńkúu ná pʉ̀a pie é té pà Yuda wɔ́.

Ŋwà’ne Jâg 1:18

Yé zɔ la kwoŋ, ńdɔgɔ shwóŋe gie áa nénʉ́, ńgÿo pege tsẅɛ́, légwɔ́ gie pege ge gwɔ́ mbwo yé, é gwɔ́ ntwó mmó ná ngwòŋ kɔ̀ɔkɔ́ɔ gie à la gÿo.

2 Tesalonika 1:11

Áa mmó gie á gÿo tá peg ne sẅíŋte Ssé fʉ̀’ ntsèm ná twó sí, ńgie à gÿo pi gwɔ́ pʉ̀a pie pi ku’u létsẅɛ́ pá’ à la ká’a mbwo pi. Peg giŋé ne sẅíŋte yé, ngie à lɔg metʉ̀ mé ńkẅéte gẅi pi gÿo kɔ̀ɔkɔ́ɔ nò mbòŋo wɔ́ gie pi ne ńkwoŋo légÿo, mbɔɔ fà’ gie pi ne ńgÿo ńtí pá’ pi záb ntʉ́m ná yé.

1 Tesalonika 1:5

Á nue peg ka tè lɔg pɔ́ shwóŋè ndà’ ńtsẅi nkʉ̀ mbòŋo lá’ pi wɔ́, peg ka lɔg pɔ́ metʉ̀ Zẅìge Ndʉalʉ̌a, ḿbiŋ ne ńcwoŋo ńzsé ngie Nkʉ̀ gẅie peg kɔ̌ɔn ńtsẅii kaa nénʉ́, pi ne ńzsé mmó gie peg la gÿo fʉ̀’ gie peg laa tsetsɛ̀ɛ pi, á la gwɔ́ pɔ́ lélɔg ńkẅéte gẅí.

2 Korento 5:17

Nyìŋ gwɔ̌ tá ńda nnɛ́ ná Kristo, ńcʉ́’ ńgwɔ́ pɔ́ nyìŋ we sẅé, ńgwɔ́ tsɛ̀ɛ ntʉ́m yé à tè gíŋe ńgwɔ́ pá’ à ka zɔɔn ńgwɔ́ wɔ́, mbà à zyě léńnéŋe we sẅé.

Megàŋ ntúm 26:18

Mèŋ n túmo gú pú’u, ɔ̀ gʉa ńnyɛ́’ nÿɔ́g mɔ́b, ńgÿo pɔ́ fó tsɛ̀ɛ nzěm ńkẅɛ, ńkúu nà jʉ’ gie á ne fɔ́gɔ. Á lɔgɔ ńgwɔ́ ngie ɔ̀ ge gÿo gÿo pɔ́ fó nà mbwó Sátà ńkẅɛ, ḿbiŋe nà mbwó Ssé, é záb ntʉ́m wɔ́b ná mèŋ, e Ssé lege menò tepòŋ mɔ́b ńnáa mbwó pɔ́b, é piŋ náa yɔ́b jʉ’ á tsetsɛ̀ɛ pʉ̀a pé.

Ŋwà’ne Jâŋ 3:6

Nyìŋ gẅie mámbàŋa pɔ́ manzwě zyě yé, à gwɔ́ pɔ́ nyìŋ mesoŋ, nyìŋ gẅie à Zẅìge Ssé zyě yé, á gẅiin le gwɔ́ gẅie à gwɔ́ pɔ́ we Zẅìge Ssé.

Filipo 3:21

À ge gÿo tó é sele yɔɔn mbùm nnɛ́ gie e tè ná tsɔ́ nò ku’, e cʉ́’ pá’ ye gie e gẅiin shʉ́shÿɔ́g. À gwɔ́ pú’u, ńdɔgɔ metʉ̀ mie à gẅiin lélɔg ńgÿo à kɔ̀ɔkɔ́ɔ cʉ́’ ńjú’ pɔ́ ncwò wé.

1 Piɛ 4:11

Afù’ ye nyìŋ lɔɔn ńgwɔ́ légɔɔn nò Ssé, á gɔɔn pɔ́ gie á fóo mbwo Ssé. Aye nyìŋ gwɔ́ léfa’ mefà’ tsɛ̀ɛ cú’tè, á lɔg pɔ́ metʉ̀ mie Ssé náa mbwo yé ńdɔg fa’. Pi gÿo pá’ɔɔn ńzsé ngie mé ge cʉa ná Yěso Kristo, égu’te Ssé nà kɔ̀ɔkɔ́ɔ, yé gẅie metʉ̀ ntsèm, mbɔɔ lésá’ njÿó ée mbwo yé nà mengù’ nkɔ́ɔn nê nkɔ́ɔn. Amɛn