1 Timote 3:2 - Nouveau Testament en Ngienboum

² Á zɛ́te ngie ndìe cú’tè pʉ̀a Kristo à gwɔ́ nyìŋ gẅie mé té kíme yé té poŋ wɔ́. Á zɛ́te ngie à gẅiin pɔ́ tà’ manzwě wémɔ’ɔ́, tà á gÿo tsɔ́ mmó tà á cʉa. À gwɔ́ nyìŋ gẅie à sáŋa nò tá ńgÿo, ńgwɔ́ nyìŋ gẅie à kúe megʉ̀ mboŋó, ńku’u lézí’i pʉ̀a mmó.

1 Timote 3:2 Referans Kwoze

2 Timote 2:24

Á piŋ ńké tè poŋ ngie ngàŋa fà’ Cʉ̀apʉ̀a tág mélà’ wɔ́. À gẅiin pɔ́ lékwoŋo mânyìŋ ntsèm, ńku’u lézí’i pʉ̀a mmó mboŋó, ńku’u légwɔ́ gie mé ge fʉ̀’ nò ná ye, á le pá.

Roma 12:13

Ammó lɔɔn ńzága mbwo mefɛ́ pi pʉ̀a Kristo, pi kẅéte wɔ́b. Pi ńnéŋe ńkúe pà túm mboŋó.

1 Timote 5:9

Ampfɔ̌g gẅie à lɔɔn ńgwɔ́ ɔ̀ ŋwe’e lezíŋ sé nà mezíŋ mepfɔ̌g pie acú’tè ge ne kẅéte wɔ́b, á ne ńzɛ́te ngie à gwɔ́ gẅie à tɔ̌g ngù’ móm ntɔgɔ́, ńgwɔ́ gẅie à la zsé pɔ́ ndà’ ndǔm we.

1 Piɛ 4:9

Pi kúe mefɛ́ pi tsetsɛ̀ɛ pi á tsɛ̀ɛ mendá mí té ne ńzẅɛ́te.

1 Piɛ 5:8

Tà pi gwá’a lÿɔg, tà pi lyé. Angàŋ mbù gẅi, Sátà, à ne ńgwá ńzéme, éfa’a nyìŋ gẅie à ge gwoon yé, pá’ pú’ ntʉ̀ gẅie à ga’te éfa’a mmó gie à ge pfɛ́ la.

Heber 13:2

Tà pi lege lékúe megʉ̀ pie é tǒ mbʉ̀a pi, etsɔ́ pʉ̀a la lá’ ńkúe megʉ̀ kǔe, tà ńdá’a lyɛ̌’ ńkúe *mecÿɔ́’ Ssé té zsé.

Titus 2:2

Gɔɔn né mbàŋa gie é zẅǐŋ ngie tà pɔ́ gÿo tsɔ́ mmo tà á cʉa, ńgie pɔ́ gwɔ́ pʉ̀a mekù’, ńgie pɔ́ gwɔ́ pʉ̀a pie é sáŋa nò tá ńgÿo. Pɔ́ gíŋ ńzáb ntʉ́m nà Ssé tà ńzáb, ńnéŋe ńkwoŋo pʉ̀a tà ńkwoŋo, éshÿɔgɔ menò tà shÿɔgɔ.

Filipo 2:15

légwɔ́ gie, atsɔ́ mmó gie mé ge la’a gẅi mǒ á té gwɔ́ wó wɔ́. A*lɔ̌’ɔ gí á le gwɔ́ wó wɔ́. Pi lɔg ńgwɔ́ tsɛ̀ɛ yɔɔn njÿó, ńgwɔ́ púɔ Ssé pie tsɔ́ *lɔ̌’ té ná pɔ́b wɔ́, à lɔgɔ ńgwɔ́ ngie pi ee kyɛ̀’ gie á kyɛ’ɛ jʉ’ tsetsɛ̀ɛ yɔɔn nùɔ pʉ̀a pie é gwɔ́ pɔ́ megàŋa cÿɔ̌ nò, ńgíŋ ńgwɔ́ pà sẅáŋ lekÿɛ̀bɛ.

1 Piɛ 4:7

Afʉ̀’ʉ nzsòte kɔ̀ɔkɔ́ɔ wɔ́, á ne ńku’u. Pá’ áa pú’u la, pi gwɔ́ pàzsé nò. Tà pi gwá’a lÿɔg, ńzsé ngie pi ge ku’u lésẅíŋte Ssé.

Heber 3:14

Pega Kristo zɔɔn ńcʉ́’ ḿbú ńgwɔ́ pɔ́ ná tà’a nò, tá’ á ne ńzɛ́te tà’a mmó wémɔ’ɔ́, á gwɔ́ lékú’te mmó gie mé la shwóŋó wégè tá pege záb ntʉ́m nà Ssé, ńkú’te kú’te tà ńdá’ ńkúu nà lyɛ’ɛ́ nzsoté.

1 Timote 4:3

Pɛ̌ pʉ̀a ne ńzí’i pʉ̀a ngie tà pɔ́ zɔ́’, ńgie tà pɔ́ pfɛ́ tsɔ́ shúm léjÿó, tá mbà Ssé la nyɛte sɛ̌ shúm légwɔ́ gie pʉ̀a pie é záb ntʉ̀m ná yé, ńne ńzsé nò gie áa nénʉ́, ge pi, ésie yé mǒ, é jÿó.

Lukase 1:6

Sakarîɛ pɔ́ nzwě we laa pʉ̀a, ńkú’te *lepʉ̌ Ssé kwà’ mboŋó, ńjú’u ncwò Ssé, ḿbiŋe ńgÿo pɔ́ mmó gie à ne ńkwoŋo tà *lɔ̌’ téen ńkẅɛɛ wɔ́.

Lukase 2:36

Atsɔ̌ méndÿò manzwě la gíŋe ńgwɔ́ yé Yerósalem fʉ̀’ó, lezíŋ sé gwɔ́ le Ánɔ́ɔn, á gwɔ́ míŋ Fanuel á nà ngẅɛ̀ ndá Asɛ̀ɛ. À lɔ̌ɔn ńjú’u nò mbwo Ssé é shwóŋó lá’. Á la gwaa gwɔ́, mbà à la lêen ńzɔ́’ yé ńgÿo ndà’ ngù’ sɔɔn mbʉ́a andǔm we kwé.

1 Timote 3:8

Á gíŋe ńzɛ́te ngie pàfa’ mefà’ tsɛ̀ɛ cú’tè pʉ̀a Kristo gwɔ́ yɔ́b pʉ̀a pie é gẅiin mekù’, ńgwɔ́ pàshwóŋó nò nénʉ́, ńgwɔ́ pʉ̀a pie é té ma’ mbùm yɔb ná melù’ wɔ́, ńké le gwɔ́ pʉ̀a pie é kwoŋ nkáb ńgáte gaté wɔ́.

1 Timote 3:12

Á zɛ́te ngie pàfa’ mefà’ tsɛ̀ɛ cú’tè pʉ̀a Kristo gẅiin pɔ́ tà’ tà’ manzwě, ńdíe membʉ̀a mɔ́b mboŋó, tà mbɔɔ penkʉ́ pɔ́b.

1 Timote 5:10

Á zɛ́te ngie à gwɔ́ gẅie pʉ̀a ne ńzẅíŋe ngie aa ńgÿo mefà’ mbòŋo, á gẅie aa ńkwɔ́’te penkʉ́ pé mboŋó, á gẅie aa ńkúe megʉ̀ mbʉ̀a yé, á gẅie aa ńnáa nnɛ́ ssé, ńkẅéte pʉ̀a Kristo, ńgwɔ́ gẅie aa ńkẅéte megàŋ ngɔ́’, á gẅie aa ńgÿo pɔ́ nò mbòŋo.

1 Timote 5:22

Tè sẅɛte ńzáb mbwo ná nyìŋ ńcʉ́me fà’a cú’tè pʉ̀a Kristo mbwo yé. Zɔɔn ḿvɔg ńtsa’a yé mboŋó, ḿbɔ́gɔ ngàŋ légÿo nò tepòŋ, á cʉ́’ʉ jú. Pɔ́ɔn kɔ̀ɔkɔ́ɔ gie ńgwɔ́ á cʉŋte gú.