प्रकाश 6:8 - नेवाः बाइबल

⁸ अले जिं म्‍हासुसे च्‍वंम्‍ह छम्‍ह सलयात खना। थ्‍व सल गया च्‍वंम्‍हय्‌सिगु नां मृत्‍यु खः। उकिं नरक धाःम्‍ह वयागु ल्‍यूल्‍यू वःगु खः। इमित पृथ्‍वीयागु प्‍यब्‍वय् छब्‍व तरवारं पालेगु, नये मखंकाः स्‍यायेगु, ल्‍वचं स्‍यायेगु, अले जंगलय् च्‍वंपिं पशुतय्‌सं स्‍याकेगु अधिकार बिल।

प्रकाश 6:8 Referans Kwoze

होशे 13:14

“जिं इमित चिहानया शक्तिपाखें मू पुलाः त्‍वतके ला? जिं इमित मृत्‍युपाखें छुत्‍कारा याये ला? अय् मृत्‍यु, छंगु ग्‍यानापुगु ल्‍वय् गन दु? अय् मृत-लोक छंगु नाश यायेगु शक्ति गन दु? “छाय्‌धाःसा जिं इमित दया याये मखुत।

प्रकाश 1:18

जि म्‍वाःम्‍ह खः। जि सी धुनाम्‍ह जूसां आः जि न्‍ह्याबलें म्‍वाना च्‍वनीम्‍ह खः। मृत्‍यु व नरकया ताःचा जिके दु।

जकरिया 6:3

स्‍वंगूगु रथ तुयुपिं सलतय्‌सं व प्‍यंगूगु रथ तातेपाते जूपिं सलतय्‌सं साला च्‍वंगु दु, उपिं फुक्‍क बल्‍लाः।

इजकिएल 5:12

छिमि स्‍वब्‍वय् छब्‍व मनूत महामारी वा अनिकालं सी, अले स्‍वब्‍वय् छब्‍व छंगु पःखाःया पिने तरवारं सी, अले स्‍वब्‍वय् छब्‍वयात जिं प्‍यखेरं छ्यालब्‍याल यानाबी। अले नांगा तरवार ज्‍वनाः जिं इमित ली।

यर्मिया 16:4

“इपिं ग्‍यानापुगु ल्‍वचं सी। इमिगु लागिं सुं नं ख्‍वइ मखु वा सुनानं इमित थुनी मखु। इपिं बँय् फोहर थें लानाच्‍वनी। इपिं तरवार व अनिकालं नाश जुइ, इमिगु सीम्‍ह आकाशयापिं झंगःपन्छित व पृथ्‍वीयापिं पशुतय्‌गु नयेगु नसा जुइ।”

प्रकाश 9:18

इमिगु म्‍हुतुं पिहां वयाच्‍वंगु नाश याइगु मि, कुँ व गन्‍धकया विपत्तिं स्‍वब्‍वय् छब्‍व मनूतय्‌त स्‍यानाबिल।

यशैया 25:8

वय्‌कलं मृत्‍युयात सदांया निंतिं नुनाछ्वयादी। परमप्रभु परमेश्‍वरं फुक्‍कसिगु मिखां ख्‍वःबि हुयादी। वय्‌कलं फुक्‍क पृथ्‍वीं थः प्रजाया बदनामी चीकाः छ्वयादी। परमप्रभु थःम्‍हं हे थ्‍व खँ धयादीगु दु।

प्रकाश 9:15

अले वं प्‍यम्‍ह दूततय्‌त फ्‍यना बिल। स्‍वब्‍वय् छब्‍व मनूतय्‌त स्‍यायेत थ्‍व हे घौ, न्‍हि, ला व दँया लागि तयार यानातःपिं थुपिं हे खः।

१ कोरिन्‍थी 15:55

“हे मृत्‍यु! ग्‍व छं त्‍याके फुगु? छंगु शक्ति ग्‍व?”

हबकूक 2:5

धात्‍थें हे मनूतय्‌त दाखमद्यं ध्‍वखा बी, व तःधंछुया जुइ अले व गुबलें याउँक च्‍वने फइ मखु, छाय्‌धाःसा व चिहान थें लोभी खः। व मृत्‍यु थें गुबलें लुधनी मखु। वं दक्‍व जात जतितय्‌त थःथाय् मुंकी, अले दक्‍व मनूतय्‌त कुनी।

यर्मिया 16:16

“तर आः जिं यक्‍व न्‍या लाइपिं छ्वये, इमिसं थुपिं मनूतय्‌त लाइ,” परमप्रभुं धयादी। “अनंलि जिं थःम्‍हं हे यक्‍व शिकारीतय्‌त छ्वये, इमिसं थुमित फुक्‍क पर्वत, डाँडा व गुफां मामां लिकाइ।

मत्ती 11:23

“हे कफर्नहुमय् च्‍वंपिं मनूत, छिमित छु स्‍वर्गय् थत यनी धयाच्‍वनागु ला? छिमित ला नरकय् क्‍वफाइ। छिमिथाय् याःगु अजू चायापुगु ज्‍याखँ सदोमय् याःगु जूसा आः तक नं सदोम दयाच्‍वनीगु जुइ।

यर्मिया 43:11

व वयाः मिश्र देशयात हमला याइ, अले सीगु लागि च्‍वयातःगु दुसा सित, कैदी जुयेगु च्‍वयातःगु दुसा कैदय् वनेत व तरवारं सीगु च्‍वयातःगु दुसा तरवारयात लःल्‍हाइ।

हितोपदेश 5:5

वं छन्‍त मृत्‍युया गालय् क्‍वफाये यंकी। वयागु लँपु धयागु सीगाःया लँपु खः।

प्रकाश 12:4

वयागु न्‍हिप्‍यनं आकाशय् स्‍वब्‍वय् छब्‍व नगुयात बँ पुइ थें पुयाः पृथ्‍वीइ कुर्का हल। व अजिङ्गर बुइत्‍यंम्‍ह मचायात नयेत प्‍वाथय् दुम्‍ह मिसाया न्‍ह्यःने पिवाः च्‍वनाच्‍वन।

यर्मिया 14:12

इपिं अपसं च्‍वंसां जिं इमिगु सः न्‍यने मखु। इमिसं होमबलि व अन्‍नबलि छाःसां जिं व नालाकाये मखु। उकिया पलेसा जिं इमित तरवार, अनिकाल व महामारीं नाश याये।”

यर्मिया 24:10

जिं इमित व इमि पुर्खातय्‌त बियागु थ्‍व देशय् इपिं भज्‍यंक नाश मजूतले जिं इमिथाय् तरवार, अनिकाल व महामारी छ्वये।”

यर्मिया 29:17

खः, दक्‍व शक्ति दुम्‍ह परमप्रभुं थथे धयादी, “जिं थःम्‍हं हे इमिथाय् तरवार, अनिकाल व महामारी छ्वये, अले जिं इमित नये तकं मज्‍यूगु ध्‍वग्‍गीगु यःमरि थें यानाबी।

इजकिएल 29:5

छ व छंगु खुसिचायापिं फुक्‍क न्‍यातय्‌त जिं मरुभूमिइ त्‍वःताबी। छ चक्‍कंगु ख्‍यलय् क्‍वःदली। छन्‍त सुनानं मुंकी मखु वा लानाकाइ मखु। जिं छन्‍त पृथ्‍वीयापिं पशुत व आकाशयापिं झंगःपन्छितय्‌गु आहारा यानाबी।

मत्ती 24:7

देश देशयापिनि दथुइ ल्‍वापु जुइ। राज्‍य राज्‍यया दथुइ ल्‍वापु जुइ। थाय् थासय् अनिकाल जुइ, अले भ्‍वखाय् ब्‍वइ।