गन्‍ती 4:15 - नेवाः बाइबल

¹⁵ “हारून व वया काय्‌पिन्‍सं पवित्र पालयागु फुक्‍क पवित्र ज्‍वलंत त्‍वपुइ धुंकाः छाउनी न्‍ह्याइबलय् जक कहातीत फुक्‍क ज्‍वलं क्‍वबीत पालया दुने दुहां वये दइ। कहातीतय्‌सं तसकं पवित्रगु ज्‍वलं थीमज्‍यू, मखुसा इपिं सी। पवित्र पालया फुक्‍क ज्‍वलं कहातीतय्‌सं क्‍वबीमाः।

गन्‍ती 4:15 Referans Kwoze

गन्‍ती 7:9

मोशां कहातीतय्‌त धाःसा द्वहं व गाडा छुं नं मब्‍यू, छाय्‌धाःसा तसकं पवित्र ज्‍वलं थःगु ब्‍वहलय् क्‍वबीगु जिम्‍मा इमिगु खः।

व्‍यवस्‍था 31:9

अले मोशां थ्‍व व्‍यवस्‍था च्‍वयाः परमप्रभुया बाचाया सनू क्‍वबिपिं लेवी कुलयापिं पुजाहारीत व इस्राएलयापिं सकलें थकालितय्‌त बिल।

गन्‍ती 10:21

अनं लिपा कहातीत पवित्र सामान व ज्‍वलं क्‍वबियाः न्‍ह्याः वन। इपिं थ्‍यने न्‍ह्यः हे मेगु छाउनीइ पवित्र पालयात धस्‍वाकातये धुंकीगु।

१ इतिहास 15:2

अले लेवीतय्‌सं जक परमेश्‍वरया सनू क्‍वबीमा धकाः वं आज्ञा बिल। छाय्‌धाःसा परमप्रभुं इमित हे सनू क्‍वबीत व न्‍ह्याबलेंया सेवा यायेत ल्‍यःगु खः।

१ शमूएल 6:19

तर परमप्रभुं बेथ-शेमेशया छुं मनूत मध्‍ये न्‍हयेम्‍हय्‌सित स्‍यानादिल, छाय्‌धाःसा इमिसं परमप्रभुया सनू चाय्‌काः स्‍वःगु खः। परमप्रभुं थथे तःधंगु विपत्ति हयादीगुलिं इमिसं विलाप यात।

१ इतिहास 15:15

मोशां परमेश्‍वरया वचनकथं आज्ञा ब्‍यू थें लेवीतय्‌सं परमेश्‍वरया सनू न्‍वःनापं थथःगु ब्‍वहलय् क्‍वबिया हल।

२ शमूएल 6:13

परमप्रभुया सनू क्‍वबिपिं खुपलाः न्‍ह्यःने वने धुंकाः वं छम्‍ह द्वहं व छम्‍ह तसकं ल्‍ह्वंम्‍ह साचा बलि बिल।

यहोशू 4:10

परमप्रभुं यहोशूयात मनूतय्‌त या धकाः धायेत उजं बियादीगु फुक्‍क पूमवंतलय् सनू क्‍वबिपिं पुजाहारीत यर्दन खुसिया दथुइ दनाच्‍वन। इमिसं मोशां यहोशूयात उजं ब्‍यूगु फुक्‍क यात। मनूत हथाय् चाचां खुसि छिनावनाच्‍वन।

गन्‍ती 3:38

मोशा, हारून व वया काय्‌पिन्‍सं पुर्बपाखे नापलायेगु पालया लिक्‍क थःगु पाल ग्‍वयेमाः। इमित इस्राएलीतय्‌गु निंतिं नापलायेगु पालया बिचाः यायेगु जिम्‍मा ब्‍यूगु खः। वने मत्‍यःपिं सुं उकिया सतिक वंसा वयात स्‍यायेमाः।

गन्‍ती 1:51

थाय् हिलेबलय् लेवीतय्‌सं हे पवित्र पाल क्‍वकायेगु यायेमाः अले लेवीतय्‌सं हे व धस्‍वाकेगु यायेमाः। पवित्र पालयात न्‍ह्यःने वने मत्‍यःम्‍ह सुं वन धाःसा वयात स्‍यायेमाः।

प्रस्‍थान 19:12

पर्वतया प्‍यखें हे मनूत वने मजीक पनाः इमित धा, ‘होश या, छिमिसं पर्वत नं गये मते, अले पर्वतया सिमानायात थी नं मते। सुनां पर्वतयात थी, व मनू सी।

प्रस्‍थान 27:7

वेदी क्‍वबीत वेदीया निखेंया चालय् न्‍वः दुछ्व।

लेवी 16:13

वं परमप्रभुया न्‍ह्यःने मिइ धुपाँय्‌चुं तयेमाः। थुकिया कुं साक्षीया सनूया च्‍वय्‌च्‍वंगु प्रायश्‍चितया कृपा-आसनयात त्‍वपुइमाः, मखुसा व सी।

गन्‍ती 1:50

उकिया पलेसा छं लेवीतय्‌त पवित्र पाल व उकी दुने च्‍वंगु फुक्‍क ज्‍वलंया जिम्‍मा ब्‍यु। छिमिसं थाय् हिलाजुइबलय् इमिसं पवित्र पाल व फुक्‍क ज्‍वलं क्‍वबीमाः। इमिसं व बांलाक स्‍वयेमाः, अले नापलायेगु पालया जवंखवं पाल ग्‍वयाः च्‍वनेमाः।

गन्‍ती 4:14

अले इमिसं उकिया द्यःने वेदीया सेवा यायेत छ्यलिगु ज्‍वलं नापं मिथल, ला लिकायेगु नतू, नउ तुइगु चतं व हि छ्वाकेगु बाता तयाः द्यःने डल्‍फिन न्‍याया छेंगुलिं त्‍वपुयाः न्‍वःत नं थासय् तयाबीमाः।

गन्‍ती 4:19

इपिं तसकं पवित्रगु सामान दुथाय् वइबलय् मसीमा तर म्‍वानाच्‍वनेमा धकाः इमिगु लागि थथे या। हारून व वया काय्‌पिन्‍सं पवित्र थाय्‌या दुने वनाः इमिसं यायेमाःगु ज्‍या व क्‍वबी माःगु सामान क्‍यनाबीमाः।

गन्‍ती 4:20

तर कहातीत पवित्र ज्‍वलं स्‍वयेत पलखया लागि जक नं दुहां मवनेमा, मखुसा इपिं सी।”

गन्‍ती 18:3

इमिसं छं धाःथें ज्‍या यायेमाः, अले नापलायेगु पालया ज्‍यायागु जिम्‍मा कायेमाः। तर इपिं पवित्र पालया सामान व वेदीया सतिक तक नं मवनेमाः, मखुसा इपिं नापं छिपिं नं सी।

२ शमूएल 15:24

सादोक पुजाहारी नं फुक्‍क लेवीतनापं अन हे दु। इमिसं परमेश्‍वरया बाचाया सनू क्‍वबिया यंकाच्‍वंगु खः। इमिसं सनू बँय् तुं तया तल उकियात क्‍वमब्‍यु, फुक्‍क मनूत शहरं पिहां मवंतले अबियाथारं बलिदान छाल।

१ इतिहास 23:26

उकिं आवंलि लेवीतय्‌सं नापलायेगु पाल व आराधनाय् छ्यलिगु सामान क्‍वबियाः जुइ मालि मखुत।”

प्रस्‍थान 19:21

परमप्रभुं मोशायात धयादिल, “क्‍वय् वनाः मनूतय्‌त जितः स्‍वयेत सिमाना हाचां गयाः वये मते धकाः धा। मखुसा इपिं यक्‍व सी।

१ राजा 8:3

इस्राएलया फुक्‍क थकालित वयेधुंकाः पुजाहारीतय्‌सं सनू ल्‍ह्वन।