योना 2:2 - नेवाः बाइबल

² “जितः आपत जूबलय् जिं परमप्रभुयाके ग्‍वाहालि फ्‍वना, वय्‌कलं लिसः बियादिल। पातालंनिसें परमप्रभुयात ग्‍वाहालिया लागि जि हालाहया, छिं जिगु सः न्‍यनादिल।

योना 2:2 Referans Kwoze

भजनसंग्रहया सफू 120:1

दुःखया इलय् जिं परमप्रभुयाके ग्‍वाहालि फ्‍वना, वय्‌कलं जितः लिसः बियादिल।

भजनसंग्रहया सफू 34:6

थ्‍व दुःखीम्‍ह मनुखं सःतल, परमप्रभुं न्‍यनादिल, अले फुक्‍क दुःखकष्‍टपाखें वयात बचय् यानादिल।

भजनसंग्रहया सफू 86:13

छाय्‌धाःसा जि प्रति छिगु न्‍ह्याबलें दयाच्‍वनीगु दया माया तःधं, छिं जितः चिहानं बचय् यानादीगु दु।

हिब्रू 5:7

संसारय् दीबलय् हे येशूं मिखाय् ख्‍वबि हाय्‌काः थःत हानं म्‍वाका दीम्‍हय्‌सित बिन्‍ति व प्रार्थना यानादिल। वय्‌कः क्‍वमिलुम्‍ह जूगुलिं व बाःयात दुनुगलंनिसें मानय् यानादीम्‍ह जूगुलिं वय्‌कःयागु बिन्‍ति व प्रार्थना परमेश्‍वरं न्‍यनादिल।

१ शमूएल 30:6

अनंलि थथःपिनि काय्‌म्‍ह्याय् व ज्‍वनायंकूगुलिं दाऊदया मनूतय्‌सं तं पिकयाः दाऊदयात ल्‍वहंत कय्‌केगु ख्‍याच्‍वः बिल। अले दाऊदयात वयाये थ्‍वयाये मन्‍त। तर परमप्रभु थः परमेश्‍वरपाखें जक दाऊदयात बल दत।

मत्ती 12:40

गथे योना न्‍यायागु प्‍वाथय् स्‍वन्‍हु स्‍वचा तक च्‍वन, अथे हे मनूया काय् नं पृथ्‍वीया दुने स्‍वन्‍हु स्‍वचा तक च्‍वनी।

भजनसंग्रहया सफू 116:3

कालया खिपतं जितः ततमतःक्‍यंकल। अले चिहानया सास्‍ती जिके वल। दुःख व संकटं जितः त्‍वपुल।

भजनसंग्रहया सफू 22:24

परमप्रभु मनूतय्‌गु दुःखयात च्‍यूताः मतसे जुयादीम्‍ह मखु, अले इमित क्‍वह्यंकादीम्‍ह नं मखु। छाय्‌धाःसा जिं वय्‌कःयात प्रार्थना यानाबलय् वय्‌कलं न्‍यनादिल। वय्‌कः जिपाखें फस्‍वया मदी।

भजनसंग्रहया सफू 4:1

जिं सःतेबलय् जितः लिसः बियादिसँ। जितः दोषं मुक्त यानादीम्‍ह, हे जिमि परमेश्‍वर, जितः जिगु दुःखं पार यानाबियादिसँ। जितः दया यानादिसँ, अले जिगु प्रार्थना न्‍यनादिसँ।

लूका 22:44

अले नुगलय् तसकं हीसे च्‍वनाः नुगः हे ह्वगनि थें च्‍वंगुलिं वय्‌कलं झन तसकं मन बियाः प्रार्थना यानादिल। वय्‌कःयागु चःति हि थें ततःफुति जुयाः बँय् तिकि ननाच्‍वन।

यशैया 14:9

छ वयेत्‍यंगु खनाः छन्‍त नापलायेत चिहान नं हथाय् चायाच्‍वंगु दु। वं सिनावनेधुंकूपिं आत्‍मायात छन्‍त लसकुस यायेत थनी। उपिं आत्‍मां सारा संसारय् च्‍वंपिं फुक्‍क नायःतय्‌त व देशया फुक्‍क जुजुपिन्‍त थःगु सिंहासनं थनीगु याइ।

भजनसंग्रहया सफू 65:2

हे जिमिगु प्रार्थना न्‍यनीम्‍ह परमेश्‍वर, फुक्‍क मनूत छिथाय् वइ।

भजनसंग्रहया सफू 61:2

जि नुगः मछिन कि पृथ्‍वीया ताताःपाःगु थासं जिं छितः ग्‍वाहालिया निंतिं बिन्‍ति याये। जितः सदां सुरक्षित जुइगु ल्‍वहंधिकय् यंकादिसँ।

भजनसंग्रहया सफू 16:10

छाय्‌धाःसा छिं जिगु आत्‍मायात सीपिनिगु दथुइ त्‍वःतादी मखु। अले छितः विश्‍वास याःम्‍हय्‌सित छिं सीगालय् ध्‍वगिकेबी मखु।

प्रेरित 2:27

छाय्‌धाःसा छिं जिगु आत्‍मायात पातालय् त्‍वःतादी मखु। अले थःम्‍ह पवित्र मनूयात ध्‍वगिकाः तयादी मखु।

१ शमूएल 1:16

छिं जितः ज्‍यालगय् मजूम्‍ह मिसा ताय्‌कादी मते। जिगु दुःख व कष्‍ट अप्‍वया वःगुलिं प्रार्थना यानाच्‍वनागु खः।”

विलाप 3:55

हे परमप्रभु, तःजाःगु गालंनिंसें जिं छिगु नामं बिन्‍ति याना।

इजकिएल 26:20

अबलय् जिं छन्‍त पातालय् वनेधुंकूपिं पुलांगु ईयापिं मनूतय्‌थाय् छ्वयाबी। जिं छन्‍त पृथ्‍वीया क्‍वय् सदांया निंतिं नाश जूगु थासय् च्‍वनेबी। अले छ हाकनं गुबलें म्‍वाःपिनिगु देशय् लिहां वयाच्‍वनी मखु।

इजकिएल 31:14

आवंलि मेमेगु सिमा न्‍ह्याक्‍व हे लः दुसां व सिमा थें तज्‍जाः जुइ मखु वा सुपाँय् दुथाय् तक थाहां वइ मखु अले उलि तज्‍जाः गुबलें जुइ फइ मखु। व फुक्‍क सिनावनीपिं मनूत थें नाश जुल अले पातालय् थ्‍यनी।

२ इतिहास 33:12

तर आपत जूबलय् वं परमप्रभु थः परमेश्‍वरयाके ग्‍वाहालि फ्‍वन, अले व वया पुर्खातय् परमेश्‍वरया न्‍ह्यःने क्‍वमिलु जुल।

लूका 11:10

छाय्‌धाःसा फ्‍वंपिन्‍त बी, माला स्‍वःपिन्‍सं लुइकी, अले सः ब्‍यूम्‍हय्‌सित चाय्‌काबी।