यर्मिया 44:22 - नेवाः बाइबल

²² छिमिसं याःगु मभिंगु ज्‍या व घच्‍चाइपुगु ज्‍या परमप्रभुं यक्‍व अप्‍वः सह यानादी मफुत। अले छिमिगु देश झिजांमिजां दंगु, मनू मदुगु सुनसान थाय् जुल। अले मनूतय्‌सं छिमिगु नां कयाः सराः बियेगु यानावयाच्‍वंगु दु, थौं नं अथे जुयाच्‍वंगु दु।

यर्मिया 44:22 Referans Kwoze

यर्मिया 25:18

जि यरूशलेम व यहूदाया मेमेगु शहरय् वना अले अन च्‍वंपिं मनूत, जुजुपिं व हाकिमतय्‌त व त्‍वंके बिया। उबलय् निसें थौं तक उपिं शहरत झिजांमिजां दंगु मरुभूमिइ थें जुया हे च्‍वंगु दु, उपिं शहरत खनाः मनूत ग्‍याइगु अले उपिं शहरतय्‌त तसकं मय्‌कीगु। थौं तक मनूतय्‌सं इमिगु नां कयाः सराः बियेगु यानावयाच्‍वंगु दु।

मलाकी 2:17

छिमिसं थःगु खं परमप्रभुयात हीमी चायेकूगु दु। छिमिसं न्‍यनी, “जिमिसं वय्‌कःयात गथे यानाः हीमी चाय्‌कागु दु?” छिमिसं थथे धाइ, “परमप्रभुया मिखाय् मभिंगु ज्‍या याइपिं भिं जुइ, अले इपिं खनाः लय्‌तायादी।” हानं “न्‍याय याइम्‍ह धकाः भापिम्‍ह परमेश्‍वर गन दी?” धकाः वय्‌कःयात हीमी चाय्‌कूगु दु।

यर्मिया 44:12

मिश्रय् च्‍वंवने मास्‍ति वय्‌कूपिं यहूदाय् ल्‍यनाच्‍वंपिन्‍त जिं नाश याये। मिश्र देशय् हे इपिं नाश जुइ। तरवारं वा अनिकालं इपिं नाश जुइ। चीधिकःपिंनिसें तःधिकःपिं तक सकलें मनूत तरवार व अनिकालं सी। जिं इमित लिनाछ्वयागु फुक्‍क जातितय्‌गु दथुइ जिं इमित सराः, भय, गिल्‍ला व निन्‍दाया पात्र दय्‌के।

यर्मिया 25:38

सिंहं थें वय्‌कलं थःगु गुफा त्‍वःतादी, अले क्‍वत्‍यलिपिनिगु तरवार व परमप्रभुया तच्‍वःगु तमं यानाः इमिगु देश झिजांमिजां दनी।

यर्मिया 25:11

थ्‍व फुक्‍क देश झिजांमिजां दनी अले सुनसान जुइ। थ्‍व फुक्‍क जातिं न्‍हयेदँ तक बेबिलोनयाम्‍ह जुजुया सेवा याइ।

यर्मिया 18:16

थुकथं इमिसं थःगु देशयात घच्‍चाइपुगु न्‍ह्याबलेंया निंतिं न्‍हिइकीगु खँ दय्‌कल। अनं जुयाः वये वने याइपिं सकलें वातां जुइ अले थःगु छ्यं संकी।

यशैया 43:24

छं जिगु निंतिं छुं नं नस्‍वाःगु धुपाँय् न्‍यानाहःगु मदु, छं जितः लुधंकेत छुं नं बलिया दाः हःगु मदु। उकिया पलेसा छं जितः छंगु पापया कु क्‍वबिकूगु दु, अले जितः थःगु अधर्मया ज्‍यां त्‍यानुचाय्‌कूगु दु।

यशैया 7:13

अनंलि यशैयां धाल, “हे दाऊदया घराना, न्‍यँ! मनूतय्‌गु धैर्ययात जाँचय् यानाः मगात ला? छु छं जिमि परमेश्‍वरया धैर्ययात नं जाँचय् यायेगु ला?

रोमी 9:22

परमेश्‍वरया तं व थःगु शक्ति क्‍यनादी मास्‍ति वःसा वय्‌कःयात सुनां पने फइ? वय्‌कलं थःत हीमी चाय्‌का च्‍वंपिं मनूत खनाः नं तंचाया मदिसे सहयाना तुं च्‍वनादिल।

आमोस 2:13

“स्‍व, आः ला जिं छिमित अन्‍नं जाःगु गाडां क्‍यलायंकूगु थें क्‍यले।

दानिएल 9:12

जिमिथाय् तःधंगु विपत्ति हयाः जिमिगु व जिमि शासकतय्‌गु बारे न्‍ववानादीगु बचं छिं पूवंकादीगु दु। यरूशलेमय् वःगु विपत्ति थें ज्‍याःगु विपत्ति संसारय् गन नं मवःनि।

इजकिएल 5:13

“थुकथं जिगु तं क्‍वलाइ, अले इमिगु विरोधय् दुगु जिगु तं शान्‍त जुइ। जिं थुकथं बदला काये। जिगु तं इमिके प्‍वंके धुंकाः इमिसं जि परमप्रभुं हे थःगु जोशय् थ्‍व खँ धाःगु खः धकाः सी।

यर्मिया 44:6

उकिं जिं थःगु तं यहूदाया शहर शहर व यरूशलेमया गल्‍लि गल्‍लिइ प्‍वंका। उपिं थौं तक नं झिजांमिजां दंगु व सुनसान थाय् जुयाच्‍वंगु दु।

यर्मिया 44:2

“दक्‍व शक्ति दुम्‍ह परमप्रभु, इस्राएलयाम्‍ह परमेश्‍वरं थथे धयादी – यरूशलेम व यहूदाया फुक्‍क शहरय् जिं हयागु फुक्‍क विपत्ति ला छिमिसं खंगु हे दु। थौं व झिजांमिजां दंगु सुनसान थाय् जूगु दु, अन सुं नं मच्‍वं।

यर्मिया 29:19

छाय्‌धाःसा इमिसं जिगु खँ बांलाक मन्‍यन,” परमप्रभुं धयादी। “गुगु वचन जिं थः दासत अगमवक्तातपाखें बारम्‍बार इमिथाय् छ्वयागु खः। छिपिं यरूशलेमं ज्‍वनाः बेबिलोनय् यंकूपिन्‍सं नं ध्‍यान बियाः मन्‍यं,” परमप्रभुं धयादी।

यर्मिया 26:6

जिं थ्‍व देगःयात शीलोयात थें नाश यानाबी, अले पृथ्‍वीयागु फुक्‍क जातितय्‌सं थ्‍व शहरया नां कयाः सराः बी।’”

यर्मिया 24:9

जिं इमित छगू ग्‍यानापुगु विपत्तिं सजाँय बी अले थ्‍व खँ न्‍यनाः पृथ्‍वीयापिं फुक्‍क मनूत थरथर खाइ। जिं इमित गन गन लिनाछ्वये अन मनूत इपिं खनाः न्‍हिली, मनूतय्‌सं इमित सराः बी, इमित हेस्‍याइ अले इमिगु नामय् ख्‍याः याइ।

यर्मिया 15:6

छं जितः त्‍वःतूगु दु,” परमप्रभुं धयादी। “छ लिचिला वनाच्‍वंगु दु। उकिं जिं थःगु ल्‍हाः ल्‍ह्वनाः छन्‍त नाश याये, छाय्‌धाःसा जिगु तंयात सह यायां थाकय् जुल।

यशैया 1:24

अथे जुयाः प्रभु, दक्‍व शक्ति दुम्‍ह परमप्रभु, इस्राएलया बल्‍लाःम्‍हय्‌सिनं धयादी, “आहा! जिं जिमि शत्रुतय्‌त जिगु तं क्‍यने, अले जिगु विरोध याःगुया बदला काये,

उत्‍पत्ति 19:13

छाय्‌धाःसा जिमिसं थ्‍व शहरयात नाश यायेत्‍यनागु दु। थनच्‍वंपिं मनूतय्‌गु बारे परमप्रभुं यक्‍व हे मभिंगु खँ न्‍यने धुंकल। उकिं वय्‌कलं जिमित थ्‍व शहरयात नाश यायेत छ्वयाहयादीगु खः।”

उत्‍पत्ति 6:3

अले परमप्रभुं धयादिल, “जिगु आत्‍मा मनूतय्‌गु नुगलय् सदां च्‍वनी मखु। छाय्‌धाःसा इपिं सदां दइपिं मखु। आवंलि इपिं १२० दँ स्‍वया अप्‍वः म्‍वाइ मखु।”

यर्मिया 4:4

हे यहूदा व यरूशलेमयापिं मनूत, परमप्रभुया न्‍ह्यःने थःगु नुगः हिकी। मखुसा छिमिसं याःगु मभिंगु ज्‍यां यानाः जिगु तं मि थें च्‍यानाः पिहां वइ। सुनानं उकियात स्‍याये फइ मखु।

यर्मिया 21:12

अय् दाऊदया घराना, परमप्रभुं थथे धयादी, “‘सुथ पतिकं न्‍याय या, सुयातं लुतय् याःगु खः वयात अत्‍याचार याःम्‍हय्‌सिगु ल्‍हातं त्‍वःतकि। मखुसा छिमिगु मभिंगु ज्‍यां यानाः जिगु तं मि थें ह्वानाह्वाना च्‍याइ। सुनानं उकियात क्‍वलाके फइ मखु।

यर्मिया 23:2

अथे जूगुलिं थः मनूतय्‌त ज्‍वइपिं फैजवाःतय्‌त परमप्रभु इस्राएलयाम्‍ह परमेश्‍वरं थथे धयादी, “छिमिसं जिगु बथांयात छ्यालब्‍याल यानाबिल, छिमिसं इमित लिनाछ्वत, इमित मस्‍वः। उकिं छिमिसं याःगु मभिंगु ज्‍याया निंतिं जिं थःम्‍हं हे छिमित सजाँय बी,” परमप्रभुं धयादी।

यर्मिया 29:18

इमित जिं तरवार, अनिकाल व महामारीं लिनाछ्वये। व खनाः संसारया फुक्‍क मनूत तसकं ग्‍याइ। जिं इमित लिनाछ्वयागु फुक्‍क जातितय्‌गु दथुइ जिं इमित सराः, भय, गिल्‍ला व निन्‍दाया पात्र दय्‌के।

यर्मिया 30:14

छं फुक्‍क पासापिन्‍सं छन्‍त ल्‍वःमंके धुंकल। इमिसं छन्‍त वास्‍ता मयाः। छं तःधंगु अपराध याःगुलिं व यक्‍व पाप याःगुलिं जिं छन्‍त शत्रु थें कय्‌कागु दु। अले दयामाया मदुम्‍हय्‌सिनं थें छन्‍त सजाँय बियागु दु।

यर्मिया 34:22

परमप्रभुं धयादी, ‘जिं थःम्‍हं हे आज्ञा बी, अले इमित थ्‍व शहरय् लित हये। इमिसं लडाइँ यानाः थ्‍व शहरयात त्‍याकाकाइ, अले थुकियात मिं नकाबी। अले जिं यहूदाया शहरयात मनू मदुगु सुनसान थाय् यानाबी।’”

यर्मिया 42:18

परमप्रभु, दक्‍व शक्ति दुम्‍ह इस्राएलया परमेश्‍वरं थथे धयादी, ‘गथे जिं जिगु तं यरूशलेमय् च्‍वंपिं मनूतय्‌के प्‍वंकागु खः, अथे हे छिपिं मिश्रय् वन धाःसा जिगु तं छिमिके प्‍वंके। जिं छिमित लिनाछ्वयागु फुक्‍क जातितय्‌गु दथुइ जिं छिमित सराः, भय, गिल्‍ला व निन्‍दाया पात्र दय्‌के। थ्‍व देश छिमिसं हाकनं खनी मखु।’

यर्मिया 48:9

मोआबय् चि ह्वलाब्‍यु, छाय्‌धाःसा व तहसनहस जुइ, उकिया शहरत सुं नं मनू मदय्‌क सुनसान जुइ।

इजकिएल 39:23

अले जात जातितय्‌सं इस्राएलयापिं मनूतय्‌त इमिगु थःगु पापं यानाः ज्‍वना यंकूगु खः धकाः सी, छाय्‌धाःसा इमिसं जितः विश्‍वासघात यात। उकिं जिं इपिंपाखें थःगु ख्‍वाः फस्‍वय्‌का, इमित इमि शत्रुतय्‌गु ल्‍हातय् लःल्‍हानाबिया, इपिं सकलें लडाइँलय् सित।

२ राजा 17:15

इमिसं वय्‌कःया आज्ञा पालन मयात, वय्‌कलं इमि पुर्खातलिसें चिनादीगु बाचा व वय्‌कलं बियादीगु ख्‍याच्‍वःयात हेला यात। इपिं ज्‍यालगे मजूगु मूर्तितय्‌गु ल्‍यू वन, इपिं थः नं ज्‍यालगे मजूपिं जुल। इमिसं थः जःखः च्‍वंपिं जातितय्‌सं याःथें यात। खः ला, परमप्रभुं इमित “इमिसं याःथें छिमिसं याये मते धकाः आज्ञा बियादीगु खः।” परमप्रभुं याये मते धयादीगु ज्‍या हे इमिसं यात।

यर्मिया 5:9

जिं इमित थज्‍याःगु ज्‍याया लागि छाय् सजाँय मबियेगु? जिं थज्‍याःगु जातियात छाय् बदला मकायेगु?” परमप्रभुं धयादी।

दानिएल 9:11

छिगु आज्ञा मानय् मयासें सकल इस्राएलं छिगु व्‍यवस्‍था त्‍वाथूगु दु अले छिपाखें फहिलावंगु दु। “उकिं परमेश्‍वरया च्‍यः मोशाया व्‍यवस्‍थाय् च्‍वयातःगु सराः व फैसला जिमित लाःगु दु। छाय्‌धाःसा जिमिसं छिगु खँ मन्‍यंसें पाप यानागु दु।