यर्मिया 33:11 - नेवाः बाइबल

¹¹ लसताः व खुसिया सः, भम्‍चा व जिलाजंया सः ताये दइ। अले परमप्रभुया देगलय् थथे धया सुभाय्‌या बलि हइपिनिगु सः ताये दइ, “‘दक्‍व शक्ति दुम्‍ह परमप्रभुयात सुभाय् ब्‍यु, छाय्‌धाःसा वय्‌कः भिंम्‍ह खः, वय्‌कःया दया सदां दयाच्‍वनी।’ “छाय्‌धाःसा जिं व देशयागु भिंगु दिं हाकनं लित बियाः न्‍हापायागु थें यानाबी,” परमप्रभुं धयादी।

यर्मिया 33:11 Referans Kwoze

१ इतिहास 16:34

परमप्रभुयात सुभाय् ब्‍यु, छाय्‌धाःसा वय्‌कः भिंम्‍ह खः, वय्‌कःया दयामाया न्‍ह्याबलें दयाच्‍वनी।

भजनसंग्रहया सफू 107:22

इमिसं सुभाय्‌या बलि बीमा, अले लसताया भजन हालाः वय्‌कलं यानादीगु फुक्‍क ज्‍याया बयान यायेमा।

भजनसंग्रहया सफू 107:1

परमप्रभुयात सुभाय् ब्‍यु छाय्‌धाःसा वय्‌कः भिंम्‍ह खः, वय्‌कःया दया माया सदां दयाच्‍वनी।

भजनसंग्रहया सफू 106:1

हल्‍लेलूयाह! परमप्रभुयात सुभाय् ब्‍यु, छाय्‌धाःसा वय्‌कः भिंम्‍ह खः, वय्‌कःया दया माया सदां दयाच्‍वनी।

हिब्रू 13:15

अय्‌जूगुलिं झीसं सदां ख्रीष्‍टया नामय् परमेश्‍वरयात तःधंकेमाः। थ्‍व झीगु म्‍हुतुं वय्‌कःयात छाइगु बलि खः।

यशैया 51:11

परमप्रभुं मू पुलाः छुत्‍कारा यानादीपिं हाकनं लिहां वइतिनि। इपिं सियोनय् म्‍ये हा हां दुहां वइ, अले इमिगु छ्यंया श्रीपेच न्‍ह्याबलेंया निंतिं लसता जुइ। इमिसं खुसि व लसता कायेखनी। अले दुखं व झसुका इपिंपाखें तापाक हे जुइ।

२ इतिहास 29:31

हिजकियां थः प्रजायात थथे धाल, “आः छिमिसं परमप्रभुया निंतिं थःपिन्‍त देछाःगु दु। छिपिं छिमिगु बलि व सुभाय्‌या बलि ज्‍वनाः परमप्रभुया देगलय् वा।” उकिं खलःयापिं मनूतय्‌सं बलि व सुभाय्‌या बलि हल, अले थःगु इच्‍छां बी मास्‍तिवय्‌कूपिं सकसिनं थथःगु होमबलि हल।

२ इतिहास 5:13

तुरही पुइपिं व म्‍ये हालीपिन्‍सं छसलं परमप्रभुया प्रशंसा यात अले वय्‌कःयात सुभाय् बिल। इमिसं तुरही, भुस्‍याः व मेमेगु बाजंनापं परमप्रभुया प्रशंसा थुकथं तसलं यात, “धात्‍थें वय्‌कः भिंम्‍ह खः, वय्‌कःया दयामाया सदां दयाच्‍वनी।” अबलय् परमप्रभुया देगःयात सुपाचं त्‍वपुल।

प्रकाश 18:23

मतयागु जः नं अन गुबलें थी मखुत। भम्‍चा व जिलाजंपिनिगु सः अन गुबलें ताये दइ मखुत। छन्‍थाय् व्‍यापार याःवइपिं फुक्‍कं पृथ्‍वीयापिं ततःधंपिं मनूत खः। छंगु तन्‍त्रमन्‍त्रं जात जातियापिं मनूतय्‌त झंगः लानाः थगय् याना तल।

यूहन्‍ना 3:29

भम्‍चायात ब्‍याहा याःम्‍ह हे भाःतम्‍ह जुइ। ब्‍याहा याःम्‍ह मिजंया पासा वयागु खँ न्‍यनाः तसकं लय्‌ताइ। अथे हे जि नं आः लय्‌ताय् खन।

१ इतिहास 16:8

परमप्रभुयात सुभाय् देछा, वय्‌कःया नां का जाति जातिया दथुइ वय्‌कलं छु यानादीगु खः व न्‍यंकि।

जकरिया 8:19

दक्‍व शक्ति दुम्‍ह परमप्रभुं थथे धयादी, “प्‍यंगूगु, न्‍यागूगु, न्‍हय्‌गूगु व झिगूगु लायागु अपसं व दुखं च्‍वनेमाःगु दिं आवलिं लसताया नखः जुइ। उकिं छिमिसं सत्‍य व शान्‍तियात यय्‌की।”

सपन्‍याह 3:14

हे जिमि म्‍ह्याय् सियोन, म्‍ये हा! हे इस्राएल, तस्‍सलं हा! हे जिमि म्‍ह्याय् यरूशलेम, थःगु पूरा मनं छ लय्‌ता अले न्‍ह्यइपुकि!

यर्मिया 33:7

जिं यहूदा व इस्राएलयात कैदं लित हये। जिं इमित हाकनं न्‍हापा थें हे दय्‌के।

यर्मिया 7:34

जिं यहूदाया शहर व यरूशलेमया गल्‍लि गल्‍लिइ न्‍ह्यूगु सः व लसताया सः, भम्‍चा व जिलाजंया सः मदय्‌काबी। छाय्‌धाःसा देश झिजांमिजां दनी।”

यशैया 52:9

हे यरूशलेमया भज्‍यंक नाश जूगु थाय्‌त, लसतां छसलं म्‍ये हा, छाय्‌धाःसा परमप्रभुं थः प्रजायात सान्‍त्‍वना बियादीगु दु। वय्‌कलं मू पुलाः यरूशलेमयात त्‍वःतकादीगु दु।

भजनसंग्रहया सफू 116:17

जिं छितः सुभाय्‌या बलि छाये, खः, जिं परमप्रभुया नां काये।

२ इतिहास 7:3

आकाशं मि कुहां वयाच्‍वंगु व परमप्रभुया महिमा देगलय् च्‍वनाच्‍वंगु खनाः इस्राएलीत पुलिं चुयाः भ्‍वसुल। अले इमिसं परमप्रभुयात आराधना यानाः सुभाय् ब्‍युब्‍युं धाल, “परमप्रभु भिंम्‍ह खः, वय्‌कःया दयामाया न्‍ह्याबलें दयाच्‍वनी।”

जकरिया 10:7

एफ्राइमयापिं मनूत वीर सिपाइँत थें जुइ, दाखमद्य त्‍वनाः लय्‌ताःगु थें इमिगु मन जुइ। इमि मस्‍त थ्‍व खनाः लय्‌ताइ। परमप्रभुयाके इमिगु नुगः लय्‌ताइ।

जकरिया 9:17

इपिं गुलि यइपुस्‍से च्‍वनी अले गुलि बांलाइ। देशयागु अन्‍न नयाः दाखया ति त्‍वनाः ल्‍याय्‌म्‍ह ल्‍यासेत बल्‍लानावइ।

योना 2:9

तर जिं छिगु म्‍ये हालाः छिगु नामय् बलि बिये। अले छु याये धकाः भाकल यानागु खः, व याये। परमप्रभुयापाखें हे उद्धार जुइ।”

यर्मिया 33:26

अले जक जिं याकूबयात व जिम्‍ह दास दाऊदया सन्‍तानयात त्‍वःताबी, अले वया सन्‍तानत मध्‍ये छम्‍हय्‌सित नं अब्राहाम, इसहाक व याकूबया वंशयात राज्‍य यायेत जिं ल्‍यये मखु। छाय्‌धाःसा जिं इमिगु सुख शान्‍ति लित हयाबी अले इमित दयामाया याये।’”

यर्मिया 25:10

जिं इमिगु दथुं लसता व आनन्‍दया सः, भम्‍चा व जिलाजंया सः, घःल्‍वहंया सः व मतया जः चीकाछ्वये।

यर्मिया 16:9

छाय्‌धाःसा दक्‍व शक्ति दुम्‍ह परमप्रभु, इस्राएलया परमेश्‍वरं थथे धयादी, जिं थम्‍हं हे छंगु मिखाया न्‍ह्यःने छंगु हे इलय् थ्‍व थासय् लसताया सः, आनन्‍दया सः, भम्‍चा व जिलाजंया सः जिं बन्‍द यानाबी।

नहेम्‍याह 12:43

उखुन्‍हु यक्‍व बां बिल। परमेश्‍वरं इमित लय्‌ताय्‌कादीगुलिं सकल मनूत तसकं लय्‌ताल। मिस्‍त व काय् म्‍ह्याय्‌पिन्‍सं लसता हन। इमिगु लसताया सः यक्‍व तापाक तक ताये दु।

नहेम्‍याह 8:12

अले सकल इस्राएलीत छेँ वनाः न्‍ह्यइपुइकाः भ्‍वय् नल। थःके दुगु नसा मेपिन्‍त इनाबिल, छाय्‌धाःसा व्‍यवस्‍थाया सफुतिं ब्‍वनाः न्‍यंकूगु खँ इमिसं बांलाक थुल।

एज्रा 6:22

अले इमिसं सोडा मतःगु मरिया नखः न्‍हय्‌न्‍हु तक न्‍ह्यइपुक हन। परमप्रभुं अश्‍शूरयाम्‍ह जुजुयागु मन हिलादीगुलिं अले वं इस्राएलयाम्‍ह परमेश्‍वरयागु देगःया ज्‍याय् इमित ग्‍वाहालि ब्‍यूगुलिं इपिं थथे लय्‌ताःगु खः।

यशैया 51:3

परमप्रभुं धात्‍थें हे सियोनयात सान्‍त्‍वना बियादी, अले वय्‌कलं इमिगु झिजांमिजां दंगु थाय्‌यात दया यानादी, अले मरुभूमियात अदनया बगैँचा थें व अनयागु गंगु बँयात परमप्रभुया क्‍यब दय्‌कादी। अन लसता व आनन्‍द, सुभाय्‌या म्‍येया सः न्‍यनेदइ।

२ इतिहास 20:21

मनूतय्‌के सल्‍लाह काये धुंकाः यहोशापातं परमप्रभुया भजन हालेत व वय्‌कःया पवित्रताया गौरवया प्रशंसा यायेत छुं मनूतय्‌त ल्‍यल। अले इमिसं सेनाया न्‍ह्यःने वनाः थथे धकाः म्‍ये हाल, “परमप्रभुयात सुभाय् ब्‍यु, वय्‌कःया दयामाया न्‍ह्याबलें दयाच्‍वनी।”

यशैया 35:10

अले परमप्रभुं मू पुलाः छुत्‍कारा यानादीपिं लिहां वइ। इपिं सियोनय् म्‍ये हा हां दुहां वनी। न्‍ह्याबलेंया लसता इमिगु छ्यंया श्रीपेच जुइ। इमिसं लसता व खुशी लुइकी, अले दुःखकष्‍ट व झसुका इपिंपाखें तापाक्‍क हे जुइ।

यर्मिया 17:26

अले इपिं यहूदाया शहर शहरं, यरूशलेमया जःखः च्‍वंगु थासं, बेन्‍यामीन देशं, पच्‍छिमय् च्‍वंगु फेदी, पहाडी लागा व दच्‍छिन नेगेबं होमबलित, बलित, अन्‍नबलित व धुपाँय् व सुभाय्‌या बलित हयाः परमप्रभुया देगलय् वइ।

यर्मिया 30:19

अनयापिं मनूतय्‌सं प्रशंसाया म्‍ये हाली अले लय्‌ताइ। जिं इमिगु ल्‍याः अप्‍वय्‌काबी इमिगु ल्‍याः कम जुइ मखु। जिं इमित इज्‍जत बीके, सुनानं इमित क्‍वह्यंकी मखु।

यर्मिया 32:44

बेन्‍यामीनया लागाय्, यरूशलेमया जःखः च्‍वंगु गामय्, यहूदाया शहर शहरय्, पहाडी देशया शहर शहरय्, पच्‍छिमया फेदी व नेगेवया शहर शहरय् वहः बियाः मनूतय्‌सं बुँ न्‍याइ, इमिसं साक्षी तयाः भ्‍वँतय् सही याइ अले उकी छाप तइ, छाय्‌धाःसा जिं हाकनं इमित इमिगु देशय् लित हये, जि, परमप्रभुं धाये।”

नहूम 1:7

परमप्रभु भिंम्‍ह खः, दुःखया इलय् वय्‌कः शरण कायेगु थाय् खः। वय्‌कःयाके भलसा तइपिन्‍त वय्‌कलं सुसाकुसा यानादी।

भजनसंग्रहया सफू 85:7

हे परमप्रभु! जिमित थःगु सदां दयाच्‍वनीगु माया क्‍यनादिसँ, अले जिमित थःगु उद्धार बियादिसँ।

भजनसंग्रहया सफू 147:13

छाय्‌धाःसा वय्‌कलं छंगु शहरया ध्‍वाखा बल्‍लाकादी, अले छन्‍थाय् च्‍वंपिं मनूतय्‌त सुवाः बियादी।

यशैया 52:8

ध्‍यान बियाः न्‍यँ! छिमि पाः च्‍वनाच्‍वंपिं पालेत लसतां थथे छसलं हाला हइ। परमप्रभु सियोनय् झाइबलय्, इमिसं व थःगु हे मिखां खनी।

यर्मिया 29:14

छिमिसं जितः लुइकी,” परमप्रभुं धयादी, “अले छिमित कैदं लित हये। जिं छिमित ज्‍वंकाछ्वयागु फुक्‍क जाति व फुक्‍क थासं जिं छिमित मुंके,” परमप्रभुं धयादी। “गुगु थासं जिं छिमित ज्‍वंकाछ्वयागु खः जिं छिमित व हे थासय् लित हये।”

यर्मिया 30:3

जिं जिमि प्रजा इस्राएल व यहूदायात बेबिलोनं लित हयेगु दिं वयेत्‍यंगु दु। जिं इमि पुर्खातय्‌त बियागु देशय् जिं इमित लित हये। इमिसं हाकनं उगु देशय् अधिकार याइ,’” परमप्रभुं धयादी।

आमोस 9:14

जिं थः मनू इस्राएलीतय्‌त ज्‍वना यंकूगु थासं लित हये। “भज्‍यंक नाश जुइ धुंकूगु शहरयात हाकनं इमिसं दय्‌कीतिनि, अले अन च्‍वनी। इमिसं दाखक्‍यबय् दाखमा पी अले दाखमद्य त्‍वनी। इमिसं क्‍यबय् फलया सिमात पी अले यक्‍व फलफुल नइ।