यर्मिया 32:44 - नेवाः बाइबल

⁴⁴ बेन्‍यामीनया लागाय्, यरूशलेमया जःखः च्‍वंगु गामय्, यहूदाया शहर शहरय्, पहाडी देशया शहर शहरय्, पच्‍छिमया फेदी व नेगेवया शहर शहरय् वहः बियाः मनूतय्‌सं बुँ न्‍याइ, इमिसं साक्षी तयाः भ्‍वँतय् सही याइ अले उकी छाप तइ, छाय्‌धाःसा जिं हाकनं इमित इमिगु देशय् लित हये, जि, परमप्रभुं धाये।”

यर्मिया 32:44 Referans Kwoze

यर्मिया 17:26

अले इपिं यहूदाया शहर शहरं, यरूशलेमया जःखः च्‍वंगु थासं, बेन्‍यामीन देशं, पच्‍छिमय् च्‍वंगु फेदी, पहाडी लागा व दच्‍छिन नेगेबं होमबलित, बलित, अन्‍नबलित व धुपाँय् व सुभाय्‌या बलित हयाः परमप्रभुया देगलय् वइ।

यर्मिया 33:26

अले जक जिं याकूबयात व जिम्‍ह दास दाऊदया सन्‍तानयात त्‍वःताबी, अले वया सन्‍तानत मध्‍ये छम्‍हय्‌सित नं अब्राहाम, इसहाक व याकूबया वंशयात राज्‍य यायेत जिं ल्‍यये मखु। छाय्‌धाःसा जिं इमिगु सुख शान्‍ति लित हयाबी अले इमित दयामाया याये।’”

यर्मिया 33:11

लसताः व खुसिया सः, भम्‍चा व जिलाजंया सः ताये दइ। अले परमप्रभुया देगलय् थथे धया सुभाय्‌या बलि हइपिनिगु सः ताये दइ, “‘दक्‍व शक्ति दुम्‍ह परमप्रभुयात सुभाय् ब्‍यु, छाय्‌धाःसा वय्‌कः भिंम्‍ह खः, वय्‌कःया दया सदां दयाच्‍वनी।’ “छाय्‌धाःसा जिं व देशयागु भिंगु दिं हाकनं लित बियाः न्‍हापायागु थें यानाबी,” परमप्रभुं धयादी।

यर्मिया 33:7

जिं यहूदा व इस्राएलयात कैदं लित हये। जिं इमित हाकनं न्‍हापा थें हे दय्‌के।

यर्मिया 32:10

अले जिं भ्‍वँतय् सही यानाः उकी छाप तयाबिया। अले साक्षीत सःताः ताल्‍जुइ वहः लनाबिया।

यर्मिया 32:37

स्‍व! जिं थःम्‍हं हे इमित छु छु देशय् तंमय्‌ जबरजस्‍ती पित छ्वयागु खः अनं इमित लित हयाः थ्‍व हे शहरय् मुंके। जिं इमित याउँक च्‍वनेबी।

यशैया 44:26

गुम्‍हय्‌सिनं थः अगमवक्तायागु वचनयात पूवंकादी, अले जूवइतिनिगु खँ धाइम्‍ह थः दूततय्‌गु खँ पूवंकी, “गुम्‍हय्‌सिनं यरूशलेमया बारे धाइ, ‘व शहरय् हाकनं मनूत च्‍वनी’, गुम्‍हय्‌सिनं यहूदाया शहरया बारे धाइ, ‘उपिं हाकनं दय्‌कीगु जुइ’ गुम्‍हय्‌सिनं भज्‍यंक स्‍यंकूगु थाय्‌या बारे धाइ, ‘उपिं हाकनं दय्‌कीगु जुइ’

यर्मिया 13:19

यहूदाया दच्‍छिनया शहरया ध्‍वाखा तिनातःगु दु। सुनानं उपिं ध्‍वाखात चाय्‌के फइ मखु। यहूदायापिं सकलें मनूतय्‌त ज्‍वनाः देशं पिने यंकूगु दु।

यर्मिया 30:3

जिं जिमि प्रजा इस्राएल व यहूदायात बेबिलोनं लित हयेगु दिं वयेत्‍यंगु दु। जिं इमि पुर्खातय्‌त बियागु देशय् जिं इमित लित हये। इमिसं हाकनं उगु देशय् अधिकार याइ,’” परमप्रभुं धयादी।

यर्मिया 31:23

दक्‍व शक्ति दुम्‍ह परमप्रभु, इस्राएलया परमेश्‍वरं थथे धयादी, “जिं थः मनूतय्‌त थःगु देशय् लित हयेबलय् इमिसं हाकनं छकः यहूदा देश व उकिया शहरय् हाकनं थथे धाइ, ‘परमप्रभुं थः च्‍वनीगु यरूशलेमया पवित्र डाँडायात सुवाः बियादीमा।’

यर्मिया 33:13

पहाडी देशया शहरत, पच्‍छिमया फेदीइ च्‍वंगु शहरत, नेगेवया शहरत, बेन्‍यामीनया लागा, यरूशलेमया जःखः च्‍वंगु गां व बस्‍तीत व यहूदाया शहर शहरय् फैजवाःतय्‌सं थथःम्‍हं फैच्‍वलय्‌त ल्‍याः खाइ,’ परमप्रभुं धयादी।

ओबदिया 1:19

नेगेवय् च्‍वंपिं मनूतय्‌सं एसावया डाँडा डाँडाय् अधिकार याइ, अले डाँडाया क्‍वय् क्‍वय्‌च्‍वंपिं मनूतय्‌सं पलिश्‍तीतय्‌गु देशय् अधिकार याइ। अले इमिसं सामरिया शहर व एफ्राइमया ल्‍यं दुगु लागाय् नं अधिकार याइ। अले बेन्‍यामीनं गिलादय् अधिकार याइ।

ओबदिया 1:20

इस्राएलं ज्‍वनायंकूपिं लिहां वइ अले कनान देशय् सारपत तक अधिकार याइ, यरूशलेमं ज्‍वनायंकूपिं सपारादय् च्‍वनाच्‍वंपिंन्‍सं नेगेवया शहरत अधिकार याइ।

सपन्‍याह 2:7

अले व समुद्रया सिथय् च्‍वगु देय् यहूदाया खलःयापिं ल्‍यंदुपिं मनूतय्‌गु लागिं जुइ, इमिसं अन थः फैतय्‌त ज्‍वइ। अश्‍कलोनया छेँतय् इपिं बहनी द्यनी, छाय्‌धाःसा परमप्रभु इमि परमेश्‍वरं इमिगु भिंगु दिं हाकनं लित हयादी।

जकरिया 7:7

परमप्रभुं न्‍हापा थ्‍व हे खँ न्‍हापायापिं अगमवक्तातपाखें धयादीगु खः? उबलय् यरूशलेम च्‍वन्‍ह्यानाः उकी ग्‍वाः ग्‍वाः मनूत दुगु जुल। यक्‍व मनूत उकिया जःखः च्‍वंगु चिचीधंगु शहरय् जक मखु अय्‌नं दच्‍छिन लाःगु नेगेव व पच्‍छिमय् क्‍वय् लाःगु इलाकाय् नं च्‍वंगु जुल।’”

यर्मिया 30:18

“परमप्रभुं थथे धयादी, “‘जिं थःम्‍हं हे थः प्रजायात इमिगु देशय् लित हये अले फुक्‍क परिवारयात दयामाया याये। शहरयात व नाश जूगु थासय् हे हाकनं दय्‌की। जुजुया दरबार नं हाकनं थःगु थासय् दय्‌की।