यर्मिया 30:18 - नेवाः बाइबल

¹⁸ “परमप्रभुं थथे धयादी, “‘जिं थःम्‍हं हे थः प्रजायात इमिगु देशय् लित हये अले फुक्‍क परिवारयात दयामाया याये। शहरयात व नाश जूगु थासय् हे हाकनं दय्‌की। जुजुया दरबार नं हाकनं थःगु थासय् दय्‌की।

यर्मिया 30:18 Referans Kwoze

भजनसंग्रहया सफू 102:13

पलाः ल्‍ह्वनादिसँ! सियोनयात दया यानादिसँ! सियोनयात दया यायेगु ई वये धुंकल। थ्‍व हे पाय्‌छिगु ई खः।

यर्मिया 30:3

जिं जिमि प्रजा इस्राएल व यहूदायात बेबिलोनं लित हयेगु दिं वयेत्‍यंगु दु। जिं इमि पुर्खातय्‌त बियागु देशय् जिं इमित लित हये। इमिसं हाकनं उगु देशय् अधिकार याइ,’” परमप्रभुं धयादी।

यर्मिया 33:7

जिं यहूदा व इस्राएलयात कैदं लित हये। जिं इमित हाकनं न्‍हापा थें हे दय्‌के।

यर्मिया 49:39

“अय्‌नं लिपा वइगु दिनय् जिं एलामयागु सुख शान्‍ति हाकनं लित हये,” परमप्रभुं धयादी।

यर्मिया 23:3

“जिगु बथांया ल्‍यनाच्‍वंपिन्‍त जिं इमित लिनाछ्वयागु फुक्‍क देशं मुंकाः जिं थःम्‍हं हे इमित इमिगु थःगु हे ख्‍यलय् लित हये। अले हानं इपिं च्‍वन्‍ह्याइ अले इमिगु ल्‍याः अप्‍वयावनी।

जकरिया 1:16

“उकिं जिगु दया क्‍यनेत जि यरूशलेमय् लिहां वयागु दु। जिगु देगः हाकनं दय्‌की, यरूशलेमय् नापय् यायेगु खिपः तंके याइ, अले शहरयात हाकनं दय्‌की” दक्‍व शक्ति दुम्‍ह परमप्रभुं धयादी।

यर्मिया 46:27

“हे जिम्‍ह दास याकूब, छ ग्‍याये मते। हे इस्राएलयापिं मनूत, नुगः क्‍वतुंके मते। जिं थःम्‍हं हे छिमित तापाःगु देशं व छिमि सन्‍तानयात ज्‍वनाः यंकातःगु देशं त्‍वःतकाहये। याकूबया सन्‍तानतय्‌त हाकनं शान्‍ति व सुरक्षा दइ। सुनानं वयात ख्‍याये फइ मखु।

यर्मिया 49:6

“अय्‌नं लिपा वइगु दिनय्, जिं अम्‍मोनीतय्‌गु सुख शान्‍ति हाकनं लित हये,” परमप्रभुं धयादी।

यशैया 44:26

गुम्‍हय्‌सिनं थः अगमवक्तायागु वचनयात पूवंकादी, अले जूवइतिनिगु खँ धाइम्‍ह थः दूततय्‌गु खँ पूवंकी, “गुम्‍हय्‌सिनं यरूशलेमया बारे धाइ, ‘व शहरय् हाकनं मनूत च्‍वनी’, गुम्‍हय्‌सिनं यहूदाया शहरया बारे धाइ, ‘उपिं हाकनं दय्‌कीगु जुइ’ गुम्‍हय्‌सिनं भज्‍यंक स्‍यंकूगु थाय्‌या बारे धाइ, ‘उपिं हाकनं दय्‌कीगु जुइ’

यर्मिया 31:4

हाकनं छकः जिं छिमित दय्‌के, हे कुमारी इस्राएल, छन्‍त हाकनं दय्‌कीगु जुइ। छ हाकनं भुस्‍या ज्‍वनाः लसता हनीपिंनापं प्‍याखं हुहुं पिहां वइ।

यर्मिया 33:11

लसताः व खुसिया सः, भम्‍चा व जिलाजंया सः ताये दइ। अले परमप्रभुया देगलय् थथे धया सुभाय्‌या बलि हइपिनिगु सः ताये दइ, “‘दक्‍व शक्ति दुम्‍ह परमप्रभुयात सुभाय् ब्‍यु, छाय्‌धाःसा वय्‌कः भिंम्‍ह खः, वय्‌कःया दया सदां दयाच्‍वनी।’ “छाय्‌धाःसा जिं व देशयागु भिंगु दिं हाकनं लित बियाः न्‍हापायागु थें यानाबी,” परमप्रभुं धयादी।

१ इतिहास 29:19

जिमि काय् सोलोमनयात छिगु फुक्‍क आज्ञा, व्‍यवस्‍था व विधि मानय् यायेगु व छिगु देगः दय्‌केगु मन बियादिसँ। छिगु देगः दय्‌केत जिं थुपिं सामान ज्‍वरय् यानागु दु।”

यर्मिया 29:14

छिमिसं जितः लुइकी,” परमप्रभुं धयादी, “अले छिमित कैदं लित हये। जिं छिमित ज्‍वंकाछ्वयागु फुक्‍क जाति व फुक्‍क थासं जिं छिमित मुंके,” परमप्रभुं धयादी। “गुगु थासं जिं छिमित ज्‍वंकाछ्वयागु खः जिं छिमित व हे थासय् लित हये।”

यशैया 44:28

गुम्‍हय्‌सिनं कोरेसया बारे धाइ, ‘व जिमि जवाः खः, अले जिगु फुक्‍क इच्‍छा वं पूवंकी। यरूशलेमया बारे वं धाइ, “व हाकनं दय्‌केमा,” अले देगःया बारे, “थुकियात हाकनं दय्‌की।”’

यर्मिया 31:38

परमप्रभुं धयादी, “हननेलया धरहरांनिसें कुन्‍चाय् च्‍वंगु मू लुखा तक थ्‍व शहर जिगु निंतिं हाकनं दय्‌कीगु दिं वयाच्‍वंगु दु।

यर्मिया 31:23

दक्‍व शक्ति दुम्‍ह परमप्रभु, इस्राएलया परमेश्‍वरं थथे धयादी, “जिं थः मनूतय्‌त थःगु देशय् लित हयेबलय् इमिसं हाकनं छकः यहूदा देश व उकिया शहरय् हाकनं थथे धाइ, ‘परमप्रभुं थः च्‍वनीगु यरूशलेमया पवित्र डाँडायात सुवाः बियादीमा।’

जकरिया 12:6

“उखुन्‍हु हे जिं यहूदाया नायःतय्‌त च्‍यानाच्‍वंगु सिँया दथुइ मकः वा थूतय्‌गु दथुइ च्‍यानाच्‍वंगु मिप्‍वाः थें दय्‌काबी। इमिसं जःखः च्‍वंपिं सकल मनूतय्‌त भस्‍म याइ। यरूशलेम धाःसा थःगु हे थासय् दयाच्‍वनी।

भजनसंग्रहया सफू 78:69

वय्‌कलं थःगु पवित्रथाय् स्‍वर्ग थें तःजाय्‌क दय्‌कादिल, अले पृथ्‍वी थें धिसिलाक्‍क व सदांया निंतिं दय्‌कादिल।

नहेम्‍याह 7:4

शहर तःधं अले थाय् यक्‍व दु। मनूत धाःसा कम अले आः तक नं छेँ मदय्‌कानी।

भजनसंग्रहया सफू 85:1

हे परमप्रभु, छिं थःगु देशयात माया यानादीगु दु, छिं इस्राएलयात हाकनं भिं यानादीगु दु।

जकरिया 14:10

उत्तरय् गेबांनिसें दच्‍छिन यरूशलेमय् रिम्‍मोन तक फुक्‍क जमिन माथं वनी। यरूशलेम शहर धाःसा तःजाः जुयाः बेन्‍यामीनया ध्‍वाखांनिसें न्‍हापांगु ध्‍वाखाया थाय् तक, कुन्‍चाया ध्‍वाखा तक, अले हननेलया धरहरांनिसें जुजुयागु दाख तिसीगु थाय् तक थःगु हे थासय् च्‍वनी।

यर्मिया 31:40

सीम्‍ह व नौ वांछ्वइगु फुक्‍क गाः, पुर्बपाखे किद्रोन खुसि तकयागु फुक्‍क बुँ व सल ध्‍वाखाया कुन्‍चा तक परमप्रभुया निंतिं पवित्र जुइ। व शहरयात आवंलि कब्‍जा याइ मखु वा भज्‍यंक नाश याइ मखु।”

१ इतिहास 29:1

अनंलि जुजु दाऊदं सकल मनूतय्‌त धाल, “परमेश्‍वरं ल्‍ययादीम्‍ह मनू जिमि काय् सोलोमन खः, तर व ल्‍याय्‌म्‍हचा हे तिनि, अले वयाके अनुभव मदु। थ्‍व ज्‍या तःधं, छाय्‌धाःसा थ्‍व देगः मनूया लागि मखु परमप्रभु परमेश्‍वरया निंतिं खः।

भजनसंग्रहया सफू 48:3

परमेश्‍वर थः हे यरूशलेमया किल्‍ला खः, उकिया रक्षा याइम्‍हकथं वय्‌कलं थःत क्‍यनादीगु दु।

भजनसंग्रहया सफू 48:13

छं अन दनातःगु पःखाः व किल्‍लायात बांलाक दुवालाः स्‍व, अले छं लिपाया पुस्‍तायात कने फइ।

भजनसंग्रहया सफू 122:7

छंगु पःखाः दुने नं शान्‍ति दयेमा, अले छंगु लाय्‌कू दुने नं सुरक्षा दयेमा।”

यर्मिया 29:11

छाय्‌धाःसा जिं छिमिगु निंतिं गुगु योजना दय्‌कागु दु, व जिं स्‍यू,” परमप्रभुं धयादी। “व छिमिगु भिंया लागि खः, छिमित स्‍यंकेत मखु, छिमित बांलाःगु भविष्‍य व आशा बीत।

यर्मिया 32:15

छाय्‌धाःसा दक्‍व शक्ति दुम्‍ह परमप्रभु, इस्राएलयाम्‍ह परमेश्‍वरं थथे धयादी – थ्‍व देशय् छेँ, जमिन व दाखक्‍यब हाकनं न्‍याइगु जुइ।’

इजकिएल 36:11

जिं छिमि मनूतय्‌गु व पशुतय्‌गु ल्‍याः अप्‍वय्‌काबी। इमिगु ल्‍याः न्‍हापा स्‍वयाः यक्‍व दइ। यक्‍व काय्‌म्‍ह्याय्‌पिं बुइकी। हे इस्राएलया पहाडत, न्‍हापा थें छिमिके जिं मनूत तये, न्‍हापा स्‍वयाः अप्‍वः जिं छिमित च्‍वन्‍ह्याके। अले छिमिसं जि हे परमप्रभु खः धकाः सी।

आमोस 9:14

जिं थः मनू इस्राएलीतय्‌त ज्‍वना यंकूगु थासं लित हये। “भज्‍यंक नाश जुइ धुंकूगु शहरयात हाकनं इमिसं दय्‌कीतिनि, अले अन च्‍वनी। इमिसं दाखक्‍यबय् दाखमा पी अले दाखमद्य त्‍वनी। इमिसं क्‍यबय् फलया सिमात पी अले यक्‍व फलफुल नइ।

जकरिया 1:12

अले परमप्रभुया दूतं धाल, “हे दक्‍व शक्ति दुम्‍ह परमप्रभु, न्‍हयेदंनिसें छि यरूशलेम व यहूदाया शहरतलिसे तंचायादीगु दु। ग्‍वःन्‍हु तक छिं इमित दया यानादी मखु?”

जकरिया 12:7

“दाऊदया घरानायागु हनाबना व यरूशलेमयापिं मनूतय्‌गु हनाबना यहूदायागु स्‍वयाः अप्‍वः मजुइमा धकाः परमप्रभुं न्‍हापा यहूदायापिन्‍त बचय् यानादी।

भजनसंग्रहया सफू 102:14

छिकपिनि दासतय्‌त सियोनया छगः छगः ल्‍वहं यः। अले उकिया छफुति छफुति धूयात इमिसं माया याः।

यर्मिया 32:44

बेन्‍यामीनया लागाय्, यरूशलेमया जःखः च्‍वंगु गामय्, यहूदाया शहर शहरय्, पहाडी देशया शहर शहरय्, पच्‍छिमया फेदी व नेगेवया शहर शहरय् वहः बियाः मनूतय्‌सं बुँ न्‍याइ, इमिसं साक्षी तयाः भ्‍वँतय् सही याइ अले उकी छाप तइ, छाय्‌धाःसा जिं हाकनं इमित इमिगु देशय् लित हये, जि, परमप्रभुं धाये।”