यर्मिया 27:18 - नेवाः बाइबल

¹⁸ इपिं अगमवक्तात खः अले इमिके परमप्रभुया वचन दु धइगु खःसा, परमप्रभुया देगलय् दुगु, यहूदाया जुजुया दरबारय् दुगु व यरूशलेमय् ल्‍यं दुगु मालसामान बेबिलोनय् मयंकेमा धकाः दक्‍व शक्ति दुम्‍ह परमप्रभुयाके इमिसं बिन्‍ति यायेमा।

यर्मिया 27:18 Referans Kwoze

१ शमूएल 7:8

अले इस्राएलीतय्‌सं शमूएलयात धाल, “पलिश्‍तीतय्‌गु ल्‍हातं जिमित बचय् यायेत परमप्रभु झी परमेश्‍वरयात प्रार्थना यायेगु त्‍वःते मते।”

यर्मिया 18:20

छु! भिंया पलेसा मभिं याइ ला? अय्‌नं इमिसं जिगु प्राणया निंतिं गाः म्‍हूगु दु। इपिंपाखें छिगु तं चीकाछ्वयेगु लागि जिं इमिगु पंलिनाः नवायेत जि छिगु न्‍ह्यःने दना। व लुमंकादिसँ।

१ राजा 18:24

अले छिमिसं थः द्यःयात सःती, जिं परमप्रभुया नां काये। गुम्‍हय्‌सिनं मि कुतुकाः लिसः बी वय्‌कः हे परमेश्‍वर खः।” अले फुक्‍क मनूतय्‌सं धाल, “छिं खःगु खँ धयादिल।”

१ शमूएल 12:23

जिगु लागि धाःसा, छिमिगु निंतिं प्रार्थना यायेगु त्‍वःताः परमप्रभुया न्‍ह्यःने पाप यायेगु न्‍हि जिपाखें तापाक हे जुइमा। छु यायेगु पाय्‌छि जू अले छु यायेगु भिं व जिं छिमित स्‍यनेकने याये।

१ शमूएल 12:19

अले फुक्‍क मनूतय्‌सं शमूएलयात धाल, “जिपिं सीगुपाखें बचय् जुइमा धकाः परमप्रभु छिकपिनि परमेश्‍वरयाके जिपिं छिकपिनि दासतय्‌गु निंतिं प्रार्थना यानादिसँ। छाय्‌धाःसा जिमिसं थःपिनिगु निंतिं जुजु फ्‍वनाः अझ अप्‍वः पाप यानागु दु।”

मलाकी 1:9

“हे पुजाहारीत, जिमित दया यानादिसँ धकाः परमेश्‍वरयात बिन्‍ति या! छिमिगु ल्‍हातं थज्‍याःगु बलि छानाः छु वय्‌कलं छिमित नाला कयादी ला?” दक्‍व शक्ति दुम्‍ह परमप्रभुं धयादी।

इजकिएल 22:30

“पःखाः हाकनं दय्‌काबीम्‍ह व देश जिपाखें नाश मजुइमा धकाः देशया लागि जिगु न्‍ह्यःने पःखाःया ह्वतय् दनाबीम्‍ह छम्‍ह मनू इमिगु दथुइ जिं स्‍वया, तर जिं सुं मखना।

इजकिएल 14:14

थुपिं स्‍वम्‍ह मनूत नोआ, दानिएल व अय्‍यूबं थःपिं अन दुगु दुसां इमिसं थःगु धार्मिकतापाखें थःत जक बचय् याये फइगु खः, परमप्रभु परमेश्‍वरं धयादी।

यर्मिया 42:2

अले इमिसं वयात धाल, “जिमिगु बिन्‍ति न्‍यनादिसँ, जिपिं बचय् जूपिनिगु निंतिं परमप्रभु छिकपिनि परमेश्‍वरयात प्रार्थना यानादिसँ। छाय्‌धाःसा न्‍हापा यक्‍व दुपिं जिपिं आः कम हे जक ल्‍यनाच्‍वंगु छिं खँ हे खं।

यर्मिया 15:1

अले परमप्रभुं जितः धयादिल, “मोशा व शमूएल जिगु न्‍ह्यःने दंसां थ्‍व जातिपाखे जिगु मन वनी मखु। इमित जिगु न्‍ह्यःनं पितिनाछ्व! इमित वनेब्‍यु!

यर्मिया 7:16

“उकिं, यर्मिया, छं थ्‍व प्रजाया निंतिं प्रार्थना याये मते। थुमिगु निंतिं इनाप नं याये मते। छाय्‌धाःसा जिं छंगु प्रार्थना न्‍यने मखु।

२ इतिहास 32:20

थज्‍याःबलय् हिजकिया जुजु व आमोजया काय् यशैया अगमवक्तां स्‍वर्गपाखे स्‍वयाः तःसलं प्रार्थना यात।

१ राजा 18:26

उकिं इमिसं थःत ब्‍यूम्‍ह द्वहं कयाः तयार यात। अले इमिसं सुथंनिसें बहनी तक बालया नां कयाः प्रार्थना यात। इपिं “हे बाल, जिमित लिसः बियादिसँ” धकाः चिल्‍लाय् दनाः हाल। तर छुं सः मवः, सुनानं लिसः मब्‍यू। अले इपिं थःपिन्‍सं दय्‌कूगु वेदीया छचाःखेरं प्‍याखं हुल।

उत्‍पत्ति 20:17

अब्राहामं परमेश्‍वरयात प्रार्थना यात। अले परमेश्‍वरं अबीमेलेक, वया कलाः व दासीतय्‌त नं लाय्‌कादिल। आः इपिं हानं मचा बुइकेफइपिं जुल।