यर्मिया 20:18 - नेवाः बाइबल

¹⁸ जि छाय् जन्‍म जुयागु? जिगु जीवन समस्‍या व दुःखं जाःगु दु। लज्‍या चायाः जिं थःगु जीवन फुकेगु ला?

यर्मिया 20:18 Referans Kwoze

अय्‍यूब 3:20

“परमेश्‍वरं दुःखीतय्‌त जः व नुगः क्‍वतुंपिन्‍त जीवन छाय् बियादीगु?

विलाप 3:1

परमप्रभुयागु तंया कथिया दुःखयात खंम्‍ह मनू जि हे खः।

अय्‍यूब 14:1

“मिसापाखें बूम्‍ह मनू चिहाकःगु आयु दुम्‍ह व दुःखं जाःम्‍ह जुइ।

भजनसंग्रहया सफू 69:19

जितः मनूतय्‌सं गुलि क्‍वह्यंकातःगु दु धकाः छिं स्‍यू। जि गुलि हेला याकाः मछालापुक च्‍वने मालाच्‍वंगु दु धकाः छिं स्‍यू। जिमि शत्रुतय्‌सं छु छु यानाच्‍वन धकाः छिं फुक्‍कं स्‍यू।

हिब्रू 13:13

अय्‌जूगुलिं झीपिं नं वय्‌कःया निंतिं हेला फयाः ध्‍वाखां पिने वय्‌कःयाथाय् वनेनु।

हिब्रू 12:2

अले झीगु विश्‍वास शुरु यानादीम्‍ह व क्‍वचाय्‌कादीम्‍ह येशूयात स्‍व, लिपायागु आनन्‍दया निंतिं वय्‌कः लज्‍या मचासे क्रूसया सास्‍ती फयादिल। वय्‌कः आः परमेश्‍वरया सिंहासनया जवय् च्‍वनादीगु दु।

हिब्रू 11:36

गुलिसिनं हेस्‍याकाः जुइ माल, गुलिसिनं कोर्रां दाय्‌के माल, अले गुलिसिनं चिकाः झ्‍यालखानाय् कुंके माल।

हिब्रू 10:36

परमेश्‍वरयात यःगु ज्‍या यायेत व वय्‌कलं बियादी धकाः धयादीगु कायेत छिमिसं नुगः क्‍वात्तुका च्‍वँ।

२ तिमोथी 1:12

थ्‍व हे ज्‍यायागु निंतिं जिं थथे दुःखसिया च्‍वनागु खः। थ्‍व ज्‍या यानाः जि लज्‍यामचाया छाय्‌धाःसा जिं सुयात विश्‍वास यानाच्‍वनागु दु व बांलाक स्‍यू। अले प्रभुयात जिं लःल्‍हाना बियागु फुक्‍क वय्‌कलं हानं लिहां झाया मदितले बांलाक बचय् यानातयादी।

प्रेरित 5:41

थथे येशू ख्रीष्‍टयागु नामय् दाय्‌काः दुःख सी बहःपिं जूगुलिं प्रेरितत तसकं लय्‌लय्‌तायाः सभां पिहां वन।

यूहन्‍ना 16:20

जिं छिमित खःगु खँ धाये – छिपिं ह्वाँय्‌ह्वाँय् ख्‍वय् मालीतिनि, संसारयापिं मनूत धाःसा लय्‌लय्‌ताइ। छिमित दुःख जूसां, छिमित जूगु थ्‍व दुःख सुखय् हिलावनी।

विलाप 1:12

थ्‍व लँपु जुयावनीपिं सकलें मनूत, छु छिमित थुकियागु छुं वास्‍ता मदु ला? प्‍यखेरं स्‍व व बिचाः या, थःगु तःधंगु तंया दिनय्, परमप्रभुं जितः बियादीगु दुःखकष्‍ट थें ज्‍याःगु मेगु छुं दुःख दु ला?

यर्मिया 8:18

हे जितः दुःखबलय् सान्‍त्‍वना ब्‍यूपिं, जिगु नुगः दुने कमजोर जुयावंगु दु।

यशैया 51:7

“सुनां धार्मिकता स्‍यू जिगु खँ न्‍यँ, अले सुयागु नुगलय् जिं स्‍यनातयागु खँ दु, मनूतय्‌सं दोष बी धकाः ग्‍याये मते, अले इमिसं क्‍वह्यंकी धकाः नं ग्‍याये मते।

यशैया 1:6

पालिंनिसें छेनय् थ्‍यंक घाः मजूगु थाय् हे मदु। छंगु म्‍ह छम्‍हं घालं, दागं व ख्‍वँतं जाःगु दु। उकी सिलाः चिनाब्‍यूगु मदु न चिकं तयाः नाइकाब्‍यूगु दु।

अय्‍यूब 14:13

छिं जितः चिहानय् सुचुकादीगु जूसा अले छिगु तं क्‍वमलाःतले जितः सुचुकादीगु जूसा अले जिगु लागि छगू ई क्‍वःछिनाः जितः लुमंकादीगु जूसा गुलि बांलाइगु।

अय्‍यूब 5:7

मिया कुचा च्‍वय् ब्‍वया वंगु थें, मनू नं दुःख सीत हे बुइ।

भजनसंग्रहया सफू 102:3

जिगु जीवन कुँ थें तनावनाच्‍वंगु दु, जिगु म्‍ह मि थें च्‍यानाच्‍वंगु दु,

यर्मिया 3:25

झीपिं थःगु लज्‍यां ग्‍वतुलेनु। झीगु हेलां झीत त्‍वपुइमा। थः परमप्रभु परमेश्‍वरया विरोधय् झीसं व झी पुर्खातय्‌सं पाप याना वयाच्‍वनागु दु, थःगु ल्‍याय्‌म्‍हबलय्‌निसें थौं तक झीसं थः परमप्रभु परमेश्‍वरयागु आज्ञा पालन यानागु मदु।”

यर्मिया 15:10

हाय, जिमि मां, छाय् छिं जितः बुइकादिया? जिलिसें फुक्‍क देशं ल्‍वापु व जवाःसवाः याइगु। जिं न त्‍याय् बियागु दु, न त्‍याय्‌ कयागु दु, अय्‌नं सकसिनं जितः सराः बीगु।

हबकूक 1:3

छाय् छिं जितः अन्‍याय स्‍वय्‌के बियादीगु? छाय् छिं मखुगु खँ सह यानादियागु? नाश यायेगु व स्‍याये पालीगु जिगु न्‍ह्यःने जुयाच्‍वंगु दु। ल्‍वापुख्‍यापु व कचकच प्‍यखें दु।

१ राजा 19:4

थः धाःसा मरुभूमिइ न्‍हिच्‍छि न्‍यासि वन। व छमा सिमा दुथाय् दित अले सिमाया क्‍वय् फेतुनाः वं थः सीसां जिल धकाः मतिइ तयाः प्रार्थना यात, “हे परमप्रभु, जिगु ज्‍यान कयादिसँ, आः अप्‍वः जुइ धुंकल। छाय्‌धाःसा जि थः पुर्खात स्‍वयाः भिंम्‍ह मखु।”

यर्मिया 15:18

जितः छाय् दुःख जुया तुं च्‍वंगु? जिगु घाःपाः छाय् तसकं स्‍याःगु व मलंगु? छु छि जिगु लागि धोखा बीगु खुसिचा थें व लः मदुगु मुहान थें खः ला?