यशैया 8:7 - नेवाः बाइबल

⁷ आः स्‍वः, परमप्रभुं यूफ्रेटिस तसकं खुसिबाः वयाः इमित त्‍वपू थें, अश्‍शूरया जुजु व वया महिमायात यहूदाय् हमला यायेत हयाबी। खुसिबाः वइबलय् खुसिया लः तसकं ब्‍वाँय् वं थें इपिं नं ब्‍वाँय् वइतिनी।

यशैया 8:7 Referans Kwoze

आमोस 9:5

दक्‍व शक्ति दुम्‍ह परमप्रभु परमेश्‍वर वय्‌कः हे खः, गुम्‍हं पृथ्‍वीयात थीबलय् व नायावनी, उकी च्‍वंपिं दक्‍वसिनं दुखं च्‍वनी। पृथ्‍वी खुसिबाःया इलय् नील खुसि थें थाहां वइ अले मिश्र देशया खुसि थें क्‍वहां वनी।

आमोस 8:8

“छु थुकिं यानाः पृथ्‍वी मखाइ ला? उकी च्‍वनीपिं फुक्‍कसिनं बिलाप मयाइ ला? पृथ्‍वी खुसिबाःया इलय् नील खुसि थें थाहां वइ, थ्‍व च्‍वय् थाहां वइ, अले हाकनं खुसि थें क्‍वहां वनी।”

यशैया 7:20

व दिनय् परमप्रभुं यूफ्रेटिस पारियाम्‍ह अश्‍शूरया जुजुयात छ्यलादी, व जुजुं छिमित कब्‍जा याइ अले बेइज्‍जत याइ। व जुजु ख्‍वःचा थें जुइ। अले वं छंगु दाह्री, छंगु छेनय् च्‍वंगु व म्‍हय् च्‍वंगु फुक्‍क सँ खानाबी।

यशैया 7:17

“परमप्रभुं छन्‍त, छिमि प्रजा व फुक्‍क जुजुया परिवारतय्‌त संकष्‍टया दिं हयाबी। अज्‍याःगु दिं यहूदापाखें इस्राएल राज्‍य अलग जुइगु दिनंनिसें कयाः थौं तक वःगु मदुनि। वय्‌कलं अश्‍शूरया जुजुयात देशय् हमला याकेबियादी।”

उत्‍पत्ति 6:17

“छाय्‌धाःसा जिं पृथ्‍वीइ च्‍वंपिं फुक्‍कसित न्‍हंकेत खुसिबाः वय्‌के त्‍यनागु दु। पृथ्‍वीइ च्‍वंपिं फुक्‍कं सी।

प्रकाश 17:15

अले स्‍वर्गदूतं जितः हानं धाल – “छं खंगु मिसाया लिक्‍क दुगु लःयागु अर्थ देश देशयापिं मनूत, जात जातियापिं मनूत व थीथी भाषां नवाइपिं मनूतय्‌गु हुल खः।

नहूम 1:8

तर वय्‌कलं खुसिबालं निनवेयात नाश यानादी। वय्‌कलं थः शत्रुतय्‌त खिउँगु थासय् लिनाछ्वयादी।

दानिएल 11:22

अनंलि वं छगू बल्‍लाःगु सेनायात नाश याइ, अले बाचाया राजकुमारयात नं नाश याइ।

दानिएल 11:10

वया काय्‌पिं लडाइँ यायेत तयार जुइ, अले इमिसं यक्‍व सिपाइँत मुंकी। इमिसं बाः वःगु खुसि थें न्‍ह्यज्‍याः वनाः शत्रुया किल्‍ला तक हे ल्‍वाल्‍वां वनी।

दानिएल 9:26

“अले खुइनिगू वाः लिपा व अभिषेक जूम्‍ह मनूयात स्‍याइगु जुइ अले वयाके छुं ल्‍यं दइ मखु। अले हमला याःवइम्‍ह छम्‍ह शासकया सेनां शहर व देगः नाश याइ। खुसिबाः वःगु थें अन्‍त वइ। उकिं परमेश्‍वरं तयार यानादीगु लडाइँ व विनाश हइ।

यशैया 59:19

पच्‍छिमया देशंनिसें मनूतय्‌सं परमप्रभुया नांया भय काइ, अले पुर्बंनिसें इमिसं वय्‌कःया नांया महिमा याइ। छाय्‌धाःसा वय्‌कः खुसिबाः वः थें झायादी, गुकियात परमप्रभुया सासलं बाः वय्‌की।

यशैया 28:17

जिं इन्‍साफयात नापे यायेगु खिपः व धार्मिकतायात धाःसा गं खायेगु दय्‌काबी। प्‍वँनं मखुगु खँ ल्‍हाइपिनिगु शरण कायेगु थाय् चुइकायंकी, अले लखं छिमिगु सुपीगु थाय् त्‍वःपुयाबी।

भजनसंग्रहया सफू 72:8

वयागु राज्‍य छगू समुद्रं मेगु समुद्र जुयाः न्‍यनावनेमा यूफ्रेटिस खुसिंनिसें पृथ्‍वीया कुनय् तक।

लूका 6:48

व मनू छेँ दय्‌कीम्‍ह मनू थें खः। गुम्‍हय्‌सिनं ल्‍वहंया द्यःने बल्‍लाक जग म्‍हुयाः छेँ दन। खुसिबाः वलं नं व छेँ चुइकः यंके मफुत, छाय्‌धाःसा व छेँ बल्‍लाक दय्‌कातःगु खः।

एज्रा 4:10

तःधंम्‍ह व हनाबना बहःम्‍ह अशूरवनिपलं देशं पितछ्वयाः सामरिया शहरय् व पच्‍छिम यूफ्रेटिस प्रदेशया मेमेगु थासय् हयातःपिं,

२ राजा 19:32

“उकिं अश्‍शूरया जुजुया बारे परमप्रभुं थथे धयादी, “व थ्‍व शहरय् वइ मखु, न थन छपु नं वाण कय्‌की, न ढाल ज्‍वनाः न्‍ह्यःने वये फइ, न थुकिया विरोधय् घेरय् यायेगु चा व ल्‍वहंया द्वम्‍बःचा दय्‌के फइ।

यशैया 10:5

परमप्रभुं धयादिल, “अश्‍शूरीतय्‌त धिक्‍कार, सुयागु ल्‍हातय् जिगु तंया कथि, तंया तुतां दु!

यशैया 10:16

अथे जुयाः प्रभु, परमप्रभु दक्‍व शक्ति दुम्‍ह परमप्रभुं वया तसकं बल्‍लाःपिं सिपाइँतय् दथुइ नाश यायेत ल्‍वय् छ्वयाहयादी, अले वयागु गौरवयात तसकं च्‍याःगु मिं छ्वय्‌कादी।

यशैया 11:15

मिश्र देशया समुद्रया गाःयात परमप्रभुं गंकाबी, वय्‌कलं यूफ्रेटिस खुसिइ क्‍वाःगु फय्‌नापं थःगु ल्‍हाः संकादी, अले उकियात चिचीधंगु न्‍हय्‌गू खुसिइ ब्‍वथलादी। अले अनं न्‍ह्याम्‍ह मनूत नं न्‍यासि वनाः पुलावने फइ।

यशैया 28:2

परमप्रभुं इमित हमला यायेत सुं तसकं बल्‍लाःम्‍ह व शक्तिं जाःम्‍ह मनू दय्‌कादीगु दु। वं प्‍वँया ग्‍वःफय् वइगु व तसकं वा वइगु अले पने हे मफय्‌क वइगु खुसिबालं थें देशयात भज्‍यंक स्‍यंकाबी।

यशैया 43:2

छ तःजाःगु लखं जुयाः वनीबलय् जि छनापं हे दइ। छ खुसि जुयाः वनीबलय् उकिं छन्‍त त्‍वपुइ मखु। छ मिं जुयाः वनीबलय् उकिं छन्‍त थिइ मखु। उकिया मि जलं छन्‍त छ्वय्‌की मखु।

यर्मिया 47:2

परमप्रभुं थथे धयादी, “स्‍व! उत्तरपाखे लः थाहां वयाच्‍वंगु दु। व बाः वयाच्‍वंगु लःधाः थें जुइ। वं देश व उकी दुगु फुक्‍कयात त्‍वपुयाबी, शहर व अन दुपिं सकसितं त्‍वपुयाबी। ब्‍वाँय् वनीपिं बल्‍लाःपिं सलतय्‌गु तुतिया ख्‍वःया सः, शत्रुतय्‌गु रथत तसकं ब्‍वाँय् वंगु घःचाःया सः न्‍यनाः मनूत चिल्‍लाय् दनाः हाली, अले देशय् च्‍वंपिं सकलें ख्‍वइ। अबुपिन्‍सं थःकाय् म्‍ह्याय्‌पिन्‍त ग्‍वाहालि बी मखु। इमिगु ल्‍हाः याग्‍लाप्‍याग्‍ला जुइ।

यर्मिया 51:42

बेबिलोनया च्‍वय् समुद्र थाहां वइ, उकिया थ्‍वय्‌क हालीगु लबुं वयात त्‍वपुयाबी।

इजकिएल 26:19

“परमप्रभु परमेश्‍वरं थथे धयादी – जिं छन्‍त मनूत मदुगु शहरत थें छगू तहसनहस जूगु शहर याइबलय् जिं तज्‍जाःगु समुद्रयात छंगु च्‍वय् हये, उकिया ततःधंगु लबुतय्‌सं छन्‍त त्‍वपुइ।

मीका 1:9

सामरियायागु घाः लनी मखु। व यहूदाय् नं वःगु दु, यरूशलेमया ध्‍वाखा तक नं थ्‍यंगु दु।

मीका 5:5

अले वय्‌कःपाखें जक इमित शान्‍ति दइ। अश्‍शूरीत झीगु देशय् वयाः झीगु किल्‍लाय् हमला याइबलय् झीसं न्‍हय्‌म्‍ह जवाःत वा च्‍याम्‍ह नायःत इपिंलिसें ल्‍वायेत छ्वये।

भजनसंग्रहया सफू 46:4

छगू खुसि दु गुकियागु लःधालं परमेश्‍वरया शहर, दक्‍वसिबय् तःधंम्‍ह च्‍वनादीगु थाय्‌यात लय्‌ताय्‌की।

यशैया 28:15

छिमिसं थथे धयाः घमण्‍ड याइ, “जिमिसं मृत्‍युलिसें बाचा चिनागु दु, अले सीगाःलिसें सहलह यानागु दु। तसकं तःधंगु विपत्ति जिमिथाय् वःसां, उकिं जिमित थिइ फइ मखु। छाय्‌धाःसा जिमिसं मखुगु खँ ल्‍हाइपिन्‍थाय् शरण कयागु दु, अले असत्‍ययात सुपीगु थाय् दय्‌कागु दु।”

मीका 5:4

वय्‌कलं परमप्रभुयागु शक्तिं थः परमप्रभु परमेश्‍वरया नांया गौरवय् दनाः थः बथांयात ज्‍वयादी। अले इपिं सुरक्षित जुयाच्‍वनी, छाय्‌धाःसा पृथ्‍वीया तातापाःगु थासय् तक वय्‌कःयात इज्‍जत याइ।