यशैया 41:2 - नेवाः बाइबल

² “सुनां पुर्बं सुं छम्‍हय्‌सित वय्‌कःया सेवा यायेत धार्मिकताय् सःता ग्‍वाकूगु दु? वय्‌कलं जात जातितय्‌त थःगु अधीनय् हयादी, अले जुजुतय्‌त इमिगु न्‍ह्यःने थःगु अधिकारय् हयादी। वं इमित थःगु तरवारं धू थें अले थःगु धनुष वाणं ब्‍वय्‌का यंकीगु छ्वस थें यानादी।

यशैया 41:2 Referans Kwoze

यशैया 45:1

“परमप्रभुं थम्‍हं अभिषेक यानादीम्‍ह कोरेसयात धयादी, जात जातितय्‌त त्‍याकेत, जुजुतय्‌गु ल्‍हातं अधिकार लाकाकायेत, शहर शहरया मू ध्‍वाखात चाय्‌केत व ध्‍वाखात वयागु विरोधय् गुबलें तीमफय्‌मा धकाः जिं वयात शक्ति बियागु दु, जि परमप्रभुं जुजु कोरेसयात थथे धाये,

२ शमूएल 22:43

जिं इमित धू जुइक दाया। मनूतय्‌सं लँय् ध्‍याचःयात न्‍हुत्तुन्‍हुगु थें जिं इमित न्‍हुत्तुन्‍हुया।

यशैया 46:11

पुर्बं हमला याइम्‍ह पंक्षी सःते अले ताताःपाःगु देशं जिगु इच्‍छा पूवंकेगु निंतिं जिं छम्‍ह मनूयात सःते। जिं छु धयागु दु व जिं पूवंके। जिं छु योजना दय्‌कागु दु व जिं पूवंके।

यशैया 41:25

“जिं सुं छम्‍हय्‌सित उत्तरपाखें ल्‍ययागु दु अले व वइ। पुर्बं वयाः वं जिगु नां काइ। भ्‍यातनाःयात न्‍हुतुन्‍हू थें अले कुमालं चा न्‍हुतुन्‍हू थें वं शासकतय्‌त न्‍हुइ।

यशैया 40:24

इपिं पीवं, पुसा ह्वलेवं, इमिसं बुँइ हा कायेवं वय्‌कलं इमित स्‍वांपुयादी अले इपिं सुकूचिनावनी, अले ग्‍वःफसं इमित छ्वसँ थें पुइकेयंकी।

एज्रा 1:2

“फारसयाम्‍ह जुजु कोरेसं थथे धयादी– ‘परमप्रभु स्‍वर्गयाम्‍ह परमेश्‍वरं पृथ्‍वीयागु फुक्‍क राज्‍य जितः बियादीगु दु। वय्‌कलं हे जितः यहूदाया यरूशलेमय् वय्‌कःया निंतिं छगू देगः दय्‌केत उजं बियादीगु दु।

यशैया 45:13

कोरेसयात जिगु धार्मिकताया निंतिं थनागु दु। जिं वयागु फुक्‍क लँपु तप्‍यंकाबी। वं जिगु शहर हाकनं दय्‌की, अले ज्‍वनायंकूपिं फुक्‍कसित छुत्‍कारा यानाबी। धिबा वा छुं कोसेलि मकासें हे थथे याइ।” दक्‍व शक्ति दुम्‍ह परमप्रभुं धयादी।

२ इतिहास 36:23

“फारसया महाराज कोरेसं थथे धाइ, “‘परमप्रभु स्‍वर्गय् च्‍वंम्‍ह परमेश्‍वरं पृथ्‍वीयागु फुक्‍क राज्‍य जितः बियादीगु दु। अले वय्‌कलं हे जितः यहूदाया यरूशलेमय् वय्‌कःया निंतिं छगः देगः दय्‌केगु आज्ञा बियादीगु दु। छिमिगु दथुइ दुम्‍ह सुं नं परमप्रभुया मनू च्‍वय् अन वनेमा। अले परमप्रभु छिमि परमेश्‍वर छिपिंनापं दयेमा।’”

हिब्रू 7:1

थ्‍व मल्‍कीसेदेक शालेमयाम्‍ह जुजु, अले दकलय् तःधंम्‍ह परमेश्‍वरया पुजाहारी खः। लडाइँलय् जुजुपिन्‍त त्‍याकाः लिहां वयाच्‍वंम्‍ह अब्राहामयात नाप लानाः मल्‍कीसेदेकं आशिष बिल।

२ राजा 13:7

यहोआहाजयाके नेय्‌म्‍ह सलगइपिं सिपाइँ, झिगः रथ व झिद्वः न्‍यासि जुइपिं सिपाइँत जक ल्‍यनाच्‍वन। वयाके मेपिं सिपाइँत मल्‍यन। छाय्‌धाःसा अरामया जुजुं वया मेपिं सिपाइँतय्‌त स्‍यानाः खलाया धू थें यानाब्‍यूगु खः।

उत्‍पत्ति 17:1

अब्राम गुइगुदँ दुबलय् परमप्रभु अब्रामयाथाय् खनेदय्‌कः झाल। अले वयात धयादिल, “जि दक्‍व शक्ति दुम्‍ह परमेश्‍वर खः। जिं धाःथें या, अले दोष मदय्‌क जु।

उत्‍पत्ति 11:31

तेरह थःकाय् अब्राम, हारानया काय् थः छय् लोत, अब्रामया कलाः थः भौ साराईयात ज्‍वनाः कनानपाखे वनेत कल्‍दीतय्‌गु शहर ऊर त्‍वःतावन। तर इपिं हारान शहरय् थ्‍यनाः अन हे च्‍वन।

प्रकाश 7:2

म्‍वाःम्‍ह परमेश्‍वरयागु छाप ज्‍वनाः सूर्य लुइगु थासं थाहां वयाच्‍वंम्‍ह छम्‍ह स्‍वर्गदूतयात जिं खना। अले वं समुद्र व पृथ्‍वीयात स्‍यंकेगु अधिकार बियातःपिं प्‍यम्‍ह स्‍वर्गदूततय्‌त तसकं हालाः थथे धाल।

प्रकाश 16:12

खुम्‍हम्‍ह स्‍वर्गदूतं थःगु ख्‍वल्‍चा तःधंगु यूफ्रेटिस खुसिइ प्‍वंकल। अले पुर्बयापिं जुजुपिं वये जीक खुसिया लः सुनावन, लँ दत।

यशैया 41:3

वं इमित लिनाछ्वइ, न्‍हापा वं हे मवंनिगु लँपु जुयाः व छुं हानि मजुइक न्‍ह्यांवनी।

यशैया 42:6

“जि, परमप्रभुं जिगु धार्मिकताकथं छन्‍त सःतागु दु, जिं छंगु ल्‍हाः ज्‍वनाः छन्‍त रक्षा याये। जिं छन्‍त जिमि मनूतलिसें जिगु बाचाया चिं अले यहूदीमखुपिनिगु निंतिं जः दय्‌काबी।

यशैया 48:15

खः, धात्‍थें हे जिं थ्‍व धयागु खः। जिं वयात सःतागु दु। जिं वयात हये, अले व थःगु ज्‍याय् ताःलाइ।

विलाप 1:15

“परमप्रभुं जितः रक्षा याइपिं दकलय् बल्‍लाःपिं फुक्‍क सिपाइँतय्‌त क्‍वह्यंकादीगु दु। वय्‌कलं जिमि ल्‍याय्‌म्‍हपिं मनूत नाश यायेत सिपाइँत छ्वयादिल। दाखयात तिसीगु थें परमप्रभुं जितः, यहूदाया कन्‍या म्‍ह्याय्‌यात तिसिनादिल।