प्रस्‍थान 4:11 - नेवाः बाइबल

¹¹ परमप्रभुं वयात धयादिल, “मनूतय्‌गु म्‍हुतु सुनां दय्‌कल? मनूतय्‌त लाता व ख्‍वाँय् सुनां याइ? मनूतय्‌त स्‍वये फुम्‍ह व कां सुनां याइ? छु जि परमप्रभुं हे, मखु ला?

प्रस्‍थान 4:11 Referans Kwoze

आमोस 3:6

गुगुं शहरय् लडाइँया तुरही पुइबलय् मनूत मग्‍याइ ला? परमप्रभुं मछ्वतले छु गुगुं शहरय् विपत्ति वइ ला?

भजनसंग्रहया सफू 146:8

परमप्रभुं मिखां मखंपिन्‍त मिखां खंकादी, परमप्रभुं ग्‍वतुलाच्‍वंपिन्‍त थनादी। परमप्रभुं भिंपिं मनूतय्‌त माया यानादी।

यशैया 6:7

अले वं जिगु म्‍हुतुइ व हेंग्‍वामिं थीकाः थथे धाल, “स्‍व, थुकिं छंगु म्‍हुतुइ थ्‍यूगु दु। आः छंगु दोष हुयाछ्वये धुंकल अले छंगु पाप क्षमा जुल।”

भजनसंग्रहया सफू 94:9

छिमित न्‍हाय्‌पं ब्‍यूम्‍हय्‌सिनं मताइ ला? छिमित मिखा ब्‍यूम्‍हय्‌सिनं मखनी ला?

भजनसंग्रहया सफू 51:15

हे परमप्रभु, जिगु म्‍हुतु चायेकादिसँ, अले जिं छितः प्रशंसा याये।

यर्मिया 1:9

अनंलि परमप्रभुं ल्‍हाः ताहाक यानाः जिगु म्‍हुतुसि थियादिल, अले धयादिल, “स्‍व, जिं थःगु वचन छंगु म्‍हुतुइ तयाबियागु दु।

यर्मिया 1:6

जिं धया, “स्‍वयादिसँ परमप्रभु परमेश्‍वर, जि ला नवाये नं मसः, जि ला मचा हे तिनि।”

इजकिएल 33:22

व मनू थ्‍यंकः वःगु दिंया छन्‍हु न्‍ह्यःयागु सन्‍ध्‍याकाः इलय् परमप्रभुया शक्ति जिके वल। सुथय् व मनू थ्‍यंकः वये न्‍ह्यः वय्‌कलं जिगु म्‍हुतु चाय्‌काबिल। उकिं जिगु म्‍हुतु चाल, उबलय्‌ निसें जि सुम्‍क मच्‍वना।

उत्‍पत्ति 18:14

परमप्रभुया लागि थाकुगु धयागु छु दु? जि दच्‍छि लिपा जिं धयागु इलय् छन्‍थाय् लिहां वये। उबलय् साराया काय् दये धुंकी।”

मत्ती 11:5

कांपिन्‍सं मिखां खन, लंग्रात न्‍यासि वने फत, कोह्रित लाया वन, ख्‍वाँय्‌तय्‌सं ताल, सीपिं मनूत हानं म्‍वानावल, अले चीमिपिन्‍सं भिंगु खँ न्‍यन।

यशैया 42:7

गुकिं यानाः छं मिखां मखंपिन्‍त खंकाबी कुना तःपिं कैदीतय्‌त झ्‍यालखानां व खिउँगु थासय् च्‍वंपिन्‍त खिउँगु कालकोठरीं लिकाइ।

लूका 1:20

मजुसे मगाःगु जिं धयागु खँय् छं विश्‍वास मयाःगुलिं थथे मजुतले छ पाकः जुयाच्‍वनी।”

लूका 1:64

अबलय् हे वं न्‍हापा थें तुं नवाये फत। अले वं परमेश्‍वरयात तःधंकल।

यूहन्‍ना 10:21

मेपिन्‍सं थथे धाल – “भूत दुब्‍यूम्‍ह मनुखं थज्‍याःगु खँ ल्‍हाइ मखु। कांम्‍ह मनूयागु मिखा भूत दुब्‍यूम्‍ह मनुखं चाय्‌काबी फइ ला?”

उत्‍पत्ति 11:7

कुहां वनेनु, अले झीसं इमिगु भाय्‌यात ल्‍वाकःबुकः याये। अले इमिसं थवंथवय् धाःगु खँ थुइ मखु।”

हितोपदेश 20:12

न्‍यनेत न्‍हाय्‌पं व स्‍वयेत मिखा नितां परमप्रभुं बियादीगु खः।