एफिसी 2:2 - नेवाः बाइबल

² थ्‍व संसारयापिं मनूतय्‌सं थें छिमिसं नं पापी ज्‍याखँ याना जूगु खः। अले मभिंगु ज्‍याखँया नायः शैतानं धाःथें जुयाच्‍वंगु खः। थ्‍व शैतानं परमेश्‍वरयात विश्‍वास मयाःपिन्‍त थःगु ल्‍हातय् कयातःगु दु।

एफिसी 2:2 Referans Kwoze

एफिसी 6:12

झीगु ल्‍वापु मनूतलिसे मखु। बरु आकाशय् च्‍वंगु दुष्‍ट आत्‍माया शक्ति, थ्‍व खिउँगु संसारया शक्ति अले थ्‍व संसारया शासकत व अधिकार दुपिनिगु फौज लिसे खः।

१ यूहन्‍ना 5:19

झीपिं परमेश्‍वरया सन्‍तान खः, अले थ्‍व संसारय् च्‍वंपिं मेपिं फुक्‍क मनूत शैतानया मनूत खः धकाः नं झीसं स्‍यू।

एफिसी 2:3

झीपिं नं छकः इपिं थें हे जुइ धुनागु दु, झीसं नं थःत यःथें यानाः मोजमज्‍जा याना जुइ धुन। थुकथं मेपिं थें झीपिं नं परमेश्‍वरयागु तं फये मालीपिं जुइ धुन।

यूहन्‍ना 12:31

आः थ्‍व संसारयागु न्‍याय जुइ। आः थ्‍व संसारयाम्‍ह शासकयात पितिनाछ्वइ।

एफिसी 5:6

छिमिसं सुयागुं बकंफुस्‍लु खँ न्‍यने मते। थुकिं छिमित स्‍यंकी। परमेश्‍वरयात विश्‍वास मयाइपिन्‍सं वय्‌कःयागु तं फयेमाली।

यूहन्‍ना 8:44

छिकपिं शैतानया सन्‍तान जूगुलिं गथे छिकपिनि बाःनं याना जुल, अथे हे छिकपिन्‍सं नं याना जुइ। न्‍हापांनिसें हे शैतान धाःम्‍ह ज्‍यानमारा खः। वयाके सत्‍य धयागु हे मदुगुलिं वं सत्‍य ज्‍याखँ याना जुइ फइ मखु। थःगु स्‍वभाव गथे खः अथे हे वं मखुगु खँ जक ल्‍हाना जुइ, छाय्‌धाःसा व मखुगु खँ जक ल्‍हाना जुइम्‍ह खः, अले मखुगु खँ ल्‍हाना जुइपिनि अबु खः।

एफिसी 4:22

थःत हे स्‍यंकीगु न्‍हापायागु चालचलनयात छिमिसं त्‍वःताछ्व।

१ कोरिन्‍थी 6:11

छिपिं मध्‍ये नं गुम्‍हं गुम्‍हं न्‍हापा थथे हे याना जुइ धुंकूपिं खः। आः ला छिमिगु पाप सिले धुंकूगु दु। छिपिं परमेश्‍वरयात देछाये धुंकूपिं मनूत खः। झी परमेश्‍वरया आत्‍मां प्रभु येशू ख्रीष्‍टयागु नामं छिमित परमेश्‍वर नाप मिलय् यानादीगु दु।

२ कोरिन्‍थी 4:4

थ्‍व संसारया द्यवं विश्‍वास मयाःपिनिगु मनयात छुं हे थुइके मफय्‌क कां यानातःगु दु। अथे जूगुलिं इमिसं भिंगु खँ थुइके फइ मखु। अले ख्रीष्‍टया महिमा गुलि तःधं व वय्‌कः हे झःझः धाःम्‍ह परमेश्‍वरयागु रूप खः धकाः इमिसं सी मखु।

१ यूहन्‍ना 5:4

वय्‌कःया सन्‍तानतय्‌सं थ्‍व संसारयात बुकी। वय्‌कःयात विश्‍वास यानागुलिं झीसं संसारयात त्‍याके फइ।

१ यूहन्‍ना 3:10

परमेश्‍वरया सन्‍तान व शैतानया सन्‍तान थुकिं हे बांलाक सी दइ। बांलाःगु भिंगु ज्‍या मयाइम्‍ह, अले थः दाजुकिजापिन्‍त माया मयाइम्‍ह मनू परमेश्‍वरया सन्‍तान मखु।

१ पत्रुस 1:14

वय्‌कलं धयादी थें च्‍वनाच्‍वँ। न्‍हापा मस्‍यूनिबलय् याना जू थें छिमिसं आः नं अज्‍याःगु मभिंगु ज्‍या याना जुइ मते।

प्रकाश 20:2

अजिङ्‌गर धाःसां ज्‍यूम्‍ह, पुलांम्‍ह सर्प धाःसां ज्‍यूम्‍ह, दुष्‍ट व शैतान धाःसां ज्‍यूम्‍हय्‌सित व स्‍वर्गदूतं ज्‍वनाः द्वःछि दँ तक चिनातल।

१ यूहन्‍ना 4:4

अय् जि यःपिं मस्‍त, छिपिं परमेश्‍वरया मनूत खः, उकिं अज्‍याःपिं फताहा अगमवक्तातय्‌त छिमिसं बुकाछ्वःगु दु। थ्‍व संसारय् च्‍वंम्‍ह आत्‍मा स्‍वयाः छिमिगु नुगलय् च्‍वनादीम्‍ह आत्‍मा तसकं बल्‍लाः।

१ पत्रुस 4:3

परमेश्‍वरयात म्‍हमस्‍यूपिन्‍सं याना जू थें न्‍हापा छिमिसं नं थः यःथें यानाजुइगु, व्‍यभिचार यायेगु, अय्‌लाः थ्‍वँ त्‍वना जुइगु, मोजमज्‍जा यायेगु, मूर्ति पुजा यायेगु याना जुइ धुंकल।

कलस्‍सी 1:21

छिपिं नं न्‍हापा मभिंगु ज्‍याखँय् जुयाः परमेश्‍वर नाप तापानाः वय्‌कःया शत्रु जुयाच्‍वंगु खः।

गलाती 1:4

थ्‍व मभिंगु इलं बचय् यायेत झीगु पापयागु निंतिं झी परमेश्‍वर बाःनं धयादी थें येशू थः हे सिनादिल।

रोमी 12:2

आवंनिसें थ्‍व संसारयापिं मनूतय्‌सं याना जू थें छिमिसं याना जुइ मते, बरु मनयात हीकाः न्‍हूपिं मनूत जुयाच्‍वँ। थुकथं याना जूसा परमेश्‍वरयागु इच्‍छा छु खः, अले भिंगु, वय्‌कःयात यःगु, व छु खँ ठीक जू छिमिसं बांलाक सीके थुइके फइ।

याकूब 4:4

हे विश्‍वास त्‍वःतूपिं मनूत, संसारयात माया याइपिं परमेश्‍वरया शत्रु खः धकाः छिमिसं मस्‍यू ला? संसार नाप मिलय् जुइपिन्‍सं परमेश्‍वरयात शत्रु याइ।

१ कोरिन्‍थी 5:10

अथे धकाः जिं व्‍यभिचार याइपिं, लोभीत, खुँत, मूर्ति पुजा यानाजुइपिं, थज्‍याःपिं परमेश्‍वरयात म्‍हमस्‍यूपिं मनूत नाप बुला जुइ मते धकाः धयागु मखु। थुपिंलिसे अलग जुइत स्‍वःसा ला छिमिसं थ्‍व संसार हे त्‍वःतावने माली।

प्रेरित 5:3

थ्‍व खँ पत्रुसं सियाः धाल – “हननिया, शैतानयात थःगु नुगलय् तयाः छिं पवित्र आत्‍माया न्‍ह्यःने छाय् मखुगु खँ ल्‍हानादियागु? जग्‍गा मियाः वःगु धिबा भचा छिकपिन्‍सं सुचुकादियागु मखु ला?

यूहन्‍ना 15:19

छिपिं संसारयापिं मनूत जूगु जूसा संसारं छिमित थःपिं धकाः माया याइगु, तर जिं छिमित संसारं ल्‍यये धुनागुलिं छिपिं संसारयापिं मखुत, उकिं इमिसं छिमित यय्‌की मखु।

यूहन्‍ना 14:30

“थ्‍व संसारयात शासन याइम्‍ह वयाच्‍वंगु दु, उकिं जि छिपिंनाप अप्‍वः खँ ल्‍हाना च्‍वने मखुत। वलिसे जिगु छुं स्‍वापु मदु।

यशैया 30:1

परमप्रभुं धयादी, “धिक्‍कार! उपिं अतेरि काय् म्‍ह्याय्‌पिन्‍त,” सुनां योजना दय्‌काः ज्‍याझ्‍वः न्‍ह्याकि तर उपिं जिगुपाखें मखु, सुनां स्‍वापु तइ, तर जिगु आत्‍मां मखु, अले पापय् पाप थपय् यानाब्‍यूगु दु।

अय्‍यूब 1:7

परमप्रभुं वयात न्‍यनादिल, “छ गनं वयागु?” वं धाल, “पृथ्‍वीइ थुखे उखे चाःहिलाः वयागु।”

२ पत्रुस 2:14

इमिसं न्‍ह्याबलें व्‍यभिचार यायेत जक स्‍वयाच्‍वनी। न्‍ह्याक्‍व हे पाप याना जूसां इपिं गुबलें लुमधं। इमिसं बमलाःपिं मनूतय्‌त थःगु ल्‍हातय् काइ। अले इमिगु मन हे लोभ यायेगु ज्‍याय् लाये धुंकल। परमेश्‍वरयागु सराः इमित हे लाइ।

यूहन्‍ना 16:11

वय्‌कलं परमेश्‍वरया न्‍याय छु खः क्‍यनादी, छाय्‌धाःसा थ्‍व संसारया शासक न्‍हापा हे दोषी खः धकाः न्‍याय याये धुंकल।”

यूहन्‍ना 13:27

मरि कुचा काये धुंकाः वयाके शैतान दुबित। अले येशूं वयात धयादिल – “छं यायेत्‍यनागु ज्‍या याकनं याः हुँ।”

यूहन्‍ना 13:2

बहनी नयाच्‍वंबलय् येशूयात धोखा बीगु खँ सिमोनया काय् यहूदा इस्‍करियोतयागु मनय् शैतानं तयाबी धुंकल।

यूहन्‍ना 8:23

अले वय्‌कलं इमित धयादिल – “छिकपिं क्‍वय्‌च्‍वंपिं खः, जि च्‍वय्‌च्‍वंम्‍ह खः। छिकपिं थ्‍व संसारयापिं खः, जि संसारयाम्‍ह मखु।

यूहन्‍ना 7:7

संसारय् च्‍वंपिन्‍सं छिमित हेला याये फइ मखु। जिं संसारय् च्‍वंपिन्‍सं याना जूगु ज्‍याखँ मभिं धकाः धयागुलिं इमिसं जितः हेला याइ।

मत्ती 13:38

बुँ थ्‍व संसार खः। भिंगु पुसा परमेश्‍वरया राज्‍ययापिं मनूत खः। अले नामायागु पुसा शैतानया मनूत खः।

प्रकाश 13:8

अले पृथ्‍वीइ च्‍वंपिं फुक्‍कसिनं व पशुयात पुजा याइ। संसारयागु सृष्‍टि जूसांनिसें स्‍याःम्‍ह चीधिकःम्‍ह भ्‍याःचाया जीवनयागु सफुलिइ नां च्‍वया मतःपिं फुक्‍कसिनं वयात पुजा याइ।

१ यूहन्‍ना 3:8

शैतानं न्‍हापांनिसें पाप याना वयाच्‍वंगु दु, उकिं पाप यानां तुं च्‍वनीपिं मनूत नं शैतानया मनू खः। अथे जूगुलिं शैतानयागु ज्‍या स्‍यंकेत परमेश्‍वरया काय् थन झायादी माःगु खः।

याकूब 1:7

अथे मनय् संका तया जुइम्‍ह मनूयात परमेश्‍वरं छुं हे बियादी मखु।

२ तिमोथी 4:10

डेमास थ्‍व संसारयात माया यानाः जितः त्‍वःताः थेसलोनिकाय् वने धुंकल। क्रेसेन्‍स गलातियाय् वन, तीतस दलमातियाय् वन।

प्रेरित 19:35

अले शहरयाम्‍ह हाकिमं इमित सुम्‍क च्‍वं धकाः ल्‍हाःभाय् यानाः थथे धाल – “अय् एफिससयापिं दाजुकिजापिं, एफिसीतय्‌गु शहर थपाय्‌धंम्‍ह आर्तेमिस द्यःमय्‌जुया देगः व आकाशं कुतुं वःगु वयागु मूर्तिया रक्षक खः धकाः सुनां मस्‍यू?

लूका 22:31

“सिमोन, सिमोन न्‍यँ, शैतानं छिमित छ्व हाये थें हायेत उजं काये धुंकल।

लूका 16:8

“व मभिंम्‍ह दांभरिंनं अथे चलाखि ज्‍या याःगुलिं वया मालिकं वयागु तारिफ यात। थुकिं सीदत, थ्‍व संसारयापिं मनूत थःत माल धायेवं चलाख जुइ सः, तर परमेश्‍वरया मनूत धाःसा अथे मखुगुलिइ चलाख जुयाः सना जुइ मसः।

मत्ती 11:19

मनूया काय्‌नं नयेत्‍वने याना जुल। इमिसं वयात – ‘नगुलु, अय्‌लाःगुलुत व कर काइपिनि व पापीतय् पासा’ धकाः धयाजुल। इमिगु बुद्धि ला इमिगु ज्‍यां हे क्‍यं।”

यर्मिया 23:10

छाय्‌धाःसा थ्‍व देश व्‍यभिचारी हे व्‍यभिचारीं जाःगु दु। सराः लाःगुलिं देश सुख्‍खा जूगु दु। मरुभूमियागु पशु ज्‍वयेगु थाय् गंगु दु। अगमवक्तात मभिंपाखे ब्‍वाँय् वंगु दु, इमिसं थःगु शक्ति मखुथाय् छ्यःगु दु।

यशैया 57:4

छं सुयात गिजय् यानाच्‍वनागु? छिमिसं सुयागु विरोधय् खँ ल्‍हानाः मे पिकयाच्‍वनागु? छु छिपिं हे विद्रोही मनूत थें ज्‍या याइपिं अले मखुगु खँ ल्‍हाइपिं थें ज्‍या याइपिं, मखु ला?

भजनसंग्रहया सफू 17:14

जीवनय् थःत यःगु फुक्‍क खँ धायेफु धकाः जुइपिं मनूतपाखें जितः बचय् यानादिसँ। इमिगु लागिं छिं मुंकातयादीगु दुःखं इमित सजाँय बियादिसँ। अज्‍याःगु सजाँय इमि सन्‍तान तकयात यक्‍व दयेमा, अले इमि छय्-छुइपिनिगु लागिं नं छुं ल्‍यनेमा।

अय्‍यूब 31:7

जिगु पलाः मखुगु लँय् वंगु दुसा, जिगु मनं मिखाया इच्‍छा कथं याःगु दुसा, अथवा जिगु ल्‍हातय् दाग प्‍यपुनाच्‍वंगु दुसा,

प्रकाश 16:17

न्‍हय्‌म्‍हम्‍ह स्‍वर्गदूतं थःगु ख्‍वल्‍चा फसय् प्‍वंकल। परमेश्‍वरया देगःया सिंहासनं थथे धकाः तसलं धयाहल – “आः सिधल।”

प्रकाश 13:14

न्‍हापांयाम्‍ह पशुयागु न्‍ह्यःने हे वयात अथे चिं क्‍यनेगु अधिकार ब्‍यूगुलिं पृथ्‍वीइ च्‍वंपिन्‍त थ्‍वं ध्‍वंलायेगु याना जुल। तरवारं पालाः घाः जुलं हे म्‍वानाच्‍वंम्‍ह न्‍हापांयाम्‍ह पशुयागु मूर्ति दय्‌कि धकाः फुक्‍कसितं उजं बिल।

प्रकाश 12:9

अले व तसकं ग्‍यानापुसे च्‍वंम्‍ह अजिङ्गरयात क्‍वय् क्‍वफाना हल। फुक्‍क संसारय् च्‍वंपिन्‍त थगय् याइम्‍ह पुलांम्‍ह सर्प व हे खः। वयात दुष्‍ट व शैतान धकाः नं धाः। वयात व वया दूततय्‌त पृथ्‍वीइ वान्‍छ्वया हल।

होशे 10:9

परमप्रभुं धयादी, “अय् इस्राएल, गिबाय् पाप याःबलय् निसें छं आः तक नं जिगु विरोधय् पाप यायेगु मत्‍वःतूनी। दुष्‍ट ज्‍या याइपिनिगु विरोधय् लडाइँनं छु गिबाय् इमित नाप मलाइ ला?

अय्‍यूब 1:19

मरुभूमिं तसकं वाफय् वयाः छेँयात थुनाबिल, छिकपिनि काय्‌म्‍ह्याय्‌पिं सकलें सित। जि याकःचा जक छितः खबर बीत बचय् जुल।”

अय्‍यूब 1:16

वं थथे धयाच्‍वंबलय् हे मेम्‍ह च्‍यः वयाः थथे धाल, “फैत व फैजवाःत परमेश्‍वरया मि आकाशं कुतुं वयाः सित। जि याकःचा जक छितः खबर बीत बचय् जुल।”

मत्ती 13:22

परमेश्‍वरयागु वचन न्‍यनाः नं धन सम्‍पत्तियागु माया कयाजुइपिं व संसारयागु खँय् च्‍यूताः तया जुइपिं मनूत कंमा दुथाय् लाःगु पुसा थें खः। थुमिसं परमेश्‍वरयागु वचनयात गुम्‍से यानाबी। अले थुकिं अन्‍न सय्‌की मखु।

मर्कूस 4:19

अथेसां थ्‍व संसारयागु धन्‍दा, धन सम्‍पत्तियागु माया व अथे हे मेमेगु लोभं यानाः परमेश्‍वरयागु वचन त्‍वःफिना वनी, अले छंु नं सय्‌के फइ मखु।

एफिसी 1:21

ख्रीष्‍ट फुक्‍क अधिकार दुम्‍ह, शासन यानादीम्‍ह, शक्तिं जाःम्‍ह व फुक्‍क प्रभुत स्‍वयाः नं तःधंम्‍ह खः। वय्‌कःयात थ्‍व संसारय् जक मखु, वइतिनिगु संसारय् नं फुक्‍क नां स्‍वयाः च्‍वय् तयादिल।

एफिसी 2:11

न्‍हापायागु खँ लुमंकी, म्‍हय् चिं तयातःपिं यहूदीतय्‌सं छिमित म्‍हय् चिं मतःपिं यहूदीमखुपिं धकाः धाइगु खः।

एफिसी 2:13

उबलय् छिपिं ख्रीष्‍ट येशूपाखें तापाना च्‍वंपिं खः। आः धाःसा छिमित ख्रीष्‍टयागु हिं हे वय्‌कः नाप सत्तिकादिल।

एफिसी 4:17

जिं प्रभुयागु नामय् धयाच्‍वनागु दु – छिपिं आः हानं परमेश्‍वरयात म्‍हमस्‍यूपिं थें याना जुइ मते। इमिगु बिचाः हे बांमलाः।

एफिसी 5:8

न्‍हापा ला छिपिं नं खिउँथाय् जुयाच्‍वंपिं खः। आः छिपिं प्रभुया जलय् वये धुंकल। उकिं छिमिगु ज्‍याखँ नं थुकथं हे जुइमाः।

याकूब 1:27

परमेश्‍वर बाःयात यःगु भिंगु बांलाःगु धर्म ला मांबौ मदुपिं मस्‍तय्‌त व भाःत मदय्‌ धुंकूपिं मिसातय्‌त दुःख जुइबलय् ग्‍वाहालि यायेगु, अले थ्‍व संसारय् मभिंगु ज्‍याखँ मयासें पवित्र जुयाच्‍वनेगु खः।