Sekaraia 7:12 - Nobonob Baibel12 Ag ahilag dabmak dim lamidkkulagnu, ag eɗun Yawe dim lamidmananu dabmenana heegeg, dabmak ahilag amu ɠagattagnab eppe, ag ɗo nai, Yawe Nukka Ɠagattag Oh Ele ag dooglagnu me uɗiom, ag amu doyaknu uuppig. Yawenu Ouɗi Nug propet danab anukkanu nai matte, ag danab ah amelagppa mattieg dooppig, amge ag nuhig nai amu ele dooglagnu uuppig, diig amunu Yawe Nukka Ɠagattag Oh Ele Nug ahilagnu oo nauhak huanak doyom. Gade chapit la |
Aɗinu? Danab ah imu ag am oolag ɠagattag eppom. Ag daulagppa nai meu dooglagnu nakokib elele, amu ele ag heeg, ag amelag amuhak daatte. Amu iitta daalo, ag amelagppa keeke anidna, daulagppa nai doona, ag nai diig oolagppa tutukku doona, ag eɗun dahilppa dokkulagtai. Ag anam hekkulag dayeb amu, da heppi, ag ena daaglag.’ Aisaia nug anam yom.
Aɗinu? Danab ah imu ag oolag ɠagattag eppom. Ag daulagppa dooglagnu nakokib elele. Ag amelag heeg amuhak daatte. Amu iitta daalo, ag amelagppa keeke anidna, daulagppa nai doonna, ag nai diig oolagppa tutukku doona, ag eɗun dahilppa dokkulagtai. Ag anam hekkulag dayeb amu, da heppi, ag ena daaglag.” Aisaia nug anam yom.
Israel danab ah ag hib guitta qak danab ah; dabmak ahilag ele ɠagattag eppom daatte. Ag anam daatteb, amge da na Israel danab ah dahilad nai madakkutnu meidttem. Da na ag amelagppa nai appe dooglagnu appi doon, na, ‘Naɗi Yawe Nug inam atte,’ ag amelagppa awona, tuɗidna, na keeke oh da na ippunidkkul ag amelagppa a!
Naɗi Nug anam ana, Nug da amelppa nai tuɗitta aum. “Heppe, danab ah imu ag oolag ɠagattag eppaɗ! Heppe, ag daulag nai dookkunu elele iitta dayaɗ! Heppe, ag amelag amuhak dayaɗ! Amu iitta daalo, ag amelagppa keeke anidna, daulagppa nai doonna, ag nai diig oolagppa tutukku doona, ag eɗun dahilppa dokkulagtai. Ag anam hekkulag dayeb amu, da heppi, ag ena daaglag,” awa aum.
Yawe Nug nai amu da meɗom, amu Nug nai amuib nuhig propet anukkanu, Nug ag oɗelagppa Juda danab ah iite madattom. Amu Nug ag amelagppa nai amu mattiaya aum, haen amuppa Jerusalem danab ah, aab laala Jerusalem talilidna daatteb ele dilag danab ah ele ag maɗoɗ, keekenu ele eleleppa daaegeg, amu Juda wan ooppa aben laa onig Negeb, amu laih qaban uɗitteppa qauko nakok qauko okkai diigppa daatteb amu, haen amuppa danab ah ele ag amuppa daappig.
Maika nug anam aɗi dimppa bekkunu nai amu mattie, Juda dilag king Hesekaia nug nug qe mauhomte? Juda oolagppa laa nug nug qe mauhomte? Iitta! Hesekaia nug baɗe, Yawe oo gai-iitta doya oo metta ehanadkkunu unuqittom. Nug anam he, Yawe Nug uug naunab madakkunu uuom amunu, uug naunab ahilagppa bekkunu aum amu, ahilagppa ii beum. ⌊Dabmeig!⌋ Ig hepput, uug naunab ihinigppa bekkunu hetata oittemde!” aon appig.
Amu Yawe Nug atte. “Danab nug aen maha laa, o men ɠagattag laa awa, amuppa nai laa men laappa otaɗtte, laa nai amu hamu obikkunu elele iitta daatte. Nai anam daatte, amubia Juda dilag hipunin am ag oolagppa yaak daatte. Ao, nai amuam doɗ mana mettaknu qaɗab ahilag anen anen qeqeɗi daug waɗeleppa daatteb, qeqeɗi amuppa yaak daatte.
Yawe Nug anam a amu, da Nug amegppa ami. “O Yawe, na danab aun aɗi ag doyak diig genabib dim lamidkkulagnu hetteb ele, na danab ah amubia mattiadttem, ⌊amge nahip danab ah ag amubia ii hetteb⌋. Na bu mattame, amge ag eheɗ heppignu oolagppa guittak ii dooppig. Na oɗoɗadme, amge ag bu mattak nahip amu ii dabmena, oolag eɗukkunu uuppig. Ag heeg, ag na oɗen dim lamidmananu dabmak ahilag ɠagattag eppom. Ag oolag eɗukkunu uun, iinab heppig,” awe ami.
King Nebukatnesar nug nug waappa daakkunu nuhig nai ɠagattag qetta anaknu duttune, nuhig nai Kayak onigppa ɠagattag qedata, anam aum, amge nug amu ha dimppa nug dabmak eɗue, Nebukatnesarnu nai tappe neum. Nug nuhig dabmak he, ɠagattag eppe, nug eɗua, Israel dilag Kayak, nug Yawe amu, nug Nug dim lamidkkunu uuom.
Da ag hettebnu dabmein, da heppi, laa ag uɗin qep elabppa aqadppeg mauhkkulag. Ao, ag gomelppeg, laa qep elabppa aqadppeg mauhkkulag. Aɗinu? Da ag onilagppa emi, amge ag da baal dooglagnu uuppig. Da ag amelagppa nai mattimi, amge ag dooglagnu uuppig. Ag da amelppa kobol nau heppig. Ao, keeke digdig da ag amu hekkulagnu ool ii daatte ele, ag hekkulagnu dabmenan heppig.” Yawe Nug anam atte.
Ag nau amu hetteb amunu, Naɗi Yawe Nug imu atte. “Ag hetteb, ahilag hak amunu dahil oo nauhak, dahil oppoɗi bak ele bettep. Amu da oppoɗi bak amu gokkaɗppi, wan imuppa, danab qaɗelagppa, doɗ qaɗelagppa, atuppan adppa, ee wanppa bette ele ohppa gokku. Ukka, aab ewewe, laa qauhkkunu elele iitta bia, amu oh dilagppa daakku,” awa atte.