Sekaraia 14:10 - Nobonob Baibel

¹⁰ Juda wanppa yawalti uɗitteppanu Geba daatteppa ukka, Jerusalem daatteppanu yau uɗitteppanu Rimon daatteppa amu, aab aɗit amu gamalahppa wan amu oh am eɗua, wannu laih onig Araba daatte, am amubia, ⌊honap⌋ daakku. Wan amuam wannu laih onig Araba daatte, am amubia, ⌊honap⌋ daakku, amge Jerusalem am nuhig abenppa, attan daakku. Jerusalemnu tom am aɗnu od laa onig Benyaminnu Od, amuppa digma ukka, od laa onig Alagnu Odppa ukka, aria, appanu tom am od laa onig Daugppan Od, amuppa ukka, amuppanu am lag attan ta ukkak menppa hak onig Hananelnu Lag, amuppa ta ukka, appanu kingnu grep meu tappa leppu awaknu abenppa batakku.

Sekaraia 14:10 Referans Kwoze

Sekaraia 12:6

Amu Yawe Nug atte. “Deɗ amuppa da heppi, Judanu aab ikki ag waa ooppa aab nakok ewa ukka ukka, aab ameg qagmak eotte, o hul laa ewawa ukka, ee aeg gumu kuɗum ehagna qagmeppig eotte, ag amubia daaglag. Judanu aab ikkinu danab ag wan laala Juda wan talilittak daatteb eɗadna autna aoglag, amu Jerusalem am nuhig abenppa, appa ena, ɠagattag daakku,” awa atte.

Josua 15:32

Lebaot, Silhim, Ain, Rimon ele. Aab amu ebqak oh amu 29. Aab amu taliliattak aab naunau daappig amu, ag amu ele madappig.

Jeremaia 37:13

Nug anam heum, amge haen nug aabnu aɗ od laa onig Benyamin od, nug appa ta, aab dimittim gokkunu ukke, daup od amu gumappig ele dilag okkai Iriya, nug Jeremaia aɗom. Iriya mameg am Selemia, nug alag am Hanania. Iriya nug Jeremaia aɗa, nug aum. “Na ahan, Babilon daup gumadna goppe, ag ele daaglagnu hettem,” awa aum.

Jeremaia 30:18

Amu Yawe Nug inam atte. “Da Jakop buɗub, da ahilagnu ool doyeb, ool matten ehanadppi, ag eɗun, ag wanelagppa ag laulkad eɗun bappaladna daaglag. Aab okkai Jerusalem am nauhakib daakku, amge ag eɗun, nuhig kinipan ameg hume takppa, appa ag aab eɗun bappaidkkulag. Ag aab bappaidna, ag kingnu lag enanagnab nuhig abenppa eɗun bappaidppeg daakku.

1 King 15:22

Aria, dimppa King Asa nug Juda danab ohnab dilagnu, ag oh Rama gokkulagnu, ag men, ad ele King Basa nug aab Rama eɗua bappaidkkunu qagmeum amu, ag mawadna gokkulagnu aum. Keeke amuppa King Asa nug aab Mispa, aab Geba ele, aab aɗit amu aa oh am Benyaminnu wanppa daattep amu, nug men, ad ele amuppa aab aɗit amu eɗua bappalatom.

Sekaraia 2:4

engel da ele nai mattimuɗ nug engel laa amegppa aum. “Na paha gona, nid bau melemel doyaknu muɗi aɗatte amu, na nug amegppa inam appe doyaɗ! Deɗ laa dimppa danab ah huanak, doɗ manan ele Jerusalem appa daaglag. Ag kuɗumnab Jerusalem daaglagnu henana, ag oh aab ooppa daaglagnu elele iitta amunu, kuɗum ag aabnu aɗ dimittim daaglag.

Jeremaia 38:7

Ag amu heeg, Jeremaia anam dayom, amge Ebetmelek, nug Kus danab, nug Juda dilag kingnu lag enanagnabppa king ehanitta, uɗat heum amu, nug ag Jeremaia le moɗppa meppig doya, king nug aabnu aɗ od onig Benyaminnu Od, nug amuppa heɗep na dayeye,

Nehemaia 3:1

⌊Danab imu ag am Jerusalemnu aɗ, aɗnu od ele heppig.⌋ Mana mettak ikki danab Eliasip, mana mettak danab laa ele ag od onig Sipsip Od tatam eɗun babaittona, ag od okkainu od naunau ele bappaidna aihadna, Kayaknu tituanna mettona, ag aɗ appanu digmena eɗun babaittegeg ukke, lag attan ta ukkak menppa hak onig Danab 100 Dilag Lag, amuppa batappig. Ag aɗ laih amuppa malona, ag Kayaknu tituanna mettona, ag tuɗidna, appanu ag aɗ eɗun babaittegeg ukke, lag attan ta ukkak menppa hak onig Hananelnu Lag batappig.

Ikki Danab 20:47

Amu Benyaminnu ban danab 600 aakkuib ag bau daappig. Ag bau daan, ag oolna gona, Rimon menppa, appa kalam waɗele daappig.

Ikki Danab 20:45

Ban danab amu ag ooladna, atu taɗakppa, Rimon appa gokkulagnu ukkaegeg, Israel ag 5,000 ibppa aqaeg mauhppig. Ag tuɗidna lamadna gonana, ag Gidom guguittak appa tena batappig. Ag ib amuppa 2,000 baula aqappig.

Amos 9:11

Yawe Nug atte. “Ag Israel, ag Edom danab oɗo yaak daaglag gumaglagnu, ag wan atu laa oh danab ag anukka da onil waappa daappig ele, ag ag ele gumaglagnu da danab lag na qeum bappaitte, eɗua enanag daatte, laih atten nauhak daatte bappaitte, dayom bia eɗua daatte, da amubia ag Israel, da ahilagppa hekkul.” Yawe, Nug keeke amu oh heeb bekku amu, Nug anam awa atte.

Aisaia 10:29

Appa mewona ag gona, qauko ikki oppoɗu noakppa nona, aab okkai Geba, appa haen tutu dayaknu aab kalaglag. Ag appa niibppeg, danab ah Rama aab okkaippanu ag eheɗ baɗaglag. Baɗappeg, King Saul appag diig Gibeanu danab ah ag ahan, aab uun, ag oolna gokkulag.

Aisaia 2:2

Qauko laa, Yawenu mettid lag qauko amuppa daatte amu, deɗ laa dimppa, Yawe Nug heeb, qauko amuam qauko laa oh eɗattak daakku. Ao, Yawe Nug heeb, qauko amuam qauko nakok laa oh eɗadkku. Amu geha danab ah kuɗumnab, wan atu ohppanu ag appa ⌊qagmekkulagnu⌋ uɗiglag.

Nehemaia 12:39

ig od laa onig Epraimnu Od qe-eɗidta gota, od onig Jasernanu Od qe-eɗidta gota gota, od laa onig Kakainu Od qe-eɗidta gota, ig lag attan ta ukkak menppa hak aɗit laa, laa onig Hananelnu Lag, laa onig am Danab 100 Dilag Lag, ig lag aɗit amu eɗata, ig od laa onig Sipsipnu Od, ig amuppa wata, od laa onig Aab Gumak Danab Dilag Od, ig amuppa batamut.

2 Stori 25:23

Amu Betsemes appa ag ban henana, banppa Israel dilag king Jehoas nug Ahasia alag Amasaia, nug Joas bekka, Juda dilag king amu, nug nug aɗom. Jehoas nug Amasaia aɗa, nug awa, Jerusalem ukka, nug Jerusalem ooppa ukka he, nuhikkud daup ag Jerusalemnu aɗ laih laa od onig Epraim Od, appanu ukka ukka, od laa onig Daugppan Od, appa batak ag aɗ amu oh loppaɗppig. Aɗ laih amunu elab am 200 mita, keeke.

1 Stori 6:77

Geson buɗub ag aab amu aoeg, Merari buɗub, ag Lewi buɗub laa aakku, ag ele aab aoppig. Ag Israel dilag huu okkai Seblon wanppanu ag aab imu aoppig: Jokneam, Karta, Rimono, Tabor ele. Ag aab amu gikkiɗah dad okkai aab amu taliliattak daatteb ele aoppig.

1 Stori 4:32

Aab naunau tanig ele aab amu guguittak daappig am Etam, Ain, Rimon, Token, Asan ele.

Ikki Danab 21:13

Ag amu heeg, Israel dilag tamaniak ooppan danab laa ag maɗoɗ nai, Benyamin danab laib laib ag ban haen dimppa Rimonnu men okkaippa bau daappig amu mattaglagnu maatteg, aon goppig.

Josua 21:17

Israel dilag huu okkai laa Benyamin ooppan amu, Israel ag mana mettak danab Aron buɗub aab imu ele madappig. Aab amuam, Gibeon, Geba,

2 King 14:13

Amu Betsemes appa ag ban henana, banppa Israel dilag king Jehoas nug Ahasia alag Amasaia, nug Joas bekka, Juda dilag king amu, nug nug aɗom. Jehoas nug Amasaia aɗa, nug Jerusalem ukka, nug Jerusalem ooppa ukka he, nuhikkud daup ag Jerusalemnu aɗ laih laa od onig Epraim Od, appanu ukka ukka, od laa onig Daugppan Od, appa batak ag aɗ amu oh loppaɗppig. Aɗ laih amunu elab am 200 mita keeke.

Jeremaia 20:2

nug he, ag Jeremaia, nug propet amu, ag nug eheɗ makkuɗnana, ag aon gona, Yawenu mettid lagnu aɗnu od laa onig Benyaminnu Od Attan, ag aben amuppa ag nug eppeg, baeg ele ad mahappa qagappig.

2 Stori 26:9

Amu Usia nug Jerusalem appa aɗnu od onig Daugppan Od, aɗnu od laa onig Oolnu Noaknu Od, amu aben laa aɗ tutukku ii ukkom ele, aben amu ohppa nug ⌊ban haknu⌋ lag attan ta ukkak menppa hak heum. Nug lag amu ha malowa, nug he, ɠagattag daappig.

Maika 4:1

Qauko laa, Yawenu mettid lag qauko amuppa daatte amu, deɗ laa dimppa, Yawe Nug heeb, qauko amuam qauko laa oh eɗattak daakku. Ao, Yawe Nug heeb, qauko amuam qauko nakok laa oh eɗadkku. Eɗatteb amu, geha danab ah kuɗumnab huu anen anenppanu geha ag appa ⌊qagmekkulagnu⌋ uɗiglag.

Sekaraia 8:3

Amu Yawe Nug laa ele inam atte. “Da eɗuen, qauko Sion appa ukken, da Jerusalem daakkul. Da amu heppi, danab laa ag Jerusalemnu, aab okkai amu onig am Yawe Dim lamittaknu Oo Metta Ii Uuak Kobol, akkulag. Amu qauko Sionnu, qauko amuam Yawe Nukka Ɠagattag Oh Elenu amu, ag qauko amunu, qauko amu onig am, Qauko Kayaknu Tituanak Daatte, akkulag,” awa atte.