Sekaraia 1:17 - Nobonob Baibel

¹⁷ Engel nug da amelppa anam ana, nug tuɗitta aum. “Na imu ele madippe doyeg! Yawe Nukka Ɠagattag Oh Ele, Nug inam atte. Israel danab ah oh ag baula bau dayaknu keeke oh elele aɗan oinna, amu tuɗittak keeke laa ele aɗan oiglag, awa atte. Amu ag anam oippeg, am Yawe Nug baula danab ah oo mak madakku. Nug Jerusalem am nuhignabnu tituankku. Yawe Nug anam atte,” awa aum.

Sekaraia 1:17 Referans Kwoze

Aisaia 51:3

⌊Yawe Nug Abrahamnu anam heum⌋ amunu, genab Nug heeb, danab ag Sion eɗun bappaidppeg, ag Juda ag oolag mekku. Yo, Nug Sion nauhom antta heeb, danab ag Sion bappaidkkulag. Nug heeb, Juda wanppa aben laala atu taɗak beppig daatteb amu, aben amuam Iden dayom bia daaglag. Ao, Nug heeb, Juda wanppa aben wan meu waknu nakokib elele amu, ag am Yawenu dad bia daaglag. Danab ah ag Sion appa, Juda wanppa ele daaglag amu, ag oolag gamag ahebeb, ag, Yawe amegppa, “Ena hen mekkame,” doon anan, ahi ettaglag.

Sekaraia 2:12

Wan laa Yawenu tituanak daatte, wan amuppa laih Juda am nuhig aug bia dayebeb, Yawe Nug baula Jerusalem tituaneb, nuhig aabnab daakku.

Aisaia 14:1

⌊Yawe Nug geha Babilon heeb nauhkku.⌋ Aɗinu? Yawe Nug Israel danab ah dilagnu oo doya, oo madakku. Nug anukka ag nuhig danab ah daaglagnu Nug tituanattom, anamib geha Nug baula tituanatteb, ag nuhig daaglag. Amu Nug heeb, Israel ag eɗun gona, wan ahilagppanab daaglag. Ag daappeg, wan laihnu danab ag geha uɗin, Israel oolagppa daaglag. Daanna, Jakop buɗub bia bena daaglag.

Obadaia 1:20

Haen amuppa diia ukka laih me dayak danab ah Israelnu ag Kanan wanppa daaglag, ag wan aoppeg ukkeb ukkeb, Sarepat batak daaglag. Amu diia ukka laih me dayak danab ah Jerusalemnu gemu Separad daatteb, ag eɗun, ag wanelagppa uɗin, ag Negeb wanppan aab aon daaglag.

Esekiel 36:33

Amu Naɗi Yawe Nug inam atte. “Haen da ahilag hipunin uhuqen madappi, ag oppiak daappeg amu, da heppi, ag baula aab ahilagppa daaglag. Ag daanna, ahilag aab laa nauhattak daatteb am bappaladkkulag.

Aisaia 66:13

Ag Juda danab ah amu, geha nid anig nug nuhig nid bekkitta, dabmedatte bia, da Yawe, da anamnab aakku ag dabmadakkul. Da anam aakku dabmatte bekkadppippi, ag Juda danab ah, ag oo mak aoglag,” awa atte.

Aisaia 54:8

Ag eheɗ heppig amunu, da ool huana haen tutuib nauhe, da dimatten ii ehanadmi, amge da oo mauhaknab kobol dahil alet daatte dim lamittette, da ool matten ehanadkkul.” Yawe, Nug ag laa eppelagppa dayaknu qagaiettakppanu eɗua uhuqak hette ele, Nug anam atte.

Aisaia 52:9

O Juda danab ah, ag aab nauhak daatte bia daatteb amu, Yawe Nug oo mak ag madakku. Ao, Yawe Nug ag laa eppelagppa dayaknu qagaiettakppanu eɗua uhuqak ha madakku. Anam amunu, ag laippun ahan, gamag ahaknu ele ahi ettalatteg!

Aisaia 44:26

Da dahil propet, ag am dahilad maɗi nid, da aɗi nai ag madattem amu, da hei, nai amu meu otte. Ao, da aɗi nai dahil propet oɗelagppa mettem amu, da hei, nai amu genab bette. Amu da Jerusalemnu attem, ‘Israel danab ah ag eɗun, aguppa daaglag.’ Ao, da Juda dilag aab, ‘Danab ag aab amu eɗun bappaladkkulag,’ attem. Ge! Kekeɗ ag Jerusalem, Juda dilag aab naunau ele heeg nauhppig amu, da aab amu ohnu attem. ‘Da heppi, ag ena, babaittak daaglag.’

Sam 69:35

Aɗinu? Kayak Nug danab ah ag Sion daatteb ele ehanatteb, ag padal ii memana. Ao, Nug heeb, danab ah ag Juda aab okkai baula buualadkkulag. Ge, danab ah nuhikkud ag appa daan, ag heppeg, wan ag eppelagppa eɗua daakku.

Nehemaia 11:20

Amu oh am, ag Jerusalem daappig. Israel buɗub laa oh, mana mettak danab laa oh, Lewi buɗubppan mana mettak danab iitta, amu oolagppanu laa oh ele ag Judanu aab laalappa, ag mamelkad aɗi daadppigppa, ahilkad wanppa appa daappig.

2 Stori 6:6

Amge gemu da Jerusalem, da onil aguppa daakkunu tituanen, da na Dawit, da na dahilad danab ah, am Israel danab ah, da na ag gumadkkutnu da na tituanidmi,’ awa aum.

Epesus 1:4

Kayak Nug wan ii beum haenppa Nug ihinignu oo mauhe, Nug ig Kristusnu uɗat okkaippa ig nuhikkud danab ah oppiaawak ele daagnignu, ig danab ah oonigppa kaliak laa iitta ele daagnignu tituanikkom.

Sekaraia 3:2

Nug anam he, Yawe ⌊nuhig engel⌋ nug Satan amegppa aum. “Satan, ⌊na eheɗ hettem.⌋ Yawe Nug na daut bataɗ! Ao, Yawe, Nug Jerusalem tituanom amu, Nug na daut bataɗ! Danab imu, Josua, nug am ad maha laa aab aɗuppa dayeye, ii eomanu danab laa nug paha eppeg bahia aotte, nug amubia daatte.

Amos 9:14

Da heppi, dahilad danab ah ag wan laalappa gona, diia ukka laih me dayak danab ah daaglag amu, ag eɗun, ahilag wanppa uɗin daaglag. Ag aab okkai kekeɗ loppaɗppeg nauhak daaglag bappaidna, aguppa daaglag. Ag grep dad eppan, ag wain aon lakkulag. Ag dad eppan, ee appanu aon lakkulag.

Jeremaia 33:13

Amu wan imu ooppa maha laa qauko qauko daatteppa, qauko nakok qauko okkai diigppa daatteb, wan imu ooppa qaban uɗitteppa daatteb, appa, aria, Negeb appa, Benyamin wanppa, aab naunau Jerusalem talilittak daattebppa, amu Judanu aab oh eleppa, aben amu ohppa sipsip gumak danab ag daanna, ahilkad sipsip gumadnana, ag ahilkad sipsip ebaqadkkulag.” Yawe Nug anam awa atte.

Jeremaia 31:13

Haen amuppa, nid ahin bau ag oolag huana gamag aheb, ag goɗaglag. Yo, danab bau, amu danab kaino ele ag oolag huana gamag ahakku. Yawe atte. “Ag oolagppa uug doon mahiglag, amge da ag gamag ahak madakkul. Ao, ag oo doyak dooglag, amge da heppi, ag oolag meeb, oolag gamag ahakku.

Aisaia 51:12

Amu Yawe Nug atte. “Da, ge da, da oo mak madattem. Danab am keeke gai-iitta, oh mauhtteb amunu, aɗinu ag danabnu baɗadtteb? Ao, aɗinu ag danab bekkalkad, ag gikkiɗah bia paha nauhtteb ele amu, aɗinu ag ag baɗadtteb?

Aisaia 49:13

Yawe Nug danab ah nuhikkud oo mak madatte, Nug nuhikkud danab ah bu okkai aoppig dilagnu oo bodoetta le mak dootte amunu, ag hab daup, ag oo gamag ahak doon, baalag okkaippa eig! Yawe Nug anam hette amunu, danab ag oo gamag ahak dootteb, amubia keeke oh wanppa daatteb, ag oolag gamag ahaɗ! Nug anam hette amunu, danab ag oo gamag ahak doon, ahi ettaladtteb, amubia ag qauko, ag oo gamag ahak doon ahan, ahi etteg!

Nehemaia 11:3

Israel danab ah laa, mana mettak danab laala, Lewi buɗubppan mana mettak danab iitta laala, Kayaknu mettid lagnu maɗi nid laala, amu Solomonnu maɗi nid buɗub laala ele ag Judanu aab laalappa, ag anen anen ag laulkadppa, o ahilkad wanppa daappig. Amu Juda buɗub laala, Benyamin buɗub laala ele ag Jerusalem appa daappig. Aria, imuam Israelnu laala, ag prowins dilag okkai daan, Jerusalem appa daappig onilkad. Laa Judanu am inam: Usia bekka Ataia. Usia mameg am Sekaraia. Sekaraia mameg am Amaraia. Amaraia mameg am Sepatia. Sepatia mameg am Mahalalel. Mahalalel am Peres buɗub laa.

Sekaraia 1:14

Yawe Nug engel da amelppa nai mattiom amegppa anam a, engel nug da amelppa aum. “Na danab ah oh nai imu dooglagnu eppe doyeg! Yawe Nukka Ɠagattag Oh Ele Nug inam atte. Da Jerusalemnu, Sionnu ele dilahnu dahil doya laa aomanu doyak aɗe dayak okkai doottem,

Sekaraia 1:18

Amu dimppa amu da Sekaraia, da neekki ukke, da doɗ qeqeɗi waɗele anidmi.

Sekaraia 2:4

engel da ele nai mattimuɗ nug engel laa amegppa aum. “Na paha gona, nid bau melemel doyaknu muɗi aɗatte amu, na nug amegppa inam appe doyaɗ! Deɗ laa dimppa danab ah huanak, doɗ manan ele Jerusalem appa daaglag. Ag kuɗumnab Jerusalem daaglagnu henana, ag oh aab ooppa daaglagnu elele iitta amunu, kuɗum ag aabnu aɗ dimittim daaglag.

Jeremaia 33:9

Da Israel danab ah dilagppa, Juda danab dilagppa ele anam hewoya, da Jerusalemnu dabmein, da gamag ahak dookkul. Amu wanppan wan ohppan danab ah ag kobol ena ena da Jerusalem appa hekkul anidna, ag onig okkai, binag ele da meɗaglag. Ge, ag da maɗoɗ okkai, enub okkai ele Jerusalem danab ah madakkul anidna, ag dahilnu ebehilag oh bodoetta le meebeb, ag beɗulag hahaɗkku.” Yawe Nug anam atte.