Sam 90:12 - Nobonob Baibel

¹² Ig doyak dabmak ena ele daagnignu, na ig haen tutuib bau daattemnu ippunigppe doognignu oɗ medattem.

Sam 90:12 Referans Kwoze

Sam 39:4

“O Yawe, na da ehaniɗkkutnu unuqidttem. Na heppe, da haen adekku mauhkkulnu oittem, deɗ gane aakkuib da bau daakkulnu daatteb amu, da amu dookkulnu ool daatte. Deɗ deɗ amuam paha paha malakkun hetteb, amu na heppe, da amu dookkulnu oɗ medattem.

Jon 9:4

Amahlak aakku daatte amunu ig laa, Nug da meiɗe uɗimi ele amu, ig nuhig uɗat hekkunigoitte. Gatatu nekkunu haen aakku malatte, gatatu neeb amu, aun laa nug uɗat ii hema.

Duteronomi 32:29

O gadon. Ag am danab ah doyak dabmak ena ele daanna, ag imu dooppeg, oolag maidlo am ena! O gadon. Ag aɗi kobol ahilagppa bekku oolag maidlo am ena!

Prowerb 4:7

Doyak dabmak ena ele am anuqak daatte; amunu na doyak dabmak ena ele awe! Ge, na diignu doyak tutukku aokkutnu na nahip keeke ohnab ekkutnu dayeb amu, na anam he! Aib uume!

Eklisiastis 9:10

Na gemu bau daattem amu, na haen imuppa aɗi uɗat hekkutnu anidkkut, na nahip ɠagattag ohppa he! Aɗinu? Na moɗppa gokkutnu oittem amu, appa danab laa nug uɗat laa ii hette, nug keeke laa hekkunu maittak ii aotte, appa doyak laa ii daatte, doyak dabmak ena ele laa ii daatte.

Prowerb 23:12

Laa nug ippunittak nai ena na medatte amu, na doon autna awe! Ao, na daut human, doyak enanu nai doon autna awe!

Prowerb 22:17

Na daut human, danab doyak dabmak ena ele dilag nai doye! Ao, da aɗi ippunidttem imu amu, na dabmettan autna awe!

Prowerb 16:16

Danab nug doyak dabmak ena ele aokku, amuam ena, am gol awak eɗidtte. Ao, danab nug diignu doyak tutukku, nug amu aokkun dabmekku, amuam ena, am silwa awak eɗidtte.

Prowerb 4:5

Da mamel nug nai amu amelppa anana, nug aum. “Na doyak dabmak ena ele, aria diignu doyak tutukku ele aon oiye! Ge, na aib nai dahil imu daut atiom, o na aib dahil nai imunu dekkaɗna laih gome!” awa aum.

Job 28:28

Nug amu ha, nug danab ah amelagppa aum. ‘Doyak dabmak ena ele amu, amuam dahilnu ebehi oh bodoetta le mak. Ao, diignu doyak tutukku amu, amuam eheɗ laa ii hemanu dabmaama oiyak.’ Kayak Nug danab ah amelagppa anam aum.” Job nug anam aum.

Prowerb 23:23

Na doyak diig genabib ele aon, aib paɗappe ukkom; na hanhan doyak dabmak ena ele, laa nukka nuhig oiyak pehettak atognotte, diignu doyak tutukku ele, na kobol amu oh dim lamitte.

Sam 39:5

Na he, dahil bau dayak haen am tutunab daatte. Nahip neekkakppa, da wanppa bau daattem, bau dayak amunu digma ukka, gogppa tak am keeke ii ba ukkom bia daatte. Ao, danab ah dilag bau dayak haen am tutunab; amuam danab laa nug hik tutuib haen laippuib awom bia daatte.” Sila.

Eklisiastis 7:2

Danab nug lag laappa, appa ag laa mauhomnu mahiak hetteb, amuppa gokku am ena; nug lag laappa, appa ag hobul henan daatteb, nug amuppa gokku am nakok enatai, amge enanag iitta. Aɗinu? Ig danab oh ig mauhkkunig; amu danab nug bau dayaya, nug amu dabmaɗ!