Sam 59:3 - Nobonob Baibel

³ Aɗinu? O Yawe, antte! Danab ag da niɗaglagnu meiɗna hetteb. Danab ag lailkad aqaglagnu tiilagppa daatte ele amu, da ahilagnu hipunin laa, o eheɗ laa ii hemi, amge ag attem hena, da niɗaglagnu maittak aotteb.

Sam 59:3 Referans Kwoze

Sam 56:6

Ag qagmena, ag dahilppa eheɗ nau hekkulagnu mattiak aotteb. Ag eheɗ heiɗkkulagnu meiɗna daatteb. Da aɗi keeke hettem amu, ag neegna autna aotteb. Ag da iuglagnu hetteb.

Sam 69:4

Danab ah kuɗum, ahilag ebqak amu da ikkil uɗug ikkilppanu eɗittak daatteb, ag oolagppa dahilnu diig iittappa nau ninig ele dootteb. Genab, da eheɗ heminu ag atteb ele amu, da ii hemi, amge kekeɗ dahilad ag hambuppuna, da eheɗ heminu atteb. Ag ɠagattag daana, da iuppeg mauhkkulnu hetteb. Da ahilag keeke laa yab ii aomi, amge ag da yab aomi anana, duttuniɗna, da keeke amu yab aolom bia nob mekkulnu hetteb.

1 Samuel 24:11

O mama, antte! Gemu geha iikku da nahip lamen elab amu nob nakok otaɗe aomi iikku, amge da na ii nittai mauhme. Am na amu anidna, dabmena, geha na diig amuppa na oot maitteb dookkut; da na nidappi ii mauhmana! Iittanab! Laa amu, da nahip nai tabappi nekkunu, o nahip aben aokkulnu ii hettem. Da nahip-ppa keeke eheɗ laa ii hettem, amge na am da iuppe mauhkkulnu banel oittem.

Prowerb 12:6

Nau hak danab ag laa guittak madappeg mauhkkulagnu nai maditteb; amge genab tutukku hak danab ag laa uugppa daatteb, ag amu ehanadppeg, qagaiettakppa ii daamnanu nai maditteb.

Jon 15:25

Am ahilag ɗoppa yaak niitte amu elele medatte. Nai amu inam. ‘Ag dahilnu diig iittappa nau ninig ele dooppig.’

Maika 7:2

⌊Da amubia doottemnu diig am,⌋ laa ag heeg, genab tutukku hak danab ag wan imuppa laa iinab daatte. Ge, genab tutukku hak danab laippu laa wan imuppa ii daatte. Danab oh ag lailkad aqappeg mauhkkulagnu ib mattin oitteb. Ao, ag danab nug ai uhuippa awa aqakkunu hette, ag amubia ag lailkad duulag okkulagnu hetteb.

Aposel 23:21

Amge ag hambubutteb amunu, na ahilag nai amu aib dim lamidme. Aɗinu? Ag Juda danab 40 eɗittak amu ag Pol qeppeg mauhkkunu inam nai ɠagattag qettan appig. ‘Ig ee le ele paha ii lamata. Iitta. Ig hamu daapput ukkeb, ig Pol qepput mauheb dimppa ig eɗut ee lakkunig.’ Ag anam appig. Ag anam hekkulagnu mattin bappaidppig amu geha iikku ag na ahilag nai amu doon, aɗi appe dooglagnu ameg mak daatteb,” awa aum.

Sam 38:12

Kekeɗ dahil ag danab laa nug pelem doɗ aɗeb qekkunu mette amubia, ag dahilppa anam bia hekkulagnu hetteb. Ao, danab ag da guittak meɗaglagnu hetteb amu, ag mattiak hena, ag eheɗ nau heiɗkkulagnu maidtteb. Ag deɗ oh amun tuqan ele amu hambuppuak nai maditteb.

Sam 2:2

Wanppan king, amu wanppan okkai ele ag qagmena, maittak nau aon, ban hekkulagnu bappaidtteb. Ao, ag oh ag Yawe, amu laa Yawe king daakkunu goɗen gokkaɗakppa tituanom ele ban hekkulagnu dabmetteb.

1 Samuel 26:18

Dawit nug anam awowa, nug tuɗitta aum. “Na am naɗi dahil, da am maɗi nid nahip, amu da na tutukku appe dookkulnu oɗ medattem. Na diig aɗinu da aɗailkkutnu lamiɗttem? Da eheɗ aɗi laa hein, da ɗo aakku tippalmi?

1 Samuel 24:17

Nug gayaya aum. “Na amu, na am genab tutukku hak danab, da eɗilak. Aɗinu? Da nahipnu eheɗ hemi, amge na am dahilnu ena heme.

1 Samuel 19:1

Am danab ah oh ag Dawitnu enanagnab dooppig amunu, Saul nug Jonatan amegppa, nuhikkud ehanittak amelagppa ele ag Dawit qeppeg mauhkkunu aum. Nug amelagppa aum, amge Jonatan nug Dawitnu enanagnab doyom,

Sam 140:2

Danab ag laa guittak nau mauhnoak madatteb ele, ag oolagppa nau hekkulagnu maittak aotteb. Deɗ ohppa ag uug heeg bette.

Prowerb 24:15

Na nau hak danab nug laa eheɗ hedakkunu meitta daatte bia, na aib genab tutukku hak danab, nug baekkudppa ele eheɗ hadakkutnu maadna daame; na nuhig keeke yab aokkutnu nug laug aib loppaɗme.