Sam 36:8 - Nobonob Baibel

⁸ ⌊O Yawe,⌋ danab laa nug laugppa ee kuɗum ele dayeye, danab ah ag hanhan wana, ag ee oh oolag heumnu latteb, na amubia danab ah atognoadttem. Danab laa nug le enanagnab ele dayeye, danab ah ag nuhigppa gona latteb, na amubia dabmattan hettem.

Sam 36:8 Referans Kwoze

Sam 16:11

Na bau dayaknu ib da ippuniɗme. Ao, na da ele daattep amunu, da maɗoɗppan gamag ahak okkainab doottem, Ge, haen da na eppen naɗiap-ppa dayeye, da enanag doottem, hanhan anam dookkul.

Sam 65:4

Danab ah ag nahip daaglagnu na tituanadna, diin uɗie, ag nahip mettid lagnu haɗap-ppa, na guguittak daatteb amu, ag itittak ena aoppig daatteb. Na heppe, ig aun aɗi anam na laut, amuam nahip mettid lag nahipnu tituanak daatte amu, ig amu guguittak haɗap-ppa daattem, ig lag amuppanu itittak ena ena aognignu na oɗ medattem.

Aisaia 58:11

Ag amu hekkulagnu dayeb amu, Yawe Nug ulum matta, atu taɗak gakkaɗak nau eleppa Nug le, ee keeke, ag bau daaglagnu laa ele madakku. Nug ag beɗulag ele ɠagattag madakku. Nug amu heeb, ag dad le elelenab aotte bia daaglag. Ag le qeppuɗia bette, deɗ laa ii qaɗaiedatte amu, ag le amubia daaglag.

Aisaia 25:6

Sion qaukoppa, Yawe Nukka Ɠagattag Oh Ele, Nug geha ee lanak hobul okkai okkai, ee enanag digdig appa bappaidkku. Hobul amuppa amu, doɗ digdig teppulag ena ena, am wain digdig enanag lanak baag ubuhinab ele, amu ele daakku. Nug danab ah wan ohppanu ag uɗin, hobul amuppa qagmekkulagnu bappaidkku.

Sam 63:5

Danab nug ee ena lanana, oo dittie enanag dootte, amubia da ⌊na lautppa na guguitten dayeye,⌋ da elelenab dookkul. Da ahi oo gamag ahak, na binan maknu ele ettaladkkul.

Matyu 5:6

Danab aun aɗi ag Kayak noobppa genab tutukku daaglagnu oolagppa enug qak bia dootteb ele amu, ag itittak ena aoppig daatteb. Aɗinu? Ag amu ambak aoglag.

Sam 46:4

⌊Am le naɗi, le amunu le ippu danab eppelagppa buuppig ele, le ippu amu ag danab ah gamag ahak okkai madatteb, amubia⌋ Kayak Nug danab ah ag nuhig aab okkaippa daatteb ele, Nug ag gamag ahak okkai madatte. Aab okkai amuam Kayaknu tituanak daatte, Kayak Attannab Nug amuppa daatte.

Aisaia 48:21

⌊Ag gobeppeg, haen amuppa kobol digdig Yawe Nug Israel Isipnu diia ukke daappig bia daaglag. Yawe Nug Israel Isipnu diia ukkom, haen amuppa⌋ Nug omalatte, ag atu taɗakppa oippig, amge ag le baalag ii diiom. Nug he, le ahilagnu menppa neum. Ao, Nug he, men oppate, le huanaknab noa ukkom.

Job 20:17

Nug en okkai aokku, amge nug amuppa gamag ahak nakok laa ii aoma. Ao, nug keeke ena ena kuɗum aokku, amge amuppanu gamag ahak nakok laa ii aoma. Iitta.

Jon 7:37

Hobul amu malaknu deɗ beum, deɗ amuam hobul amunu naɗinab amu, haen amuppa Jesus Nug hibaitta, baag okkaippa ewa aum. “Danab laa nug le baag diieb amu, nug da gumiɗa uɗia, le lanaɗ!

Aisaia 43:20

Da danab ah dahilad, da ag tituanadmi amu, da ag le lakkulagnu atu taɗakppa le hadakkul. Ao, da danab ah dahilad ag le lakkulagnu, da wan meu waknu nakokib elele, appa da le hadappi gokkulag. Da amu hekkul amunu, doɗ dakkuɗ digdig, doɗ jakal, aria hipunai ele, ag le amu lanana, ag dahilnu oolag gamag ahebeb, ag dahilnu, ‘Ena hen mekkame,’ bia dooglag.

Sam 17:15

Amu da, da genab tutukku hak kobolppa na anidkkul. Haen da niiak abenppanu ahen, na anitten amu, da elelenab dookkul.

Solomonnu Ahi 5:1

O ah dahil, na dahil ah daakkutnu awidmi. Da dahil dadppa iikku bemi; dad dahil imuppa amu, da keeke muttuɗig enanag mir, spais digdig ele aomi. Da ippa uppuh leppu ataɗa nette, uppuh leppu teɗppanu ele lainne; da wain, huh ele lami. O ig lainti, aa ee, le ele laiɗ! Ao, danab le elelenab lanana, elele dootte, amubia aa nug oo mauhak doottep ele, aa lapeɗ, eleleppa taɗ!

Sekaraia 9:17

Wan am enanag, neekkak enanag ele daakku. Anam amunu, ee aeg am heeb, nid danab ag enanag bena daaglag. Ao, wain bau am heeb, ah makkun ag enanag bena daaglag.

Sam 17:8

Na keeke laanu na oot huana hette ele dabmedattem, amubianab na kekeɗ, ag da taliliɗna iuglagnu hetteb amu, na ag amu ii hemananu na dabmeɗakkutnu unuqidttem. Yo, matuk anig nug nag haug waappa lokkumadtte bia, na nau hak danab ag da banel uɗin, heiɗppeg nauhkkulnu hetteb amu, na ag amu hemananu da atognoiɗkkutnu oɗ medattem.

Sam 31:20

Na amu, na am nahipad danab ah dilagnu lokkumak aben bia daattem; na ag nakka nahip-ppa lokkumatte daatteb. Na anam hena, kobol amuppa na danab nau ag nahipad danab ah eheɗ hattamananu maittak aotteb amu, na ib oo nettem. Yo, danab ah nahipad dilagnu amu, na daattemppa maatte daaegeg, kekeɗ ahilkad hattappeg nauhkkulagnu nai maditteb amu, na nai ahilag amu qee nette.