Sam 36:6 - Nobonob Baibel

⁶ Nahip genab tutukku hak kobol amu naɗinab, qauko attannab hume tak, amubia daatte. Ao, nahip nai doya mala hettoɗia epeɗia elele mettak kobol am naɗinab, am yu gamag unuqagnab noa ukkak bia daatte. O Yawe, na danab ah atognoadnana, doɗ ele atognoadttem.

Sam 36:6 Referans Kwoze

1 Timoti 4:10

Nai am inam. Ig Kayak bauklel, Nug danab ah oh eɗua awikkak diig daatte, amge Nug danab ah ag nuhignu oolagppa genab dootteb ele, Nug ahilagnu eɗua awikkaknab danab daatte, ig nuhignu oonigppa genabnab dootta, Nug doa ehanigkkunu dabmak aɗat daat, ameg mettem. Ig amunu am genabib doottem amunu, ig uɗat naɗinab ɠagattag ele hettem.

Rom 11:33

Genab! Kayaknu doyak dabmak ena ele, aria doyak nuhig ele, keeke aɗit amuam okkainab, unuqagnab ele daattep. Ig danab ig maittak nuhig oh diig mattita anidkkunignu elele iittanab. Amu ig ib oh Nug dim lamidtte ele, ig elelenab doognignu ele elele iitta.

Sam 77:19

Nahip ib am yu gamagppa ukkom. Ao, na ippun am le naɗi gamagppa ukkom. Nahip ib am anam, amge auntai laa na baen abenab anidkkunu elele iitta dayom!

Sam 71:19

O Kayak, nahip genab tutukku hak am attannab daatte. Na, laa iitta, na keeke okkai okkai kuɗum heme. Auntai laa nug na bia ii daatte. Laa iitta.

Aisaia 45:19

Da aben lokkumak ele, da aguppa dayeye, nai ii mattimi. Wan amuppa gatatu daatte amu, da gatatu amu ooppa daye, nai ii mattimi. Da Jakop buɗub ag aben danab ah ii daattebppa da aniɗna dim lamiɗkkulagnu mattiɗkkulagnu ii ami. Da, Yawe, da genab madittem. Da kobol tutukku aakkuib ippunadttem,” Yawe Nug anam atte.

Sam 145:9

Yawe Nug danab ah oh dilagppa ena hette. Nug aɗi keeke Nug eppegppa heum ele amu, Nug amu ohnu oo bodoetta le mette.

Sam 97:2

Bud, amu gatatu teppu ele aa Nug talilidya, happut-ttep. Nug king dayaya, Nug kobol genab tutukku ele, amu nai doya mala hettoɗia epeɗia elele mettak kobol eleib dim lamat-tte.

Sam 92:5

O Yawe, na kobol danab laa hekkunu elele iitta kuɗum hettem! Ao, nahip dabmak am unuqagnab noak daatte.

Rom 3:25

Anukka Kayak Nug eheɗ haknu nob elele eɗua mettak uua, danab dilag hipuninnu nob nau paha ii mattom amunu, Nug tutukkuib daatte, Nug amu ippunigkkunu haaha, Nug ig aun laa ig Jesus tiigppanu oonigppa genab doottem, Jesus Nug ihinig eheɗ haknu nob nau Nug tiigppa iitta mekkunu heeb elele medakkunu Nug tituanom.

Jona 4:11

Anam amge, da ele Niniwe dilagnu dabmein, ool dootte. Aab okkai amuppa nid naunau eheɗ laa ii heppig ele kuɗum daatteb; ahilag ebqak 120,000 eɗittak. Doɗ kuɗum ele daatteb,” awa aum.

Aisaia 40:28

Ag Yawe, Nug Kayak hanhan daatte, Nug wan atu oh, amuppan keeke oh ele heum amu, ag amu iite dootteb? Ag amu daulagppa iite dooppig? Yawe Nug beɗu bahi ii yaatte; beɗu bodo-ii-edatte. Nuhig diignu doyak tutukku amu, laa nug oh dookkunu elele iittanab iitta.

Sam 147:9

Nugib doɗ ee madatte. Ao, haen alɗal nalkad ele ag eenu enug aqe gaaeg amu, Nug ee madatte.

Job 37:23

Laa Nukka Ɠagattag Oh Ele Nug ig eɗikka auta autanab aotte. Nug nuhig ɠagattag am okkainab ele. Nug nai doya mala hettoɗia epeɗia elele mettak kobol ele hanhan dim lamidtte. Nug aɗi hette ele amu, Nug genab tutukku hak kobolppaib hette amunu, Nug danab laa diig iittappa bu ii medatte.

Job 7:20

O na ig danab, na ig neekkigna daattem amu, da hipunin hemi dayeb, da na, da nahip-ppa aɗi hemi? Da na da iuttemnu diig amu, da ii doottem. Da na uug kuɗum medattemte?

Nehemaia 9:6

Ag nai amu ana malaeg, ⌊Esra aha, inam Yawe unuqittom.⌋ “Na nakka am Yawe. Na hab, hab waappa, hab attan ukke ukke, adekku batatte ele, na amu oh hattame. Na habppan hoɗopai oh, wan, wanppa aɗi aɗi keeke daatte, yu, yuppan keeke oh ele hattame. Na keeke oh bau daatteb ele bau madattem. Hab aabppan daup, ag kuɗumnab ele, ag oh na noomppa dup nona binan metteb.

1 Samuel 14:15

Jonatan, nuhig bannu keeke mawaknu nid ele aa anam heeh, Pilistia dilag daup laa oh, laa ag haen tutu dayaknu aab kalak ahilagppa daaegeg, laa ag haen tutu dayaknu aab kalak dimittim daappig ele amu, ag amu doyeg, wan uɗale, Kayak he, ag eheɗ baɗan,

Duteronomi 32:4

Nug am hanhan ɠagattag daatte; nuhig uɗat am qa oppiaawak ele. Keeke oh Nug hette amu, Nug nai doya mala hettoɗia epeɗia elele mettak kobol dim lamitta hette. Kayak Nug diig nuhignu oo metta ii uuak kobol dim lamittatta, Nug eheɗ laa ii hette. Nug tutukkuib daatte, Nug nai doya mala hettoɗia epeɗia elele mettak ibuppa hanhan daatte.

Eksodas 9:28

Ais doɗo am hakkaɗ ele ig eheɗ iqatte amunu, na amu iitta mekkunu Yawe unuqidkkutnu oɗ medattem. Da geha heppi, ag gokkulag; ag baula ippa ii daamna,” awa aum.

Genesis 18:25

Ge, anam daakku! Na genab tutukku hak danab, amu danab nau ele oh he ii mauhtteb. Na anam ii hettem. Na, na wan atu oh dilag epeɗiak danab daattem, na haen oh epeɗiak kobol tutukkuib iite hemana?” awa aum.

Jeremaia 12:1

⌊Da Jeremaia, da Yawe inam unuqidmi.⌋ “O Yawe, haen oh da nai laa, na nai amunu diig appe dookkulnu na amenppa attem amu, na kobol tutukkuppaib mehuqe doottem, amge gemu da na nai doya mala hettoɗia epeɗia elele mettak kobol nahipnu oɗ medakkulnu hettem. Am inam. Nau hak danab ag ena daanna, enub kuɗum aotteb. Da amunu diig ii doottem. Ge, danab ag nahipnu oolagppa genab ii dootteb, na ii dim lamidtteb ele, ag uug laa ii doon, elelenab daatteb. Da amunu diig ii doottem.

Duteronomi 7:9

Yawe Nug anam aakku heum amunu, ag Yawe, ahilag Kayak, Nug am Kayak, ag anam doon autna aweg! Nug amu Kayak, Nug oo metta ii uuak kobol hette. Nug nuhig nug tituana nai qakkak nai ii okkultte. Nug danab ah ag oolag Nug mettan, nuhignu oolag mauhtte, nuhig ɗo ele dim lamittegeg, Nug he, ag Nug ele nug oo mauhaknab doyaknu nug tituana nai qakkak hetteb amu, Nug nug tituana nai qakkak amu dim lamitta ukkeb ukkeb, Nug ag buɗulkad menuattak huu laippu bia 1,000 dimppa bekkulag amu, Nug haen amu oh nug tituana nai qakkak amu dim lamidtte.

Sam 31:20

Na amu, na am nahipad danab ah dilagnu lokkumak aben bia daattem; na ag nakka nahip-ppa lokkumatte daatteb. Na anam hena, kobol amuppa na danab nau ag nahipad danab ah eheɗ hattamananu maittak aotteb amu, na ib oo nettem. Yo, danab ah nahipad dilagnu amu, na daattemppa maatte daaegeg, kekeɗ ahilkad hattappeg nauhkkulagnu nai maditteb amu, na nai ahilag amu qee nette.

Gayak Nai 3:23

Oo mauhaknab kobol, oo gai-iitta doya oo metta ehanittak kobol nuhig ele am buttua ohppa bau tuɗidttep, ii iitta mettep; O Yawe, nahip oo metta ii uuak kobol am okkainab daatte.