Sam 147:2 - Nobonob Baibel

² Yawe Nug Jerusalem qabatte. Nug diia ukka laih me dayak danab ah eɗua diia, Israel uɗitte.

Sam 147:2 Referans Kwoze

Aisaia 56:8

Amu Naɗi Yawe Nug nuhikkud danab ah Israelnu wan laalappan qagmatta, omalatteb, ahilag wanppa uɗiglag ele amu, Nug geha danab ah huu laalappanu ele diia uɗieb, ag laa daaglag, ag amu ele oh daaglag.

Sam 51:18

Na enanag, elele doon, danab ah Sion daatteb amu ehanadkkutnu oɗ medattem. Yo, na Jerusalem danab ah ehanadppe, ɠagattag daaglagnu unuqidttem.

Duteronomi 30:3

Yawe, ahilag Kayak, Nug ag diia, ahilag wanppanab eɗua maadkku. Nug ahilagnu oo gai-iitta doya oo metta ehanittak ha, Nug ag matatuatta, wan laalappa mattom, Nug amuppan eɗua diia, qagmaadkku.

Esekiel 38:8

Aɗinu? Butti haen adekku ban hekkulagnu ewak daakku, ag haen amuppa goppeg, wan laa ele ban hekkulag. Wan amuppan danab ah ag tatam banppa eheɗ aon, wan kuɗumppa daappig, amge Yawe he, ag wanppan wan laa kuɗumppanu eɗun uɗin, ag ahilag wanppa, am Israel wan, wan amuam haen elab hele-ettak dayom amu, ag eɗun, aguppa daatteb. Wan amuppan danab ah ag wan laalappa daaegeg, Yawe he, ag eɗun uɗin, baɗak iittappa daatteb. Amu, Gog, haen amuppa na, amu nahipad ele ag goppeg, danab amu ag ele ban hekkulag.

Jeremaia 32:37

Qinob da wan oh, da dahilad danab ah ag ahilag eheɗ hak amunu ool huanak nauhe, oppoɗi bak okkainab ele doyen heppi, kekeɗ ag eɗadna diin, wan atu laalappa goppeg, matatun daaglag ele amu, da wan amu ohppanu qagmaatten omaladppi, ag eɗun uɗin, wan imuppa daaglag. Da ag ehanadppi, ag baɗak iittappa daaglag.

Aisaia 62:7

Iitta! Ag Yawe unuqidppeg ukkeb ukkeb, Nug heeb, Juda danab ag Jerusalem eɗun kalan, ag eɗun uɗin, ahilag wanppa daappeg, Yawe Nug heeb, wan atu ohppan danab ah ag Juda huu binag mettaglag batak. Yawe Nug hik awa dayaya, amu ii hemanu amu, ag ii daan henan, Nug unuqitteg!

Aisaia 14:32

Amu haen Pilistia dilag nai awa ukkak danab ag uɗin, amunu ig oɗ megappeg, ig aɗi amelagppa akkunig? Ig geha ahilag oɗmak inam nob mekkunig, “Yawe Nug he, Sion nug eɗua ɠagattag daatte amunu, danab o ah nuhig aun nug uug maokku, nug ukka, Sion ta, nug padal mak eɗitteb ena dayaknu aben amuppa ena daakku.” Ig anam akkunig.

Jeremaia 31:4

Da ag Israel danab ah ehanadppi, ag eɗun, ɠagattag daaglag. Ag am ah makkun laa padal mekkunu haaha, eɗua ena daya aha, tambarin eppegppa aɗa, musik haaha, oo gamag ahak okkai ele ahi goɗatte, ag amubia hekkulag.

Aisaia 27:13

Ge, danab trampet okkai iwale, danab dotteb, amubia Yawe Nug heeb, laa kekeɗ ag lamatteg, Asiria wanppa gona qettoɗna daatteb, laa Isip wanppa gona qettoɗna daatteb ele amu, ag appanu eɗun uɗin, Jerusalem appa qaukoppa, qauko amuam Kayaknu tituanak daatte, ag appa Yawe noobppa dup nona Nug binag mekkulag.

Nehemaia 7:4

Amu ig aɗ uɗat heut ukke, malak dayom amu, aɗ amu ooppa aab okkai dayom, amge danab ah kuɗum appa ii daappig, qainqainib daappig. Ag lag kuɗum ele eɗun, amuppa ii bappaidppig.

Daniel 9:25

Daniel, na keeke doon, diignu doyak tutukku aɗe! King laa nug Juda, Israel ele ag gona, Jerusalem eɗun bappaidkkulagnu ɗo laa meeb, haen amuppa digmeeb ukkeb, laa king daakkunu goɗen gokkaɗakppa tituanak ele, nug nuhig gumak abenppa tekku amu, amuam haen maha 7, amu haen maha 62 laa ele; oh am 69 aakku. Ag Jerusalem eɗun bappaidnana, ag aab ooppan ib hena, ag aab dimittim daug daug ohppa, kekeɗ ag talilidna, aab ooppa gomananu le moɗ ele buuglag. Ag haen uug eleppa aab okkai amu eɗun bappaidnana, amu hekkulag; uug haenppa ii helob bia, amge ag anam hekkulag.

Matyu 16:18

amunu, da na amenppa attem. Na am Pita, na am men, amu men imuppa da tamaniak dahil buukkul. Buuppi, Satannu ɠagattag nug qeeb ii nema.

Nehemaia 6:15

Kekeɗ ag anam heppig, amge ig aɗnu uɗat heut ukke ukke, kalam onig Elul, kalam amunu deɗ 25ppa ig malamut. Ig deɗ 52 uɗat amu hetata, aakku gogppa temut.

Nehemaia 6:16

Ihinig Kayak ehanikke, ig aɗnu uɗat heut, gogppa teum. Kayak he, gogppa teum amunu, ihinkad kekeɗ, ag wanppan wan laala Juda wan talilidna daatteb, appan danab ah amu, ag amu doon, ag baɗan, akka ahilagnu elele iitta dooppig.

Sam 102:17

Nug laa ag keeke iittanab iitta ele amu, Nug ahilag unuqittak dookku. Ao, Nug ahilag unuqittak ii dimettama. ⌊Nug ag ehanadkku.⌋

Jeremaia 31:10

Danab ah wanppan wan ohppanu ag daulag human, Yawe aɗi atte amu doyeg! Ag doon, amu appeg, danab ah wan laalappa daatteb ag doon autna aoglag. Nug Israel danab ah matatun goppig ele eɗua diia, laippu qagmaadkku, aon appeg doyeg! Yo, Nug sipsip gumak danab laa sipsip nuhikkud dabmadatte bia ag dabmadakku.

Maika 4:6

Yawe Nug atte. “Dimppa, deɗ laappa da danab bu mattami, ag danab autaut oitte bia, da ag qagmatten ⌊heppi, ag eɗun ahilag wanppa daaglag⌋. Ao, da danab ah kekeɗ ag diin gona, wan laappa diia ukka laih me dayak danab ah daaglagnu maatteg daatteb amu, da ag qagmaatten heppi, ag uɗin daaglag. Ge, da danab ah uug mattami ele, da ag qagmaadppi, ⌊ag eɗun wanelagppa daaglag⌋.

Sekaraia 8:7

Am Yawe Nukka Ɠagattag Oh Ele Nug inam atte. “Genabnab da dahilad danab ah ehanadppi, ag kaɗag uɗitteppanu, qaban uɗitteppanu ele eɗun uɗin, ahilag wanppa bena daaglag.