Revelesen 1:1 - Nobonob Baibel

¹ Kayak Nug Jesus Kristus Nug nuhikkud maɗi nid, ag aɗi keeke bekkunu daatte ippunadkkunu Jesus ippunittom. Ippunitte, Jesus he, nuhig engel laa Jon amu ippunitteb, nug amu bukppa yaakkunu uɗiom.

Revelesen 1:1 Referans Kwoze

Revelesen 22:16

Da Jesus, da dahil engel laa mei, ahilagppa ukka, nai dahil imu tamaniak ohppa ag amelagppa mehuqkkulagnu madakkunu ukkom. Dawit nug dahilppan be, da nug buɗubppan bemi. Da hoɗopai boitinannu amahlak bia daattem,” awa aum.

Revelesen 22:6

Amu engel nug baula da amelppa aum. “Nai imuam genabnab, danab ah oh ag oolagppa genab dooglagnu elele. Naɗi Kayak, Nug propet nuhikkud gumadtte ele amu, Nug nuhig engel me, keeke oh paha bekkulagnu daatte amu nuhikkud maɗi nid ippunadkkunu uɗiom,” awa aum.

Galesia 1:12

Da danab laa nuhigppanu ii aomi. Laa ele amu, danab laa nug da amu ii ippuniɗom. Iitta. Jesus Kristus Nug nukka da ippuniɗom.

Amos 3:7

Am anam daatte amunu, Naɗi Yawe Nug aɗi keeke laa ⌊nuhikkud propet amelagppa qehakkak dayeye,⌋ ii hette. Ao, Nug tatam nuhikkud propet, ag am nuhikkud maɗi nid amu, Nug ag amelagppa nuhig maittak, lokkumak daatte, amu a doyeg hette.

Epesus 3:3

Kayak Nug anam hekkunu maittak awom, amge dabmak amuam anukka lokkumak dayom. Lokkumak dayom, me Kayak Nug dahilppa mehuqe doomi. Nai amunu amu, da matu ahilagnu nai tutu laa yen malami.

Revelesen 1:19

Amunu keeke na anidme, keeke gemu daatteb, amu keeke aɗi dimppa bekkulagnu ele amu oh buk itoɗiakppa ye!

Daniel 9:23

Kayak Nug nahipnu ooppa enanag dootte amunu, na digmena unuqidme, haen amuppanab da uɗien, unuqittak nahip nai nob medakkulnu doomi. Amunu na tulegleg anidme, nuhig meu dabmenan, nuhig diignu ele tutukku doye!

Revelesen 1:9

Da Jon, da ag lailag, da ag ele ig oh Jesus nuhigppa laippu daat, uug mua ele imu maottem. Da Kayaknu ɗo maɗoɗ ooppa, amunu uɗat haknu, ag ele daattem. Ig oh Jesus ig hekkunignu atte amu, ig nuhig ɠagattag aot daatta, ig tuɗidta, uug doyaya eɗittaknuib dabmak awak kobol dim lamidttem. Da Kayak nai mattimi da Jesus Kristusnu oolppa genab doottemnu ami, amunu ag da nud laa onig Patmos, amuppa meiɗppig.

Jon 3:32

Laa Nug hab attannu neum amu, keeke Nug doya malom, keeke Nug anttom ele, Nug amunu maditte, amge laala ag oolagppa genab ii dootteb.

Daniel 9:21

haen amuppanab Gabriel, nug pahanab hagagaɗa, gumiɗa uɗiom. Nug da laa anukka tuleglegppa anidmi, nugib aakku. Nug mana mettak danab hanhan tueb meeme, doɗ laa manan, Kayak medatteb, nug tueb haen amuppa dahilppa uɗiom.

Jon 15:15

Maɗi nid nug danab okkai nuhig aɗi hette amu, nug ii dootte amunu, da baula ahilagnu maɗi nid ii attem. Iitta. Da ahilagnu da lailad attem. Aɗinu? Da Mamel keeke oh da amelppa a doomi, amu da amu oh mattiyi ag dooppig.

Daniel 8:16

Nug tula ba, hibaitta daye, baag laa, Ulai le daugppa appa aum. “Gabriel, na danab imu nug tulegleg anidtte amu, na tulegleg amunu meu mehuqppe doyaɗ!” awa aum.

Sam 25:14

Laa ag Yawenu ebehilag oh bodoetta le mette amu, Yawe Nug ag ele layam batatte. Nug ag ehanatte, ag nuhignu nug tituana nai qakkak nainu meu dootteb.

Revelesen 4:1

Keeke amu oh dimppa da neekke, hab aabppa od matulak dayeye anidmi. Da baag tatam trampet oqotti bia doomi amu, da baula dooiyi amu aum. “Na inam beppe, da keeke dimppa bekkuoitte ele ippunidppi antte!” awa aum.

Jon 12:49

Da dakka dahil dabmakppa nai ii madittem. Iitta. Mame, Nug da meiɗe uɗimi, Nug da uɗat meɗom ele, Nug da aɗi nai akkulnunab, attem hein madikkulnunab ele meɗom.

Jon 8:26

Da epeɗiak danab nug danab hettoɗiakppa epeɗitte, amubia da ag epeɗiadkkulnu nai kuɗum madikkulnu elele, amge laa Nug da meiɗe uɗimi ele, Nug genabib maditte, da nuhigppa nai aomi amu, da wanppan danab ah amelagppa amuib madittem,” awa aum.

Revelesen 21:2

Anam amu, da aab okkai, am Jerusalem bau Kayaknu tituanak daatte, aab amuam hab aabppa, Kayak toppanu neene anidmi. Nug am ah bau nug danab aokkunu bala mettom, amubia.

Rom 16:25

Ig Kayak binag metu! Nug da Jesus Kristusnu Nai Ena mehuqttem bia, amu nai lokkumak anukkanu dayom, nai amu atte, amubia ele, Kayak Nug ag ahilag ooppa genab doyakppa ɠagattag daaglagnu ehanadkkunu elele daatte.

Jon 17:8

Nai oh na da meɗame ele amu, da ag mattai aoppig. Da nahip-ppanu uɗimi amu, ag genab dootteb; na da meiɗe uɗimi, ag amu ele oolagppa genab dootteb.

Taitus 1:1

Da Pol, da Kayaknu maɗi nid, amu Jesus Kristusnu totol danab ele daattem. Kayak Nug da laa Nug ag tituanattom ele, da ahilag ooppa genab doyak ehanidkkulnu, da ele doyak diig genabib, doyak amuam ag Kayaknu neekkakppa genab tutukku hak danab daaglagnu ippunadtte amu, da ag doyak amu ele ippunadkkulnu meiɗe uɗimi.

Revelesen 5:7

Aria, Sipsip Nag amu Nug ukka, Kayak Nug sia king ⌊anuqak,⌋ appa eppeg naɗiap-ppa buk itoɗiak amu aɗa dayeye, Nug aɗitta awom.

Revelesen 17:1

Amu dimppa engel eblaih aɗit ele ag tappiɗ eblaih aɗit ele, amunu oolagppa laippu laa nug doa, da amelppa inam aum. “Na inam doppe, da gappai ah onig ele, nug le kuɗum qaɗelagppa daatte ele, nuhig nob nau mak ippunidkkul.

Revelesen 19:9

Amu dimppa engel nug da amelppa aum. “Na nai imu ye! ‘Danab ah, Kayak Nug ag Sipsip Nagnu ah awaknu hobulppa uɗiglagnu onilagppa eum ele amu, ag itittak ena aoppig daatteb,’ ” awa aum. Awona amu, nug da amelppa aum. “Nai imu am Kayak oɗe, amu nai nuhig am nai genab,” awa aum.

Revelesen 19:10

Anam a amu da nug noobppa dup noin binag mekkulnu nug baegppa laippun gatel qaun oin gomelen, iɗul wanppa memi, amge nug da amelppa aum. “Na anam ii hemana! Da na, amu na laipad ele, ag oh Jesusnu oolagppa genab doonna, nuhignu mehuqtteb ele, da na ag ele, ig oh am Kayaknu maɗi nid. Na Kayak noobppa dup nona binag me! Aɗinu? Propet ag Kayak Ouɗi ɠagattagppa Jesusnu mehuqak heppig, amubia Jesusnu mehuqak oh am Kayak Ouɗi ɠagattagppa bette,” awa aum.

Revelesen 21:9

Anam a amu, engel eblaih aɗit ele ag tappiɗ eblaih aɗit ele aɗualadppig, amuppa keeke naunab danab he nauhaknu eblaih aɗit ambak ele, ag oolagppanu laippu laa nug doa, da amelppa aum. “Na do! Da ah makkun bau Sipsip Nag wau ippunidkkul,” awa aum.

Revelesen 22:1

Amu dimppa engel nug le laa, le amuam bauklel le, nug le amu ippuniɗom. Le amuam men onig kristal, dubuttid nakok laa iitta, amubia dubuttid nakok laa iitta ele daatte. Le amuam Kayak amu Sipsip Nag ele, ahilah sia kingppanu ba

Revelesen 22:8

Da Jon, da nai imu doomi, keeke ele anidmi. Amu da nai doyen malen, keeke ele anitten malen, da engel nug keeke imu oh ippuniɗom ele, da dup noin nug binag mekkulnu nug noobppa gatel qaun omi,

Revelesen 22:9

amge nug da amelppa aum. “Na anam aib heme! Da am Kayaknu maɗi nid, na, na laipad propet danab, amu aun laa oh ag buk imuppanu nai dim lamidtteb ele, ag nuhig maɗi nid daatteb, amubia. Na Kayak aakkuib Nug noobppa dup nona binag me!” awa aum.