Prowerb 6:16 - Nobonob Baibel

¹⁶ Am keeke eblaih laippu ele, Yawe Nug amunu nau ninig ele dootte. Ge, Yawe Nug keeke eblaih aɗit elenu ooppa uuaknab dootte.

Prowerb 6:16 Referans Kwoze

Sam 11:5

Yawe Nug genab tutukku hak danab, nau hak danab ele oh epeɗiadtte. Ao, Nug laa ag lailkad guittak nau mauhnoak mattaknu oolag hette ele, Nug ahilagnu nau ninig ele dootte.

Prowerb 8:13

Aun laa nug Yawenu ebehi oh bodoetta le mette amu, nug eheɗ haknu kobolnu nau ninig ele dootte. Da, Doyak Dabmak Ena Ele, da dada kobol, beɗuppa tak kobol, eheɗ hak kobol, amu nai eheɗ tutukku iitta mattiak ele, da kobol amu ohnu nau ninig ele doottem.

Prowerb 11:20

Yawe Nug danab ag eheɗ haknu ag tiilagppa daatte amu, Nug ahilagnu ena iinab dootte; amge Nug aun aɗi ag nuhig neekkakppa ag danab oolagppa kaliak laa iitta ele, Nug ahilagnu enanagnab dootte.

Prowerb 3:32

Aɗinu? Yawe Nug, danab nug eheɗ haknu nug tiigppa daatte, Nug nuhignu ena iinab dootte, amge Nug genab tutukku hak danab nuhig dabmak lokkumak daatte ippunadtte.

Duteronomi 25:16

Aɗinu? Aun aɗi ag kobol hambuppuakppa keekenu okkai melemel eheɗppa, o keekenu uug skel nauppa anttaknu hetteb amu Yawe, ahilag Kayak, Nug amu dilagnu ooppa uuaknab dootte.

Prowerb 17:15

Hettoɗiakppa danab eheɗ heumnu, “Nug eheɗ ii heum,” anak daakkutai, o, laa nug eheɗ ii heumnu, “Nug eheɗ heum,” anak amu ele daakkutai; amge Yawe Nug hambuppuak anak aɗit amu ohnu ooppa uuaknab dootte.

Prowerb 11:1

Danab nug doyaya, keekenu uug anidkkunu skel uɗat pehettak ii hettep-ppa mette amu, Yawe Nug amunu ooppa uuaknab dootte; amge danab nug uug doyaknu keeke pehettak skelppa uɗat mattak amu, Yawe Nug amunu ooppa enanagnab dootte.

Amos 2:1

Yawe Nug inam atte. “Moap danab ag hipunin kuɗum heppig amunu, da ool nauhtte. Da ool nauhtte amunu, da ag bu madakkul. Da oppoɗi bak dahil heppi, iitta ii mema. Hipunin laa ag heppig am, ag ⌊oo doyak ii doon, ag naunab hena, ag⌋ Edom dilag king ebehiud aon, manaeg ewa, kalu ka bia dayom.

Amos 1:11

Yawe Nug inam atte. “Edom danab ag hipunin kuɗum heppig amunu, da ool nauhtte. Da ool nauhtte amunu, da ag bu madakkul. Da oppoɗi bak dahil heppi, iitta ii mema. Hipunin laa ag heppig am, ag lailkadnab, am Israel danab ah amu, ag ag aqaglagnu qep elab aɗan, lamadna, ag oo bodoetta le mak nakok laa dooglagnu ii doonna uuppig. Ag uueg, ahilag oo nauhak am aab ewawaib daatte bia dayeye; ag lailkadnab dilagnu oppoɗilag be amelag kokoɗ eppa dayom.

Amos 1:9

Yawe Nug inam atte. “Tair danab ag hipunin kuɗum heppig amunu, da ool nauhtte. Da ool nauhtte amunu, da ag bu madakkul. Da oppoɗi bak dahil amu heppi, iitta ii mema. Hipunin laa ag heppig am, ag dahilad danab ah ele layam batan, nug tituanna nai qagappig, amge ag nai amu lopaɗna, ag dahilad danab ah dilag aab kuɗum eɗadna, aab amunu danab, ah, nid ele oh aɗualadna, diin gona, Edom danab ah dilag maɗi nid daaglagnu maatteg, Edom danab ag daden maadppig.

Amos 1:6

Amu Yawe Nug inam atte. “Pilistia danab Gasa daatteb ag hipunin kuɗum heppig amunu, da ool nauhtte. Da ool nauhtte amunu, da ag bu madakkul. Da oppoɗi bak dahil amu heppi, iitta ii mema. Hipunin laa ag heppig am, ag dahilad danab ah dilag aab kuɗum eɗadna, appan danab, ah, nid ele aɗualadna, diin gona, Edom danab dilag maɗi nid daaglagnu maatteg, Edom danab ag daden maadppig.

Amos 1:3

Yawe Nug inam atte. “Damaskus, ⌊Aram danab ippunigtte⌋ ag hipunin kuɗum heppig amunu, da ool nauhtte. Da ool nauhtte amunu, da bu madakkul. Da oppoɗi bak dahil amu heppi, iitta ii mema. Hipunin laa ag heppig am, ag Gileat danab ah eheɗ nau hadappig. Aram ag danab ee aeg mumuɗaknu keeke, aeg aenppa hak ele ee aeg mumuɗtte, Aram ag Gileat danab ah eheɗ anambia mumuɗadppig.

Prowerb 30:21

Keeke uug ele ewam laa wanppa bena heeg, wan uɗaltte; ewam am iitta, keeke waɗele wanppa bena heeg, wan am uug amu maokkunu elele iitta. Amuam inam:

Prowerb 20:23

Uug doyaknu keeke skelppa uɗat mattak pehettak iitta amu, Yawe Nug amunu ooppa uuaknab dootte. Yo, danab nug skelnu keeke uug pehettak he ii bette, nug amuppa uɗat hette amu, Yawe Nug amunu oo ena ii daatte.

Duteronomi 24:4

gamu tatamnu nug ah amu, Kayaknu neekkakppa nug ooppa dubuttid tak ele daatte, nug Kayak ele ouqa dayaknu elele iitta beum daye, eɗua ii aoma. Aɗinu? Yawe Nug amunu ooppa uuaknab dootte. Ag heppeg, Yawe, ahilag Kayak, Nug wan ag aulag daakkunu madakkunu hette ele amu, wan amu dubuttid ele daakkunu aib heppig.

Duteronomi 23:18

Yawe, ahilag Kayak, Nug ib baag ah, ib baag danab ele, Nug ahilagnu am ooppa uuaknab dootte amunu, danab o ah amunu laa ib baag kobol hakppa men doɗo awa medakku dayeb, na men doɗo amu aon, Yawe, ahilag Kayak, Nug laugppa gona, Yawe keeke genab medakkutnu nahip nai anan ɠagattag qettan ame ele, na amu Yawe men doɗo amuppa medakkutnu aib meme.

Amos 2:6

Yawe Nug inam atte. “Israel danab ag hipunin kuɗum heppig amunu, da ool nauhtte. Da ool nauhtte amunu, da bu madakkul. Da oppoɗi bak dahil heppi, iitta ii mema. Hipunin laa ag hetteb am, ag genab tutukku hak danab aɗualadna, genab tutukku hak danab ag laa dilag maɗi nid daaglagnu maatteg, laa ag silwa men doɗoppa daden metteb. Ao, Israel ag daɗek danab aɗualadna, daɗek danab ag laa dilag maɗi nid daaglagnu maatteg, laa ag baeg gaɗappa, men doɗo iittappa, baeg gaɗappaib daden metteb.

Amos 2:4

Yawe Nug inam atte. “Juda danab ag hipunin kuɗum heppig amunu, da ool nauhtte. Da ool nauhtte amunu, da ag bu madakkul. Da oppoɗi bak dahil heppi, iitta ii mema. Hipunin laa ag heppig am, ag da, Yawe, ag dahil ɗo dimedappig. Ao, ag dahil ɗo dim ii lamidppig. Ag amu henana, ag kayak hambuppuak dim lamadkkulagnu eeɗak doon, dim lamadppig; kayak hambuppuak amuam ag mamelkad aɗi kayak hambuppuak dim lamadppig, am kayak amuib.

Prowerb 30:29

Keeke ewam laa, tappa ukkak ahilkad am anttaknu enanag; ewam am iitta, keeke waɗele ag anam aakku tappan gotteb. Amuam inam:

Prowerb 20:10

Uug doyaknu keeke skelppa uɗat mattak pehettak iitta, aria elab doyaknu melemel pehettak iitta; keeke aɗit amu ohnu Yawe Nug ooppa uuaknab dootte.

Revelesen 21:27

Amu keeke oppiak iitta ele aab okkai amuppa ii noma. Laa kobol nau digdig, Kayak nug kobol amunu ooppa uuaknab dootte, amu hambuppuak kobol hette ele amu, nug ele iitta. Am laa ag onilag Sipsip Nagnu buk, amuam buk onig Bauklel Awe Onig Yaaknu Buk, buk amuppa ag onilag yaak daatte ele amu, ag aakkuib aab okkai amuppa nokkulag.

Prowerb 30:24

Wanppa keeke waɗele ag keeke nakok daatteb, me ag doyak dabmak ena okkai ele daatteb. Keeke amuam inam:

Prowerb 30:18

Keeke ewam laa da dabmein doyadkkulnu elele iitta; ewam am iitta, keeke waɗele da dabmein, diignu doyak tutukku dookkulnu elele iitta. Amuam inam:

Prowerb 6:15

Diig amunu uug naunab nuhigppa pahanab bekku. Ao, nug nauhak pahanab antta, padal meeb, babaittaknu ib laa ii daama.

Prowerb 6:17

Keeke eblaih aɗit ele amuam inam: dada ha laa eɗittaknu dabmak awak kobol, nai hambuppuak mattiak kobol, danab ah eheɗ laa ii heeg, laa hamu aqe mauhak kobol,

Jeremaia 26:15

Amge ag imu tutukku doon oiyeg! Da keeke laa ag hak amunu iuppeg mauhkkulnu laa ii hemi amunu, ag da iuppeg ii mauhkkuloitte. Ag da iuppeg mauhkkul amu, ag aakku eheɗ heppeg, ag beɗulagppa aab daakku amunu, Yawe Nug ag, aab okkai imu, amu danab ah aab imuppa daatteb ele bu madakku. Amuam genabnab daattenu diig am, Yawe, laa iitta, Nugib keeke imu oh appi dooglagnu meiɗe uɗimi.” Jeremaia nug nai amu ag amelagppa mattiom.

Sekaraia 8:17

Ag anen anen lailkad guittak mattaglagnu maittak aib aoppig. Ag keeke laa, keeke amuam genab iitta amu, ag keeke amunu anana, da dahil nai ɠagattag qetten, amuam genab attem, aib appig. Ag amu hekkulagnu oolag aib mauhom. Aɗinu? Kobol amu ohnu amu da nau ninig ele doottem.” Yawe Nug anam atte.

2 King 21:16

Amu Manase nug Jerusalem appa danab ah eheɗ laa ii heppig kuɗum, huanak aqe mauhppig. Nug anam ha, amu nug ele he, Juda danab ah ag hipunin heppig. Ag hipunin amu henana, ag Yawenu neekkakppa eheɗ heppig.

Job 5:19

Kayak Nug baubau ehanitteb, na qagaiettakppa ii daamna. Ge, haen kuɗum uug nahip-ppa bekkunu daakku, amge nahip-ppa ii bema.

Sam 5:7

Na oo mauhaknab kobol dim lamidttem amunu, da na lautppa wakkulnu elele. Da nahipnu ebehil oh bodoetta le me doyen, nahip mettid lag nahipnu tituanak daatte ele, da amu neekkitten, da dup noin binan mekkul.

Prowerb 12:22

Yawe Nug danab ag nai hambubutteb ele, Nug ahilagnu ooppa uuaknab dootte; amge nai genabib mattiak danab dilagnu amu, Nug ahilagnu enanagnab dootte.

Prowerb 21:4

Dada ha laa eɗittaknu dabmak awak, dada hak kobol ele; nau hak danab ag amu henana, ag aakku hipunin hetteb.