Prowerb 3:3 - Nobonob Baibel

³ Na oo mauhaknab kobol, oo metta ii uuak kobol ele aib uuatme. Ao, na danab nug keeke qettoɗmanu nug baagppa qakke daatte, amubia na kobol amu hanhan dim lamidkkutnu anam bia he! Ge, na danab laa nug keeke laa daug atimanu uɗugppa yaatte, amubia na kobol amu daut atimanu aon ootppa me!

Prowerb 3:3 Referans Kwoze

2 Korint 3:3

Ig ag oolagppa daat ehanattut, ag oolagppa genab dooppig amu, danab oh ag Kristus Nug nukka yaaknu uɗug amu yom anidtteb. Nug ya mekke, ig aot oittem. Nug gauppa, men mahappa, ii yom. Iitta. Nug Kayak Bauklel Ouɗippa danab oolagppa yom.

Prowerb 7:3

Na danab laa nug keeke laa daug atimanu, nug muɗi keeke, nug eppeg doɗoppa qagatte, amubia na hanhan dahil ippunittak imu nahip dabmak anuqakppa meppe dayaɗ! Ao, danab laa nug keeke laa daug atimanu uɗugppa yaatte, amubia na dahil ippunittak, nahip dabmakppa meppe dayaɗ!

Hibru 10:16

“Naɗi Nug atte. Nug tituana nai qakkak bau, da heppi, ag Israel danab ah, da ag ele haen amuppa hekkunig am inam. Da heppi, dahil ɗo oh ag oolagppa daakku. Ao, da heppi, dahil ɗo oh ahilag dabmakppa daakku.”

Prowerb 6:21

Na nai i auɗ doome ele amu, na hanhan amunu dabmenana oiye! Ge, danab nug keeke laanu dabmekkunu ha, kaleleppa amunu at qakka, baagppa pale daatte, amubia nai i auɗ doome, nai amu hanhan nahip dabmakppa daakkunu dautppa dayaɗ!

Malakai 2:6

Tatam haen, haen amuppa Lewi nug Israel danab ah amelagppa nai doyak diig genabibppanu, da nug anam ippunadkkunu ami ele, nug nai amu ag amelagppa mattiom. Nug hambuppuak nai laa ii mattiom. Nug da ele maɗoɗ ele oiɗa, nug genab tutukku hak kobol ele dim lamittom. Nug he, danab ah kuɗum ag hipunin ii heppig.

Prowerb 16:6

Danab nug hipuninnu oo mauhaknab kobolppa, oo metta ii uuak kobolppa ele eheɗ haknu nob nau iitta mekkunu he elele medatte. Amu danab nug Yawenu ebehi oh bodoetta le mette doya amu, nug eheɗ ii hema.

Prowerb 20:28

King nug oo mauhaknab kobol, oo metta ii uuak kobol ele dim lamidtte dayeb, kobol aɗit amu heeh, nug abenabppa enaib daatte; oo mauhaknab kobolppa nuhig king dayak ii uɗaltte.

Prowerb 1:9

Aɗinu? Tolittak nai dahil, aninnu ippunittak nai ele amu, amu oh am baɗi, ikkin bala mettaknu bia daakku; am kalele, na baat bala medakkunu bia daakku.

Sam 119:11

Da nahip-ppa hipunin qak hepa, da nahip nai da oolppa mein, dabmak dahilppa ele memi.

Sam 25:10

Am danab ah aun aɗi ag Yawenu nug tituana nai qakkak dim lamidtteb, ag nuhig nai ele oh waappa daan, dim lamidtteb ele amu, Yawe Nug oo mauhaknab kobolppa, oo metta ii uuak kobolppa ele ag ehanadtte.

Eksodas 13:9

Aria, Bret Yis Iitta Lanaknu Hobul Nakok, amuam geha danab nug aɗi keeke dabmekkunu oo hette ele, nug amu dabmekkunu nug eppeg gomeppa nai ye daatte, o nug uɗappa keeke laa aiha daatte amu, hobul amuam, ag Yawe Nug ahilagnu uɗat naɗi heum dabmekkulagnu, nuhig ɗo nai ele dabmena mattiglagnu at amubia daakku. Aɗinu ag Yawenu ɗo dabmena, amunu mattiglag? Yawe Nug uɗat naɗinab ha, Isipnu diia omalatte uɗippig.

Jeremaia 17:1

Amu Yawe Nug atte. “Danab nug aen maha laa, o men ɠagattag laa awa, amuppa nai laa men laappa otaɗtte, laa nai amu hamu obikkunu elele iitta daatte. Nai anam daatte, amubia Juda dilag hipunin am ag oolagppa yaak daatte. Ao, nai amuam doɗ mana mettaknu qaɗab ahilag anen anen qeqeɗi daug waɗeleppa daatteb, qeqeɗi amuppa yaak daatte.

Duteronomi 6:8

Am ag dabmenan oiglagnu amu, ag pepa qattippa yaan, ag eppelagppa at dayaknu qakkaglag, amu ag uɗalkadppa ele qata-aqadkkulag.

Hosea 4:1

O Israel danab ah, ag ahilag wanppa daatteb amu, Yawe Nug ag aakku diia, hettoɗiakppa waum amunu, ag Yawenu nai doyeg! Nug ahilagnu atte. “Ahilag wanppa amu, oo metta ii uuak kobol, oo mauhaknab kobol ele ii daaeheh, ag ele Kayak nakok laa ii dootteb.

Matyu 23:23

O gadonnab gadon ag ɗo gumak danab-Parasia amu ɗo mehuqak danab ele. Ag hambuppuak danab. Ag dabmeig! Ag keh naunau amu oh oppateg, ameg eblaih tanig ele neeg, ameg laippu amu Kayak medatteb, amge ag ɗo laa okkai ii dim lamidna oitteb. Ɗo ag ii dim lamidna oitteb ele am, nai doya mala hettoɗia epeɗia elele mettak kobol, laa dilagnu oo gai-iitta doya oo metta ehanittak kobol, amu oo metta ii uuak kobol ele. Ag ɗo ii dim lamidtteb, amu laa dim lamidtteb ele, ag amu oh dim lamidlob, amuib am tutukku.

2 Samuel 15:20

Na tumainab iikku da ehaniɗkkutnu uɗime. Amu gemu da heppi, na ig ele ɗo danab, lag iitta bia da atu atten, da amu ii doottem ele, na ig ele anam oignig am ena iitta amunu, na, na baenadppa ele ag eɗun gokkulag am nai iitta. Amu Kayaknu oo bodoettak kobol, nuhig oo metta ii uuak kobol ele nahip-ppa daakkunu ool daatte.” Dawit nug Itai amegppa anam aum.

Sam 85:10

⌊Qinob, Kayak Nug heeb,⌋ oo mauhaknab kobol, amu oo metta ii uuak kobol ele aa ouqak miagib daaglah. Ge, genab tutukku hak kobol, amu maɗoɗ kobol ele am tamaniya daaglah.

Prowerb 14:22

Danab ag kobol eheɗ hekkulagnu dabmetteb, ag padal metteb; amge laa ag kobol ena hekkulagnu maittak aotteb, ag oo mauhaknab kobol, oo metta ii uuak kobol ele, ag kobol aɗit amuppa daatteb.

Eksodas 34:6

Nug anam ha, Nug Moses noobppa wanana, Nug inam anan mattiom. “Da am Yawe, Da am Yawe. Da Kayak, da am oo gai-iitta doya oo metta ehanittak diig, oo bodoette enanag maɗoɗ ele haknu diig ele. Da paha ool ii nauhtte. Dahil oo mauhaknab kobol, dahil oo metta ii uuak kobol ele am, ambeya, letaya nettep.