Prowerb 29:1 - Nobonob Baibel

¹ Danab nug oo eɗukkunu daug batak kuɗum awawa, hamu bia doyaya, nug oo eɗumanu dabmak nuhig ɠagattag eppe oitte, nug guittak okkai awa nauhkku; nauhaknu aɗi keeke bette amu, baoliaknu ib laa iitta.

Prowerb 29:1 Referans Kwoze

Prowerb 6:15

Diig amunu uug naunab nuhigppa pahanab bekku. Ao, nug nauhak pahanab antta, padal meeb, babaittaknu ib laa ii daama.

1 Samuel 2:25

O nid aɗit, danab laa nug layagppa hipunin heeb amu, Kayak Nug aa oolahppa gamag danab daakkunu elele, amge danab laa nug Yawe, nuhigppa hipunin heeb amu, aun nug aa oolahppa gamag danab daakku?” awa aum. Eli nug nug bekoɗ amelahppa anam aum, amge aa mamelahnu nai ii dabmedapiɗ. Aɗinu? Yawe Nug heeb, aa beɗulah nauhkkulahnu dabmeum.

Prowerb 28:18

Laa nug Kayaknu neekkakppa danab ooppa kaliak laa iitta ele amu, Kayak he, nug padal ii mette; amge laa nug eheɗ haknu nug tiigppa daatte ele, nug pahanab na qekku.

Jon 13:18

Da madittem imu amu da ag oh ahilagnu ii attem. Da danab dahilad, da tituanadmi ele amu, da ag diilag doottem. Amge Kayak nai niitte amu genab meu bekku. Nai amu inam atte. ‘Am da layalnab, i oh ee lamuɗ ele, nug da kekeɗ meɗom.’

Jon 13:26

Nug anam a amu Jesus amegppa aum. “Da geha bret tappiɗ lewa eleppa meppi nob taulen medakkul amu, danab nug aakkuib,” awa aum. Aria, Jesus Nug bret lewappa ma awa, Saimon bekka Judas Iskariot mettom.

1 Tesalonaika 5:3

Danab ah ag, “Haen ena aakku beum, ig maɗoɗ ena daagnig,” abeppeg, haen amuppanab keeke eheɗ, ag heeb nauhkkulagnu, ahilagppa bekku. Keeke eheɗ amuam ah nug nid aokkunu guittak paha bette, amubia beeb dooglag. Danab ah ag keeke eheɗ amu ii qe-eɗidmana.

Aposel 1:18

(Judas nug eheɗ ha, uɗat amunu men doɗo awom ele amuppa ag wan laih laa daden meppig. Aria, nug nukka wan amuppa nug beɗu aiha na qe, beɗu aoɗe, biig oh wanppa ne,

Nehemaia 9:29

Na ag nau aomnanu dabmettak nai mattana, ag eɗun nahip ɗo waappa daaglagnu ag amelagppa ame, amge ag beɗuppa tak danab dilag kobol dim lamidna, ag nahip haknunab nai ii dim lamidppig. Ɗo nahip, danab nug dim lamidtte ele nug bau daakku amu, ag ɗo amu tippaladna, ii dim lamidna, hipunin heppig. Ag na oɗen dim lamidmananu dabmak ahilag ɠagattag eppe, ag na dimettana, ag dabmak eɗukkunu uun autna aona, ag nahip nai dooglagnu uun, ii dooppig.

2 Stori 36:13

King Nebukatnesar nug nug waappa daakkunu nuhig nai ɠagattag qetta anaknu duttune, nuhig nai Kayak onigppa ɠagattag qedata, anam aum, amge nug amu ha dimppa nug dabmak eɗue, Nebukatnesarnu nai tappe neum. Nug nuhig dabmak he, ɠagattag eppe, nug eɗua, Israel dilag Kayak, nug Yawe amu, nug Nug dim lamidkkunu uuom.

2 Stori 33:10

Manase nug anam heehe, Yawe Nug Manase, nuhikkud danab ah ele ag nau aomnanu nai ag mattom, amge ag dab-ii-meppig.

1 King 22:28

King nug anam a amu, Mikaia nug eɗua Ahap amegppa aum. “Na maɗoɗ ele eɗun uɗikkut dayeb amu, Yawe Nug da oɗelppa nai ii aum,” awa aum. Nug anam ana, amu nug tuɗitta aum. “Ag danab ah oh, ag dahil nai doyeg!” awa aum.

1 King 18:18

Nug anam oɗ mette, Elaiya nug Ahap aum, nug amu nob ma inam aum. “Da iitta, da Israel uug laa ii mattami, amge na, amu na mamen ele, aa, amu aa baelti ele, ag Israel uug mattaegeg uɗie, gemu ele hetteb. Aɗinu? Ag Yawenu haknunab nai tappaeg ne, ag kayak hambuppuak Bal iɗu iɗu noolagppa dup nona binalag meegeg uɗie, gemu ele hetteb.

1 King 17:1

Elaiya nug am propet laa. Nug appag diig am aab onig Tisbe. Aab amuam Gileat wanppa dayom. Haen laappa Elaiya nug King Ahap gumitta ukka, amegppa inam aum. “Yawe, ig Israel, ihinig Kayak, da nuhig maɗi nid daattem, amu Nug genab bau daatte, genab amubia amu, geha gu, baito ele maɗ laala wanppa baula ii nema. Anam dayebeb ukkeb, geha da appi, amu nekku,” awa aum.

1 Samuel 2:34

Am kobol amu oh genab bekkulag amu, amunu at am inam. Na begapaɗ aɗit, Hopni, Pinias ele, aa oh deɗ laippuppa mauhkkulah.

Jeremaia 17:23

Da ɗo amu ag mattami, amge ag memetalkad ag ii doon, ii dabmeppig. Ag akka ag ahilag dabmak dim lamidkkulagnu wagai mena hena, ag toliatta, bu mettak da mattami ele dab-ii-meppig amunu, ag oolag ele ii eɗuppig,” awa atte.

Aisaia 48:4

Da ag, ahilag dabmak am ɠagattag eppom daatte, da ag heppeg, dabmak ahilag eɗukkunu iinab hetteb am doomi. Ahilag dabmak am ɠagattagnab; aen o bras bia.

2 Stori 25:16

Propet nug anam mattieye, nai nuhignu mattiom am gog ii teum, amge King Amasaia nug aha, nuhignu nai am okkula, nug amegppa aum. “Da am king, amu ig na da ulum meɗak danab daakkutnu tituanidmutte? Uue! Na ii uukkut dayeb amu, da appi, na mauhkkut,” awa aum. Amasaia nug anam a, propet nug mattiak uuom, amge nug tatam nai tutu laa mattia, inam aum. “Na tatam eheɗ heme, gemu na dahil ulum mettak nai dookkutnu uume amunu, da doottem, Kayak Nug nuhig dabmak na nitteb mauhkkutnu ɠagattag eppom daatte,” awa aum.

1 King 20:42

Aria, propet nug king amegppa aum. “Yawe Nug inam atte. ‘Da am Yawe, da attem. Danab laa, da nuhignu nug dahilnuib, dahil pelemppa daakkunu dabmak aoi ɠagattag eppom daatte amu, na he, nug ukkom amunu, nug ouppa na mauhkkut, nahipad danab ah ag am nuhikkud danab ah oulkadppa, ag ele maukkulag,’ ” awa aum.

Job 9:4

Kayak Nug keeke oh dootte, doyak dabmak ena nuhig am bodok iitta. Nuhig ɠagattag ele okkai, naɗi ele. Laa nug wagai ma, Kayak eɗidkkunu haaha eɗidkkute? Iittanab iitta!

Prowerb 28:28

Haen nau hak danab ag gumak aben aotteb amu, danab ag wana, lokkumtteb; amge haen nau hak danab ag nauheg amu, genab tutukku hak danab ag eleleib daatteb.

Jeremaia 36:31

Da nug, nug bekkod amu nuhikkud ehanittak danab laa, ag nau heppig amunu, nau hak amunu da ag bu madakkul. Da Jehoiakim aɗi dilagppa, danab ah Jerusalem daatteb, amu Juda danab ah ele, da uug naunab digdig ahilagppa hekkulnu ami amu, uug amu oh, da heppi, ag aakku bekkulag. Ag dahil nai dooglagnu uun ii dooppig amunu, da anam aakku hekkul.’ ” Yawe Nug anam aum.

Habakuk 2:7

Da Yawe, da Babilon dilag okkai amegppa attem. Laa na ahilkad keeke yab aome ele amu, ag qinob iite ahamna? Ag ahan heppeg, na iite ottaimana? Ag ahan heppeg, na ag eppelagppa daakkut.

Eksodas 9:7

Amu Paro nug Yawe aum am genab beum, o iitta amu, nug amu tutukku dookkunu, nug nuhikkud danab laa, ag gona, anidkkulagnu maatte gona, ag eɗun uɗin, Paro amegppa Israel dilag doɗnu laippu laa ii mauhom appig, amge Paro nug kobol beum amunu tutukku dab-ii-meum. Iitta. Nug nuhig dabmak ɠagattag eppak dayeye, nug Israel danab ah uuatte ii goppig.

Prowerb 28:14

Danab aun nug hanhan Yawenu ebehi oh bodoetta le mette, nug itittak ena awom daatte; amge aun nug kobol ena hemanu dabmak nuhig ɠagattag ebatte, nug am uugppa notte.

Aisaia 28:22

Naɗi, Nug Yawe Nukka Ɠagattag Oh Ele, Nug da amelppa Nug genab wan imu oh heeb nauhkkunu ɗo meum daattenu aum amunu, ag Yawe nai maditte, ag amunu imak uueg! Ag amu ii uuglag dayeb, Yawe Nug bu mettak ahilag tuɗitteb, awaknu daatte eɗittak, okkainab mekku.

Jeremaia 14:19

O Yawe, na Juda danab ah geɗadna malamete? Na Sion danab ah dilagnu ena iinab doottemte? Na guittak nau mekke, ig eɗut ena daagnignu ib laa iittanu diig dookkulnu oɗ medattem. Ig maɗoɗ ele daagnignu oonig dayom, amge ena laa ihinigppa ii beum. Ao, ig eɗut ena daagnignu haen daakkunu oonig dayom, amge baɗak eheɗ nau ele aakkuib beum daatte.