Prowerb 19:12 - Nobonob Baibel

¹² Kingnu oppoɗi be ameg kokoɗ eppak am laion baunu gayak bia; amge ena doyak nuhig am gikkiɗahppa baito daatte bia.

Prowerb 19:12 Referans Kwoze

Hosea 14:5

Am Yawe Nug ele atte. “Baito habppanu wanppa na, ena ehanidtte, amubia da, Yawe, da Israel danab ah ehanadkkul; da anam heppi, Israel danab ah ag geha lili laa bia, nug haɗag mappata, bala enanag bette, ag amubia daaglag. Israel danab ah ag geha Lebanon appa ad sida laa bia nug diɗiud wan unuqagnab noak ele daatte, ag amubia daaglag.

Prowerb 20:2

Kingnu oppoɗi bak amu laion baunu gayak bia; aun nug kingnu oo nauhak heeb bekku amu, nug mauhkku.

Prowerb 28:15

Nau hak danab laa nug danab ah ag ɠagattag iitta ele gumadtte dayeb; amuam laion, o bea enug qak doya, doɗ laa qa lakkunu hette, am amubia aakku.

Sam 133:3

Baito, qauko Hermonnu na, keeke appa daatteb oh le madatte. Baito amubia Sion guguittak qauko daatteb, amuppa ele nette. Amu maɗoɗ ele laippu dayak am baito enanag amubia. Ge, kobol amuam enaib. Jerusalem appa amu, Yawe Nug danab ah bau hanhan dayaknu itittak ena madatte.

Maika 5:7

Amu dimppa amu, oɗo yaak danab Jakop buɗubppanu amu, ag danab ah laa oh oolagppa daaglag. Baito Yawe me nette amu, baito amuam danab amelag ii mette. Ao, gu nakok gikkiɗahppa nette, gu amuam laa dilag ameg mak ii hette. ⌊Amubia Jakop buɗub ag Yawenu ehanittak aakkuib dabmekkulag, danab dilag iitta⌋.

Daniel 6:24

Ag amu anidna, king haknunab a, daup ag danab ag Daniel beɗuppa nai genab iitta yaappig ele, ag danab amu, ahilkad ah, ahilkad nid ele diin dona, moɗ naɗi laion daattebppa buɗiatteg noegeg, ag moɗ batakppa ii noegeg, laion aelkadppa, eppelkadppa ele kattiɗadna heeg, huppu huppu neppig.

Daniel 5:19

Kayak Nug king abenab attannab nug mettom amunu, wan atu ohppan danab ah, nai ohppan danab ah ele ag na mamen baɗidna, hahaɗppig. King nug laa mauhkkulagnu oo heum amu, nug he mauhppig. Laa nug ag bau daaglagnu oo heum amu, nug he, ag bau daappig. Laa nug ag okkai daaglagnu oo heum amu, nug he, ag okkai daappig. Laa ag onilag iitta daaglagnu oo heum amu, nug he, ag onilag iitta daappig.

Eklisiastis 8:4

King nug aɗi ab, nuhikkud danab ah ag aakku hekkulagoitte. Laa nug king amegppa, “Na aɗin hettem,?” akkun elele iitta.

Sam 72:6

King nug gu naana, gikkiɗah le medatte bia, nug anam bia daakku. Yo, nug gu naunau na, wan le medatte bia daakku.

Esta 7:8

Amu Haman nug Esta heeb, king nug ii qeeb mauhmanu oɗ medatta, nug Esta ɠagattagnab unuqkkunu gumitta ukka, nug balal Esta dayomppa, nug amuppa na qe, haen amuppanab King Ekserksis nug dad kingnu lag enanagnab guguittak dayom ele, nug appanu eɗua uɗiom. King nug eɗua uɗia amu, nug Haman nug balal Esta dayomppa oh daaeheh anata aum. “Nug da laulppa, dahil neekkakppanab kuinnu eheɗ hekkute?” awa aum. King nug anam aawo, laippun nuhig ehanittak danab ag Haman iɗu hautppig. Amuam laa Haman nug mauhkku ippuanattom.

2 Samuel 23:4

nug am buttua haen enanag, lombig iitta aam baaba, amahlak wan medatte, nug amahlak amubia daatte. Ge, danab anam amu, nug gu wan leppu mette, keeke wanppa bette amu, nug gu nug na mala, amahlak okkai bette, nug amahlak amubia daatte,’ awa aum.

Genesis 27:28

Kayak Nug na gu, wan ittag ele medakkunu ool daatte. Ao, Kayak Nug heeb, na ee kuɗum, iɗu iɗu ele daakkutnu ool hette.

Duteronomi 33:28

Kayak Nug anam hette amunu, Israel ag baɗak iittappa daaglag. Jakop buɗub ag enaib daaglag. Ag geha wan, wain bau, ee ele kuɗum, ag wan amuppa daaglag. Ag baito lomppan ele aoglag.

Aisaia 18:4

Aɗinu? Yawe Nug da amelppa inam atte. “Da geha toette, aam nug ba huan gakkaɗa, nug ihi le ele laippu daattep qe, amemɗiag aotte, o gu hoɗopai hippuɗak nakok na, ee keeke uɗulagppa daatte, da anam toette daakkul. Da anam dayeye, da daattem abenppa dayeye, geha da neegppi ukkeb, da ⌊wan amuppan danab ag aɗi henan daatteb antten, da geha, haenppa dahil uɗat hekkul.⌋” Nug anam atte.

Esta 1:12

King nug ag anam appeg dookkunu amelagppa a, ag appig, amge Kuin Wasti nug ukkaknunab anak amu dim lamidkkunu uuom. Amuam he, king nug oppoɗi be ameg kokoɗ eppe, nug oo nauhak huananab doyom.