Prowerb 17:24 - Nobonob Baibel

²⁴ Danab nug diignu doyak tutukku ele nug hanhan doyak dabmak ena ele aɗi ippunidtte, nug amu dabmetta autanab aotte; amge danab nug Kayak dab-ii-maama ii dim lamidtte ele, nug anam iitta, nug dabmak hamu hamu aotte.

Prowerb 17:24 Referans Kwoze

Eklisiastis 2:14

Danab nug doyak dabmak ena ele nug danab ameg ena ele oitte bia daatte; danab Kayak dab-ii-maama ii dim lamidtte ele nug danab ameg gaɗuak, gatatuppa oitte bia daatte. Anam, amge da keeke laa ele aakku dabmemi. Amuam danab Kayak dab-ii-maama ii dim lamidtte ele nug mauhtte; aria danab doyak dabmak ena ele amu, nug ele mauhtte.

Eklisiastis 8:1

Aun nug danab doyak dabmak ena ele bia daatte? Ge, aun nug keeke ohnu diig ab doognignu elele? Danab nug doyak dabmak ena ele, nug iɗuppa amahlak bia daatte. Ao, doyak dabmak ena ele he, danab iɗu am danab ɠagattag neegtte bia ii daatte.

1 Jon 2:16

Aɗinu? Ig doottem, wanppan keeke oh, amuam beɗu kobol haknu oo hak nau dim lamittak, ameg qak doya awaknu oo hak nau dim lamittak, amu nukka binag maknu oo hak nau dim lamittak ele, kobol amu oh am Mame toppanu iitta, keeke amu oh am wanppanuib.

Eklisiastis 6:9

Danab nug keeke aɗom daattenu elele dootte, amuam kobol ena; danab nug hanhan keeke baubau aokkunu dabmette amu, kobol amuam ena iitta. Amu ele am gaɗappa, unuqagppa ele anttak laippu iitta; am danab nug ulah aɗakkunu, ulah dim lamidtte, am amubia daatte.

Prowerb 14:6

Laa nug awa awa qettak kobolppa oitte amu, nug doyak dabmak ena ele aokkunu hekku, me nug iinab aoma; amge laa nug diignu doyak tutukku ele amu, doyak ena, nug igippa daakkun uug iitta.

Jon 7:17

Am danab laippu laa nug Kayaknu dabmak awaknab dim lamidkku amu, nug nai, da madittem imu, nai amuam Kayak toppanu beum o iitta da dahil dabmakppatai madittem amu nug dookku.

Prowerb 23:5

En okkai am paha paha iitta mekkunu elelenab; Aɗinu? Haen kuɗum ai igel nug hagagaɗa, paha paha gotte, paha amubia en okkai na eppenppanu gokku.

Prowerb 15:14

Danab ag diignu doyak tutukku ele, ag doyak ena ele tuɗidna aon daaglagnu hetteb; amge danab nug Kayak dab-ii-maama ii dim lamidtte ele, nug tuɗitta, Kayak dab-ii-maama haknu kobol antta dabmekkunu oo daatte.

Sam 119:37

Na ɠagattag iuppe, da keeke nau oh dimattei! Na heppe, da nahip naippa dayen oikkulnu oɗ medattem.

Prowerb 17:25

Bekka laa nug Kayak dab-ii-maama ii dim lamidtte ele nug mameg guittak medatte; nug anig ooppa mua okkainab, kahipan aoɗom bia ele he bette.