Prowerb 16:32 - Nobonob Baibel

³² Danab nug oo maɗoɗ dayak ele kobol dim lamidtte, nug ban danab ɠagattag eɗidtte. Ao, danab nug oppoɗi bak nuhig aɗe ukke bodoedatte, nug ban danab nug aab okkai laappanu ban danab eɗatte, padal metteb, am nug eɗidtte.

Prowerb 16:32 Referans Kwoze

Jems 1:19

O lailadnab, ag oh kobol imu doon autna aweg! Ag nai paha dooglagnu daulag human dayeg! Ag anam hekkulag, amge ag nai paha aib madippig, oppoɗilag ele paha aib beum.

Prowerb 15:18

Danab nug oppoɗi paha bette ele, nug he, nug qak ahatte; amge danab nug oo maɗoɗ ele dayak kobol dim lamidtte, nug he, nai hak bodoedatte.

Prowerb 25:28

Danab nug nukka nug nuhig oiyak pehettak atognoak ii hette amu; amuam aab okkai laa aɗ loppaɗa, na qak daatte, amubia.

Prowerb 14:29

Danab oo maɗoɗ ele dayak kobol dim lamidtte ele, nug am diignu doyak tutukku okkai ele daatte; amge danab nug oppoɗi bak paha dootte ele, nug am Kayak dab-ii-maama hak kobol dim lamitta oitte.

Rom 12:21

Aria na aib heppe, kobol eheɗ na eɗittom. Iitta! Na kobol ena henana, na kobol eɗitte!

Prowerb 19:11

Danab nug doyak dabmak ena ele daatte amu, doyak dabmak ena amuppa nug oo maɗoɗ ele dayak danab daatte; haen danab laa nuhigppa eheɗ he, nug eheɗ hak amu uhuqa medatte, kobol amunu danab ah ag nug binag metteb.

Sam 103:8

Yawe Nug ihinignu oo bodoetta le mak kobol, oo bodoette enanag maɗoɗ ele hak kobol ele dim lamidtte. Nug oo paha ii nauhtte, amu nuhig oo mauhaknab kobol am amba, leta nette.

Epesus 5:1

Ag Kayak bekkod daatteb, ahilagnu Nug oo mauhtte amunu, Nug ippu hena dayeg!

Revelesen 3:21

Aun laa nug ban eɗidkku amu, da nug daakkunu elele appi, nug da ele dahil sia kingppa, anukka da ban eɗitti, gemu da Mamel ele nuhig sia kingppa daattep amubia daagnih.

Prowerb 16:19

Danab nug nukka onig qe neene, laa ag laa dilag eheɗ hattak waappa daatteb, nug ag oolagppa daatteb, amuam uug daatte, me am ele ena; amge danab nug dada hak danab ele layam bateb, keeke dada hak danab yab aoppig ele laippu aɗan oiglag, amuam ena iitta.

2 King 5:12

Nug da amelppa da ukke, Jodan leppa laakkulnu aum, amge Damaskusnu le aɗit laa, laa onig Abana, laa onig Parpar, le aɗit amu Israel dilag le oh eɗadttep. Da le aɗit amu, amuppa laappi, oɗe beɗulppa iite iitta mekku?” awa aum. Nug anam anana, aakku Naman nug oppoɗi huana be, ameg kokoɗ eppe ukkom.

Prowerb 16:31

Umimi bak am king haɗ enanagnab, king onig medatte, amubia danab, o ah onig medatte; bau dayak elab amubia amu, amuam genab tutukku hak ibuppanu nob ena.

Prowerb 16:33

Danab ag aɗi hekkulagnu om ena yaatteb; amge om ena yaak oh aɗi aɗi ippunigtte, amuam Yawe eppegppanu uɗitte.

Eklisiastis 7:8

Keeke laanu digmak am nakok ena. Keeke amunu gogppa tak am enanag; amubia oo bodoettak kobol am dada hak kobol eɗidtte.

Prowerb 25:15

Danab nug oo maɗoɗ ele dayak kobol dim lamidkku dayeb amu, nuhig okkai nug dabmak eɗukku bia; amu nai bodoettakppa mattiak amu, amuam heeb, dabmak ɠagattag eppom daatte baolikkunu elele.

Eklisiastis 7:9

Danab ag Kayak dab-ii-menan ii dim lamidtteb ele, ag ahilag kobol am ag paha paha oolag nauhtte; amunu na amubia aib heme! Na paha paha oot nauhmanu dabme!