Namba 18:8 - Nobonob Baibel

⁸ Yawe Nug Aron amegppa anam awowa, Nug tuɗitta aum. “Da, Yawe, da dakka, da na, na begapad ele ag mana mettak atten Israel ag da meɗaglagnu hetteb ele amu, ag eppelagppanu aoglagnu, ag manan meɗaglagnu ele tituanadmi. Mana mettak amuam dahilnu tituanak daatteb. Amu mana mettak amunu doɗ, o ee aeg keeke, Israel ag da meɗappeg, laih atten ag ii manan meɗaglag daatte amu, da na, amu na begapad ele madattem. Maha amuam ahilag daatte, ag amu hanhan aoglag.

Namba 18:8 Referans Kwoze

Lewitikas 6:16

Plaua eppeg laippuppa appuom amu, plaua amu manak malak, plaua biig laih oh am Aron, bekkod ele dilagnu ee daakku. Plaua amuppa bret yis iitta hak dimppa, ag mettid haknu peh lag danab ah appa qagmetteb ele, lag amu haɗap-ppa, aben amuam Yawenu tituanak daatte amu, ag appa lakkulagnu daakkuoitte. Aben amuam Kayaknu tituanak daatte amunu, ag appa lakkulag.

Lewitikas 7:6

Mana mettak danab baegppan amu, amuppan danab oh ag mana mettak amu lakkulagnu elele. Amge ag aben, Yawenu tituanak daatte ele, amuppa daanna lakkulagoitte. Ee amuam Yawenu tituanaknab daatte.

Lewitikas 6:18

Mana mettak danab ag Yawe mettaknu aab aɗunu ofa hadatteb ele, amu maha laa am ahilag daakkunu tituanak daatte amunu, Aron buɗubppan danab aun nug ee aegnu ofanu maha amu lakkun elele, gemu, buɗub buɗub doobob, hanhan ele. Aun laa, o aɗi keeke laa ee amu lauɗidtte amu, ee amu heeb, nug Yawenu tituanak ba daakku,” awa aum.

Eksodas 40:15

amu na ag mamelagppa heme bia, na ag dahil mana mettak uɗat hekkulagnu, na goɗen gokkaɗakppa tituanadkkut. Goɗenppa tituanak amuam, buɗub buɗub doobob, ag buɗulkad dimppa bekkulag amu, ag hanhan dahil mana mettak danab daaglagnu goɗen gokkaɗakppa tituana awak daakku,” awa aum.

Eksodas 40:13

Na ag leppa ihadna malan, na Aron, nug mana mettak uɗat dahil hekkunu amu, na nug aon, na nug mana mettak danabnu lamen, dahilnu tituanak daatteb, nug lamen amu nug beɗuppa aɗuidppe noob, na laittaknu goɗen aon goɗen gokkaɗakppa tituanidna, nug dahilnu tituanna meɗe!

Eksodas 29:29

Haen Aron nug mauheb, ag mana mettak lamen nuhig amu buɗub anen anen mana mettak dilag ikki bekkulagnu benana, ag goɗen gokkaɗakppa tituanak daaglagnu, ag mana mettak danab daaglagnu baɗ ele aoglagnu, ag lamen amu madappeg, ag amu takkeg! Lamen amuam dahilnu tituanak daatteb.

1 Jon 2:27

Amge ag Kristus eppegppanu Kayak Ouɗi aoppig, ag oolagppa ele daatte amunu, auntai laa nug ag keeke laa ippunadkkununab ii daatte. Aɗinu? Kayak Ouɗi, Nug keeke ohnu diig tutukku ippunadtte, Nug am genabib ippunadtte, Nug hambuppuak laa ii ippunadtte amunu, Nug ag ippunadtte amu, ag amu dim lamidna, Kristus ele laippu dayeg!

1 Jon 2:20

Anam, amge dahilad, ag Kayak Ouɗi aoppig amunu, ag oh aakku keeke doyak diig genabibppanu bette dootteb.

Hibru 1:9

Na genab tutukku hak kobolnu oot mauhom, gemu ele oot mauhtte, kobol naunu amu, na nau ninig ele doome, gemu ele na anam doottem. Anam amunu, ⌊O king,⌋ Kayak, Nug am nahip Kayak, Nug goɗen gokkaɗakppa tituanitta, maɗoɗppan gamag ahak okkainab, king laa oh eɗattak, na mettom.”

Aisaia 10:27

Haen amuppa Yawe Nug heeb, ag Israel, ag uug laa Asiria ag madatteb ele amu, ag uug amu baula ii maomna. Ag Israel, ag Asirianu uug baula ii maomna.

Duteronomi 26:13

Na anam henana, na Yawe, nahip Kayak, na Nug amegppa inam akkutoitte. “Da keeke obatak eblaih tanig ele ooppanu obatak laippu awen, Lewi buɗub, wan laihnu danab ah, nid mamelkad mauhppig, ah qab ele dilagnu, haknunab anak ihinignu ame bia hemi. Da nahip nai haknunab anak laa amu ii tippalmi; daul ele ii atiom.

Duteronomi 12:11

ag keeke oh da ag haknunab attem amu, ag amu oh akkan, Yawe, ahilag Kayak, Nug onig aguppa daakkunu aben epeɗikku ele, ag amuppa wakkulagoitte. Keeke amuam inam: manaknu ofa, mana mettak laala ele, keeke obatak eblaih tanig ele ooppanu obatak laippu Kayak mettak, Kayak hamu ɗo mettak, aria aɗi keeke ena ena ag nai genab ana qakkaknu ofa hekkulagnu appig ele.

Duteronomi 12:6

Am Yawe Nug aben laa ag Nug noobppa dup nona binag mekkulagnu ippuanatteb amu, ag manaknu ofa, mana mettak laala, keeke obatak eblaih tanig ele ooppanu obatak laippu Kayak mettak, keeke Kayak hamu ɗo mettak, nai genab ana qakkaknu ofa, amu laippu dayaknu ofa, makau, amu sipsip ele nalkad ⌊dawai⌋ tatamnu ele oh, ag aben amuppa Yawenu akkan wakkulag.

Namba 18:9

Ag mana mettak maha dahilnu tituanaknab daatte laih aab aɗuppa ii managlag, danab ah ag da meɗaglag ele amu, laih amuam ahilag daakku. Israel danab ah ag mana mettak attem attem aon, dahilnu tituanaknab dayebeb meɗaglag, amuam ee aegnu ofa, o iitta ib etta hipunin haknu ofa, o iitta eheɗ haknu ofa amu, ag mana mettak amu laa aon wakkulag dayeb, ag aɗi keeke laa maha laa ii manak ele amu, amuam na, na begapad ele, ahilag.

Lewitikas 21:10

Mana mettak ikki danab, nug laikkud oolagppan nug danab laittaknu goɗen ele nug igippa gokkaɗe, nug mana mettak danab dilag lamen tagakkunu baɗ awom daatte, ⌊auntai laa mauhkku amu⌋ nug ikki uɗug uueb, mauhnoak ii daakkuoitte. O nug lamen iinab pattiɗkkuoitte

Lewitikas 8:30

Dimppa, Moses nug laittaknu goɗen laa awa, tiig qaɗabppa dayom, amu laa ele awa, Aron beɗuppa, nuhig lamen ele tauɗ qettom; nug bekkod dilagppa ele anam heum. Nug ib amuppa he, Aron, bekkod ele, ahilkad lamen ele, ag oh Yawenu tituana mettak daappig.

Lewitikas 6:26

Am mana mettak danab aun nug ib etta hipunin haknu ofa hekku amu, nug, ⌊mana mettak danab laa ele, ag⌋ mettid haknu peh lag danab ah appa qagmetteb ele, ag lag amunu haɗap-ppa appa daanna lakkulagoitte. Aben amuam Kayaknu tituanak daatte amunu, ag appa lakkulagoitte.

Lewitikas 6:20

“Deɗ Aron bekkod ele ag mana mettak danab daaglagnu goɗen gokkaɗakppa tituanak aoglag, deɗ amuppa ag mana mettak inam hekkulagoitte. Ag 1 kilogram plaua enanag, ee aegnu ofanu aon, Yawe toppa uɗiglag. Ag maha laih amu buttua mana mettak hewona, maha laih amu tueb mana mettak hekkulagoitte.

Eksodas 29:21

Na amu hena malona, dimppa na tiig laa qaɗabppanu aon, laittaknu goɗen ele aon kabolin, na Aron tauɗ qettona, nuhig lamen ele tauɗ qettan, na nug bekkod ele tauɗ aqona, ahilkad lamen ele tauɗ qe! Na anam heppe, Aron, nug bekkod, amu ahilag lamen oh ele am dahilnu tituana mettak daaglag.

1 Korint 9:13

Ag imu iite dootteb? Danab ag Kayaknu mettid lakka uɗat hetteb ele, ag ahilag ee Kayaknu mettid lakkanu aotteb. Amu danab ag doɗ mana Kayak mettaknu uɗatnab hetteb ele, ag qaɗabppanu ee aotteb.

Lewitikas 7:14

Nug bret diig anen anen laib laib amu awa dokkuoitte. Nug akka ukka, Yawe, nuhig daakkunu hamu metteb amu, amuam geha mana mettak danab nug Yawe amegppa, ‘Ena heme,’ anaknu, Nug ele laippu dayaknu ofa amu haaha, doɗ mana Yawe medatte, nug doɗ amu tiig awa, qaɗab tauɗ qedatte ele amu, bret amuam nug, nuhig daakkuoitte.

Lewitikas 7:28

Amu Yawe Nug Moses amegppa aum.

2 Stori 31:4

Hesekaia nug Lewi buɗubppan mana mettak danab, Lewi buɗubppan mana mettak danab iitta, ag ele, nug ⌊ag laih wana, men doɗo awaknu uɗat laa hekkulagnu duttunak ii doomnanu⌋, ag Yawenu ɗo pehettak doon dim lamidkkulagnu elele daaglagnu, nug Jerusalem danab ah, ag aɗi keeke mana mettak danab, aɗi keeke Lewi buɗubppan mana mettak danab iitta, ag ag ele mattaglagnu daappig amu, ag aon uɗin mattaglagnunab aum.

Eksodas 28:43

geha haen Aron nug bekkod ele ag dahil mettid haknu peh lag danab ah appa qagmetteb ele, ag amu ooppa nokkulag, o ag dahil qaɗab gukkuidna, lag Oo Gun Eleppa dahil ɗo maɗoɗnu uɗat hekkulagnu gokkulag amu, ag beɗulagppa aab iitta daaglagnu, da heppi mauhmananu amu, ag trosis ahilag, amu lamen laa oh waappa meig! Ɗo amuam hanhan anam dayebeb, Aron buɗub ele ag anamib heig!” awa aum.

Lewitikas 23:20

Mana mettak danab nug sipsip gaiɗ aɗit, am bret kunum, amuam ee tatam oɗutteppanu hak amu, nug amu ele awa, Yawe noobppa huma epponitta mettaknu ofa hekku. Amuam ofa Kayaknu tituanak daatte, amu mana mettak danab dilag daakku.

Namba 5:9

Ofa Kayaknu tituanak daatteb ele oh Israel danab ah ag aon dona, mana mettak danab medatteb ele, amu ohnu amu, maha laa mana mettak danab dilag daatte. Anam amu, amuam mana mettak danab aun nug mettaglag amu, nuhigppa daatte.

Duteronomi 18:1

Mana mettak danab, ag ele Lewi buɗub, amu Lewi buɗub laa oh ele, ag Israel dilag huu okkai laala, ag wan ahilagnab, ag aulag daakkunu aotteb bia ii aotteb; ag aulag wan laa iitta, ag amu dabmetteg! Ag amu anam iitta amunu, ag mana mettak maha laa, ag Yawe mettaknu aab aɗunu ofa hadatteb ele amu, ag amuppanu aoglag. Keeke amuam ag aulag bia daakku.

2 King 12:16

Men doɗo laa, amuam danab ah ag eheɗ haknu ofa, ib etta hipunin haknu ofa elenu men doɗo amu, ag men doɗo amu Yawenu mettid lagnu dayom, amuppa ii meppig. Iitta. Men doɗo amu ag aon uɗin, mana mettak danab ahilagib daakkunu madappig.

2 Stori 31:5

Hesekaia nug anam a, pahanab Israel buɗub ag ee tatam oɗuom, amuam ee aeg, wain bau, goɗen, uppuh leppu, am aɗi keeke laa dattanu aoppig amu, ag amu aon uɗin, Lewi buɗubppan mana mettak danab, Lewi buɗubppan mana mettak danab iitta amu, ag ag ele madappig. Ag huanak madappig. Keeke ahilkad amu ohnu ag obatak eblaih tanig ele ooppanu obatak laippu ag Lewi buɗubppan mana mettak danab, Lewi buɗubppan mana mettak danab iitta, ag ag ele madappig.