Namba 17:10 - Nobonob Baibel

¹⁰ Anam heeg, Yawe Moses amegppa aum. “Na Aronnu dudqak hokkat amu eɗun, Tituanak Nainu Kunup kontrak inak ele noobppa me! Na appa meppe, at aakku dayebeb, da aɗi nai attemnu, danab, ag nai tappe nak danab amu, ag dahilnu naittuɗ ii memananu dabmekkulag. Ag at amu dabmena ag dahilnu naittuɗ ii hena, ag ii mauhmana,” awa aum.

Namba 17:10 Referans Kwoze

Hibru 9:4

Aben amuppa kalu danab ileb muttuɗig enanag baknu qaɗab golppa hak, amu nug tituana nai qakkak kunup, ag amu adppa hewona, ad amu qaɗeppa ooppa ele gol mewona, ag nug ameg am golppaib heppig amu, keeke aɗit amu aa aguppa daapiɗ. Amu kunup amu ooppa gol id laa, amuppa ag maana inappig, aria Aronnu bu ita beum ele, amu men otala aɗit, amuppa ɗo nai yaalattak ele, keeke amu oh kunup amu ooppa daappig.

Epesus 5:6

Laa nug nai hamu mattiakppa ag eeɗatteb, kobol nau oh amuppa nomananu dabmeig! Aɗinu? Kayaknu oppoɗi bak uɗitte ele am danab oh ag Kayaknu ɗo tappaeg nette ele, ahilagppa daakku

Aisaia 1:2

Hab daup ag nai doyeg! Wan danab, ag daulag human doyeg! Aɗinu? Yawe Nug inam atte. “⌊Juda danab ah ag⌋ am nid naunau dahilad. Da ag atognoatten bekkadmi, amge ag da waalppa daaglagnu uun, dahil nai tappaeg ne oitteb.

Sam 57:4

Dahil kekeɗ ag da taliliɗppig daatteb. Da am danab nug laion ag enug aqak ele, ag nug talilidppig daatteb, da amubia daattem. Ao, dahil kekeɗ ag laion doɗ laa laatteg iitta metteb bia, ag danab ah hattaeg nauhtteb. Ge, kekeɗ dahil ag laion bia, ag aelkad am lat doɗo bia, lemaɗulkad amu qep elab bia.

1 Samuel 30:22

Dawit nug anam heum, amge nuhikkud danab amu oolagppa danab laib laib laa ag danab nau, haen kuɗum ag heeg uug bette, danab amu ag appig. “Danab amu ag ig ele banppa ii gomut amunu, ig ban heta, keeke aomut, ig amunu laih ag ii mattamta,” appig. “Keeke imu aakkuib ag aoglag; anen anen ag ahilkad ah, nid naunau ele diiadna, ag diin ukkeg!” appig.

1 Samuel 2:12

Elkana, Hana ele aa goya aabppa daaeheh, Samuel nug Eli ele Silo appa daapiɗ. Aa anam daaeheh, Eli bekoɗ, aa onilah am Hopni, Pinias ele, aa mana mettak uɗat hepiɗ, amge aa am danab nau; aa Yawenu, “Nug am keeke hamu,” doopiɗ.

Duteronomi 9:24

Ag hanhan Yawe oɗe tappaeg nette anidttem. Ag kobol amu ii uutteb, hakib hetteb. Haen oh da ag doyadttem ele amu, ag anamib aakku hetteb.

Namba 16:40

Yawe Nug Moses amegppa a, Moses nug amelagppa nug anamnab hekkunu aum bianab heum. Anam haknu diig am, at amuam Israel danab ag amelagppa hanhan daakku. Anam dayeb amu, ag anidna, auntai laal iitta, Aron buɗubppan ag aakkuib Yawe noobppa kalu danab ile, muttuɗig enanag bette ele amu amotkkulag. Kora laikkud ele ag anam hena mauhppig, am laa ag ele anam helob amu, ag ele mauhlob.

Namba 16:38

Bras tappiɗ amu, danab ag hipunin qeppig ele, ag aɗappig. Ag hipunin qeppig amunu, mauhppig. Bras tappiɗ amu danab mauhppig ele, ag amuppa mana mettak hena, ag aon, da, Yawe, da gumiɗna uɗina, da meɗappig amunu, tappiɗ amu ag dahilnu tituanak daatteb amunu, na heppe, hamappa oadppeg, otalna, teppu iitta beppeg, ag qaɗab dahil qaɗeppa maatteg! Na anam heppe, amuam Israel danab ah dilag at dayebeb anidna, ag hipunin hemananu dabmekkulag,” awa aum.

Eksodas 16:32

Aria, Moses nug Israel amelagppa inam aum. “Yawe Nug haknunab inam aum. ‘Da Isipnu diiatten, omalatti uɗippig, haen amuppa da ag ee imu atu taɗak imuppa mattami amu, buɗub buɗub doobob, ag alalkad, buɗulkad aɗi ele amu, ag dabmattanna, ag buɗulkad aɗi ag amu anidkkulagnu, ag waa hanak nag laippu laa aon, ag maana kilogram aɗit, aguppa inan meppeg dayaɗ!’ awa aum.” Yawe Nug ɗo anam me, Moses nug Israel danab ah amelagppa anam aum.

Hosea 10:9

Yawe atte. “O Israel danab ah, anukka Gibea appa ag hipunin naunab laa heppig; ag amu heeg uɗie uɗie, gemu ag tuɗidna hipunin henan daatteb. Gibea appa danab eheɗ heeg, Israel laa oh ag ahan, ban heeg, Gibea aɗi ag iite nauhppig? ⌊Amu Israel danab ah ag gemu eheɗ henan daatteb amu, ag ele bu iite aoglag?⌋

1 Korint 10:10

Amu ag Kayaknu naittuɗ, Israel oolagppa danab ah laala heppig bia aib heppig. Ag Kayaknu naittuɗ nai mattieg amu aqakkunu engel nug aqe mauhppig.

Eksodas 16:34

Moses nug anam a, aria Aron nug Yawe haknunab nai Moses amegppa aum, Aron nug amubia maana waappa ina, nug waa amu Tituanak Nainu Kunup kontrak inak ele, aguppa daakkunu, amu noobppa meum.

Namba 17:4

Aria, Israel dilag huu okkai anen anenppanu ikki danab anen anen ag hokkat medappeg amu, na hokkat amu dahil mettid haknu peh lag danab ah appa qagmetteb ele, na peh amuppa Tituanak Nainu Kunup kontrak inak ele noobppa maatte! Appa amu da ag ele qagmettem.

Namba 17:9

Anam daye amu, Moses nug Yawe noobppanu dudqak hokkat oh diia, Israel danab oh ippuanattom. Ag anadna, danab anen anen ag ahilkad hokkat eɗun diin goppig.

Namba 17:11

Amu Moses nug Yawe hekkununab aum amu, nug anamnab aakku heum.

Namba 20:9

Yawe Nug Moses amegppa anam aum amunu, nug nuhig dudqak hokkat, Yawe hekkununab aum bia, Yawe noobppanu awom.

Duteronomi 9:7

Ag Yawe, ahilag Kayak, ag Nug atu taɗakppa heeg, Nug oppoɗi beum amu, ag amu oh ag daulagppa doaɗ! Haen ag Isipnu digmen ahappig uɗie, gemu ele, ag Nug oɗe tappaeg neene daatteb.

Namba 4:18

“Kohat buɗub, ag Aron buɗub ii daatteb, ag keeke Yawenu tituanaknab daatteb ele ii hautak daatteb, ag amu gukkuidna aib wappig. Ag daappeg ukkeb, Aron, bekkod ele dahil mettid haknu peh lag ooppa gona, ag keeke amu oh hautppeg, ag wakkulag. Ag ii hautak haenppa wakkulag amu, ag mauhkkulag. Amunu ag ii mauhmananu, Lewi buɗub oolagppa ii daamnanu, ag bau daaglagnu amu, Aron, nug bekkod ele ag hautna malappeg, ag Kohat buɗub ele, ag oh pehppa nona, Aron, nug buɗub ele, ag Kohat buɗub ag aɗi aɗi mawadkkulag amu, ag tutukku ippunadkkulag,” awa aum.

Namba 14:5

Ag anam aeg amu, Moses, Aron ele aa Yawe unuqidkkulahnu, Israel danab ah laa oh daappig noolagppa laippun gatelah qaun o gomelya iɗulah wanppa mepiɗ.

Namba 16:21

“Da danab imu pahanab hadappi nauhkkulagnu, aa awaidya laih dayeɗ!” awa aum.