Matyu 3:11 - Nobonob Baibel

¹¹ Da ag oolag eɗuom Kayak dim lamidtteb ele leppa layadttem, amge laa Nug da dimulppa uɗitte amu, nuhig ɠagattag am dahil eɗidtte. Nug am danab okkainab, da am okkai iitta; dahil hak am nuhig bia iitta, dahil am elele iittanab iitta. Nug Kayak Ouɗi, aab aɗu eleppa ag layadkku.

Matyu 3:11 Referans Kwoze

Luk 3:16

Anam aeg amu Jon nug amelagppa aum. “Da ag leppa layadttem, amge laa Nug da dimulppa uɗitte amu, nuhig ɠagattag am dahil eɗidtte. Nug am danab okkainab, da am okkai iitta; dahil hak am nuhig bia iitta, dahil am elele iittanab iitta. Nug Kayak Ouɗi, aab aɗu eleppa ag layadkku,” awa aum.

Aisaia 4:4

⌊Danab laa ag Israel danab dilagnu, “Ag am Yawenu, oppiaawak ele,” akkulagnu diig am,⌋ Naɗi Nug nuhig ɠagattagppa Nug danab ah amu epeɗiatta, bappalatteb, ag Naɗinu, oppiaawak ele bena daan oiglag. Ib amuppa Naɗi Nug Sion ah oolagnu dubuttid, oolagppa aɗak daatte amu, Nug amu oh iha, oppieb ukkeb, Nug Jerusalem danab ag laa aqaeg mauhppig, ag beɗulagppa aab ele, Nug aab amu oh iha, oppieb gokku.

Aposel 1:5

Am genab Jon nug danab ah leppa layattom, amge haen elab iitta Kayak Nug nuhig Ouɗippa ag layadkku,” awa aum.

Sekaraia 13:9

Am Yawe Nug imu ele atte. “Danab nug silwa o gol babaitta epeɗia awak daakkunu uɗat hette, amubia laa bau daaglag amu, da heppi, ag oolag dubuttid iitta daaglag. Ag da onilppa eppeg, da ahilag unuqittak dookkul. Da ahilagnu, imuam dahilad danab ah, appi, ag, Yawe, Nug am ihinig Kayak, akkulag.” Yawe Nug anam awa atte.

Taitus 3:5

Nug ig eɗua awikkom. Ig ihinig genab tutukku hak kobol hemutnu laala anatta ii heum. Iitta. Nug ihinignu oo gai-iitta doya oo mekka ehanikkom amunu, Nug ig ihikka, nuhig Ouɗippa Nug bauklel mekke, ig bau menuak aomut.

1 Korint 12:13

Kayak Ouɗi Nug he, ig oh beɗu laippu bia daattem. Laala am Juda danab, laala am iitta aɗi danab. Laala am begbeg maɗi nid, laala am begbeg maɗi nid iitta. Yo, ig oh Kayak Ouɗi Nugib aomut.

Matyu 3:6

ag hipunin ahilag miagib mattiegeg, Jon nug Jodan leppa layattom.

Aposel 19:4

Anam aeg amu Pol nug aum. “Anukka Jon nug danab ah layattatta, nug inam amelagppa aum. ‘Kayak Nug ahilag hipunin uhuqa madakkunu amu ag oolag eɗueb, ag layattak aweg!’ awa aum. Nug ele, ‘Danab nug da dimulppa uɗitte, ag nuhignu oolagppa genab doyeg!’ awa aum. Danab amu nug Jesus,” awa aum.

Luk 1:17

Nug Kayaknu propet Elaiyanu hak ɠagattag, ebehi ele, nug amubia awa, Naɗi noob awa, anuqa ukka heeb, danab ag ahilkad nid naunau ele oo mak daaglag. Nug heeb amu, nai tappe nak danab ag oolag eɗueb, ag genab tutukku hak danab dilag doyak dabmak ena ele aon daaglag. Nug heeb, danab ah kuɗum Naɗi uɗikkunu babaittak daaglag,” awa aum.

Jon 1:30

Am danab umu aakkuib, da nuhignu inam ami. ‘Danab Nug da dimulppa uɗitte ele, Nug da eɗilak. Aɗinu? Nug anukkanab, da ii daami haenppa, Nug dayom.’

Mak 1:4

Anam amu, Jon nug atu taɗakppa uɗia dayaya, nug danab amelagppa, Kayak Nug ahilag hipunin uhuqa madakkunu ag oolag eɗueb, layattak aoglagnu nai mehuqom.

Epesus 3:8

Da am Kayaknu danab ah oppiaawak ele laa oh noolagppa keeke hamunab daattem, amge Kayak Nug ehanittak okkai hamu meɗa, Nug da iitta aɗi noolagppa Kristusnu keeke ena ohnu, danab nug amu antta dookkunu elele iitta, nai amu mehuqkkulnu meiɗom.

Aisaia 44:3

Aɗinu ⌊ag ii baɗamnanu attem⌋? Da heppi gu huana wan qaɗaiettakppa na, leppu medakku. Ao, da heppi, gu huana neeb, le naunau kuɗum wan qaɗaiettakppa gokkulag. Da anam hekkul amu, anamib da dahil Ouɗi ag buɗulkad madakkul. Ao, da dahil itittak ena ag buɗulkad madakkul.

1 Pita 5:5

Ag danab bau ag onilag qeppeg neeb, ikki danab waalagppa dayeg! Ag oh ag ag onilkad qeppeg neeb, ag nug ehanittak kobol heig! Aɗinu? Kayak naippa, nai amunu inam daatte. “Kayak Nug dada danab ippulag oo nette, amge danab ag akka onilag qeeg nette ele, Nug ahilagnu ii helo bia me, Nug ag ehanadtte.”

Jon 1:15

Amu Jon nug nuhignu nai mehuqaqa ewa aum. “Da anukka nuhignu mattimi am Nug aakku. Da ami. ‘Nug da dimulppa uɗitte, Nug da eɗilak. Aɗinu? Nug anukkanab, da ii daami haenppa, Nug dayom,’ ” awa aum.

Luk 3:3

A amu Jon nug aha, Jodan atu ohppa ukka, nug danab amelagppa Kayak Nug ahilag hipunin uhuqa madakkunu, ag oolag eɗueb, layattak aoglagnu mehuqom.

Aposel 8:36

Aa anam heyaya goya goya, le laa anidya, danab amu nug Pilip amegppa aum. “Antte! Le iikku. Aɗi keeke laa da layattak ii aopanu da qakkiɗtte?” awa aum.

Aposel 8:38

Aria, Kandasinu ehanittak anuqak danab nug a, karis lamittak danab nug karis aɗe dayeye, aakku Pilip, danab amu ele, aa le amuppa noya, Pilip nug danab amu layattak mettom.